1 Kuya Daudi kalongelighwa apfino, "Lola, Wafilisti woghutowa ghumji ghwa Keila na wakwiba ingano kulawa mna ipfibwalu pfa ukubetela." 2 Apfo Daudi kamghutsa IMNDEWA, "Apfi ng'ende kuwatowa Wafilisti?" IMNDEWA kamwidika, "Ona, ghenda ukawatowe Wafilisti na ughukombole ghumji ghwa Keila."

3 Lekeni iwanu wa Daudi wamlongela, "Lola, ahano Yuda henyegho hatukala twokala kwa ukupfuka, lelo itsakuwatse tung'aghenda Keila na tuketowe na maasikali wa Wafilisti?" 4 Daudi kamlomba keli IMNDEWA, naye kamlongela, "Uhulumke ughende Keila, kwaapfila nitsokutenda uwahume Wafilisti." 5 Apfo Daudi kaghenda kuna ghumji ghwa Keila kelongotsa na iwanu wake, ako ketowa na Wafilisti, kawakoma Wafilisti wengi na kaboka ng'ombe wengi. Apfo Daudi kawakombola iwanu wa Keila.

6 Abiatari, mwana wa Ahimeleki, kaghala chitsibao cha imtambika ahala hayatsumile kwa Daudi ako Keila.

7 Sauli hayahulike ka Daudi kapfika Keila, kalonga, "Imulungu kamwika mna ghamoko ghangu kwaapfila kehindila mwenyegho kwa kwingila mna ghumji ghuna ghamalango na makomeo." 8 Apfo Sauli kawakema iwamale wake wa ing'ondo, wahulumke Keila wakampfingile Daudi na iwanu wake.

9 Daudi hayahulike Sauli kobama yamkome, kamlongela mtambika Abiatari, "Ngalile ahano ichitsibao cha mtambika." 10 Kuya Daudi kalomba, "Ghwe MNDEWA, Imulungu wa Isiraeli, nene mtumighwa wako nihulika ghendo ka Sauli kobama kutsa kughuhinya ghumji ghwa Keila kwaapfila nene nitsa ahano. 11 Apfi iwanu wa keila watsongala kwa Sauli? Apfi Sauli katsohulumka ka apfila nene mtumwa wako pfanihulike? Ghwe IMNDEWA, Imulungu wa Isiraeli, nokulomba unyidike nene mtumighwa wako." IMNDEWA kamwidika, "Ona, Sauli katsakutsa."

12 Daudi kamghutsa keli, "Apfi iwanu wa keila watsongala kwa Sauli, nene na iwanu wangu?" IMNDEWA kamwidika, "Ona, watsokughala kwa Sauli."

13 Kuya Daudi na iwanu wake iwapfikile miya sita tsawoka, waghenda kokose kwawadahile kughenda. Sauli hayahulike Daudi ma katsuma kulawa Keila, kaghaleka ghayabamile kughatenda.

14 Apfo Daudi tsakakala mna ghamadagho makulu gha kunyika kepfisa, mna ipfidunda pfa innyika ya Zifu. Chila tsuwa Sauli tsakambama, lekeni Imulungu ng'amlekile baye Daudi yaghoghighwe na Sauli. 15 Tsuwa limwe Daudi hayang'ali kahabehi na Horeshi kahulika ka Sauli koghenda Zifu yambame yamkome. 16 Yonasani mwana wa Sauli kaghenda kwa Daudi ako Horeshi, kuko kamghuma ghumoyo yawe na tsingupfu tsa Imulungu. 17 Yonasani kamlongela, "Uleke kupfuka, aba wangu Sauli ng'atsokughogha baye. Ghweghwe kutsakuwa mfalume wa Isiraeli, na nene nitsakuwa wakeli wako. Hata aba wangu Sauli komanya imbuli aino." 18 Wose weli tsawoyila kwilaghana hambele ha IMNDEWA. Kuya Daudi tsakakala Horeshi na Yonasani koya ukaye yake.

19 Sauli hayang'ali ako Gibea, Wazifu waghenda kumlongela, "Daudi kepfisa mna isi yetu mna ghamadagho ako Horeshi, mna ichidunda cha Hakila, ichili kusini mwa Yeshimoni. 20 Lelo, ghwe mfalume uhulumke ka pfaukona pfinogha mmoyo mwako, na ng'onde yetu twetwe tutsokughoghela Daudi na kukwing'a ghweghwe mfalume."

21 Sauli kawedika, "Mwemwe mwombonela libatsi ghendo, IMNDEWA yawabaliki. 22 Ghendeni keli, mmanye hanu heyepfisile, na yuhi iyamwonile hanu aho, kwaapfila nihulika yeye kakengela ng'ani. 23 Mpelembe chila hanu mmanye hanu hayepfisa, kuya mtse mnongele. Kuya nitsoghenda hamwe namwe na ka yang'ali yokala hanu aho, nene nitsombama mna tsikolo tsose itsili mna isi ya Yuda."

24 Apfo waghenda Zifu, wamlongolela Sauli. Lekeni Daudi na iwanu wake tsawamna inyika ya Maoni, chiwala cha Araba kusini mwa Yeshimoni. 25 Sauli na iwanu wake wandusa kumbama Daudi. Lekeni Daudi hayahulike tsimbuli atso, kaghenda kwipfisa mna libambalawe, lili mna inyika ya Maoni na kukala ako. Sauli hayahulike mbuli atso, kamuwinza Daudi ako mna inyika ya Maoni. 26 Sauli na iwanu wake wang'ali woghenda ubali umwe wa chidunda, naye Daudi na iwanu wake wang'ali woghenda ubali ungi wa ichidunda chicho. Daudi hayang'ali kosumka ukutsuma yamhepe Sauli, Sauli naye yang'ali yosoghela habehi yamghoghe Daudi. 27 Baho imunu yumwe kamghendela Sauli kamlongela, "Utse sambi, Wafilisti woitowa isi." 28 Lelo Sauli kaleka kumuwinza Daudi, kaghenda kwitowa na Wafilisti. Apfo hanu aho hakemighwa, Sela Hamahilekoti, mana yake, "Chidunda cha libambalawe lya ukusulupuka." 29 Daudi kalawa hanu aho, kaghenda kwipfisa mna ghamadagho gha inyika ya Engedi.