1 Samweli kawalongela Waisiraeli usenga aula wayeng'ighwe na Imulungu.

Ghamatsuwa agho, Wafilisti wetingana hamwe wetowe na Waisiraeli. Waisiraeli weka indalo yawo ako Ebenezeri na Wafilisti weka indalo ako Afeki. 2 Wafilisti wakala ghoya wawatowe Waisiraeli, nawo wawatowa ghendo Waisiraeli. Na baho Waisiraeli elfu nne wakomighwa mna ing'ondo ayo. 3 Waisiraeli iwahonile hawoyile kuna indalo, iwabala wa Isiraeli weghutsa, "Heule leloli IMNDEWA kawaleka Wafilisti watutowe? Tukeni tukalisole Lisanduku lya laghano lya IMNDEWA kulawa Shilo, ili yeye IMNDEWA yatse yatwapfile na yatukombole kulawa kuna iwanu iwotwihila." 4 Apfo wawatuma wanu waghende Shilo, nawo walighala Lisanduku lya laghano lya IMNDEWA yana ingupfu iyokala mchanya mwa wapfiumbe weli wane mabawa iwakemighwe makerubi. Awala iwana wamale weli wa Eli, Hofini na Finehasi tsawatsa na lisanduku alila lya IMNDEWA.

5 Na Lisanduku lya laghano lya IMNDEWA halipfikile mna indalo, Waisiraeli wose wadeng'elela kwa kukememela, mbaka isi ihighisika. 6 Wafilisti hawahulike Waeburaniya pfawodeng'elela waghutsa, "Ukudeng'elela ako kuna indalo ya Waeburaniya kuna mana yachi?" Hawamanyile ka Lisanduku lya laghano lya IMNDEWA lipfika kuna indalo ya Waisiraeli, 7 Wafilisti wapfuka walonga, "Milungu ipfika mkaye mwawo!" Walonga keli, "Tutsochona! Chinu ka achino ng'ana chitulawile baye! 8 Tutsochona ghendo! Yuhi iyodaha kutukombola kulawa kwa imilungu ayo ina ingupfu? Ayo iyo imilungu iwatowile Wamisiri kwa chila janga ako kunyika. 9 Lelo mwemwe Wafilisiti mghangamale na mleke kutenyuka, muwe walume, mwitowe, ili mleke kuwa watumwa wa Waeburaniya ka wawo pfawali watumwa wetu. Muwe walume, mwitowe."

10 Wafilisti wetowa nawo, nawo Waisiraeli watowighwa, na chila munu katsumila kuna lihema lyake. Mna litsuwa alyo wanu wengi wakomighwa, wakomighwa masikali elufu selasini wa Isiraeli iwoghenda kwa maghulu. 11 Lisanduku lya laghano lya IMNDEWA libokighwa, na awala iwana weli wa Eli, Hofini na Finehasi nawo wakomighwa.

12 Litsuwa lilyo, munu yumwe kulawa mna kabila lya Benjamini tsakatsuma kulawa kwing'ondo, na kapfika Shilo mna litsuwa lilyo, aku ghamaghwanda ghake kadegha na kemwaghila timbwisi mwitwi mwake, kalangutsa apfila pfayali na usungu. 13 Eli tsakakala mna ichighoda chake mmbalimbali mwa inzila kololesa, kwapfila yang'ali yakwalangula lisanduku lya Imulungu mmoyo mwake. Imunu ayula hayapfikile mna ghumji na kuwalongela iwanu achila ichilawile, iwanu wose wangula chililo. 14 Eli hayahulike iwanu wolila, kaghutsa, "Iwanu awo wolilila choni?" Imunu ayula katsuma kaghenda kwa Eli, kamlongela imbuli ayo. 15 Matsuwa agho Eli tsakana miyaka tisini na nane na tsinenge ng'atsing'ali tsikona ghoya baye. 16 Imunu ayula kamlongela Eli, "Sambi nene ndawa kung'ondo, na nitsuma kulawa kung'ondo leloli aino." Eli kamghutsa, "Mwanangu, choni ichilawile?" 17 Imunu ayula iyaghalile usenga, kalonga, "Waisiraeli wawatsuma Wafilisti. Waisiraeli wengi wakomighwa, hata iwanagho weli Hofini na Finehasi wose wakomighwa, na Lisanduku lya laghano lya Imulungu libokighwa."

18 Imunu ayo hayalongile ka sanduku lya Imulungu libokighwa, Eli kaghwa chalughata kulawa hana ichighoda chake mmbalimbali mwa lilango. Eli hayaghwile apfo, singo yake ibeneka kwaapfila tsakaneneha, baho kafa. Eli tsakawa mlamutsi wa Waisiraeli kwa miyaka alubaini.

19 Mkwe wake Eli, pinga wa Finehasi, tsakana inda, na kahabehi ukweleka. Hayahulike ka lisanduku lya laghano lya Imulungu libokighwa na mkwe wake na mmale wake wose wafa, baho usungu umluma na keleka mwana. 20 Apfo ipinga ayula hayang'ali yakufa, awala iwang'unga iwang'ali womwapfila wamlongela, "Uleke kupfuka, kweleka mwana mmale." Lekeni yeye ng'edike wala ng'awategheletse baye. 21 Naye kamkema imwanaghe Ikabodi, mana yake, "Utunitso wa Imulungu uka mna isi ya Isiraeli." Tsakamkema apfo kwaapfila Lisanduku lya laghano libokighwa, na aba mkwe wake na immale wake wose wafa. 22 Kalonga, "Utunitso wa Imulungu uka mna isi ya Isiraeli kwaapfila lisanduku lya Imulungu libokighwa."