1 Mfalume Nahashi wa Waamoni kaghenda kughutsingila ghumji ghwa Yabeshi Gileadi. Na iwanu wa ghumji ghwa Yabeshi Gileadi wamlongela Nahashi, "Wilaghane na twetwe kuya na twetwe tutsokutumikila."

2 Lekeni Nahashi kawedika, "Nitselaghana namwe kwa chinu chimwe, nitsomng'ola chila yumwe wenu nenge yake ya kujilo, apfo nitsowaghela chinyala Waisiraeli wose hambele ha iwanu wa isi tsingi."

3 Iwabala wa Yabeshi wamlongela, "Twing'e matsuwa saba ili tuwatume wasenga mna isi yose ya Isiraeli. Ka kuduhu munu wowose wa kutukombola, twitselapfa kuna ghweghwe."

4 Iwasenga awala hawapfikile ako Gibeya kwayakalile Sauli, wawalongela iwanu mbuli atso na iwanu wose watula ndilo. 5 Lelo Sauli yang'ali yakuya kulawa kumghunda aku kawalongotsa wang'ombe wake, naye kaghutsa, "Iwanu awano wana choni? Heule wolila?" Nawo wamlongela tsimbuli tsawaghalile iwasenga awala kulawa Yabeshi. 6 Sauli hayahulike tsimbuli atso, Ghumuhe ghwa Imulungu kamtsila kwa ngupfu, naye kona maya sideke. 7 Kawasola ng'ombe weli kawaghanaghana pfihande, kawatuma wasenga wapfibititse pfihande apfo mna imibaka yose ya Isiraeli aku wang'ali wolonga, "Munu wowose iyolema kumuwinza Sauli na Samweli kuna ing'ondo, ng'ombe wake watsotendelighwa apfino."

Waisiraeli wapfuka kwaapfila IMNDEWA yang'awatendele apfino. Apfo iwanu wose walawa na wawa chinu chimwe. 8 Sauli kawatinganitsa Waisiraeli kuna ghumji ghwa Bezeki. Nawo wapetighwa wapfika wamale laki ndatu kulawa Isiraeli na wamale elufu selasini kulawa mna likabila lya Yuda. 9 Wawalongela iwasenga awala iwoyile kulawa Yabeshi, "Walongeleni apfino iwanu wa isi ya Yabeshi Gileadi, ‘llupfi, litsuwa halikwalika ng'ani, mtsokombolighwa.’ " Iwanu wa Yabeshi hawahulike mbuli atso wadeng'elela ng'ani.

10 Apfo wamlongela Nahashi, "Ilupfi twitseghala tuwenyegho kuna ghweghwe, naghwe kutsotutendela chochose chaukona chinogha."

11 Ilupfi yake iwanu hawang'ali wokalitsa indalo, Sauli kawabaghula iwanu makingili madatu, lupfilipfili wengila kuna tsindalo tsa aduwi tsawo, wawatowa Waamoni. Haipfikile nemihe wanu wengi wakomighwa. Awala iwahonile wapwililika, chila munu katsuma yaliyeka.

12 Kuya Waisiraeli wamlongela Samweli, "Walikwani iwanu iwalongile Sauli yaleke kuwa mfalume wetu? Tughalile iwanu awo, tuwakome."

13 Lekeni Sauli kawalongela, "Leloli kuduhu munu iyatsokomighwa, kwaapfila litsuwa alino IMNDEWA kawakombola Waisiraeli." 14 Samweli kawalongela, "Wose tukeni Giligali na twikelaghane keli ka Sauli yuyo mfalume wetu." 15 Iwanu wose waghenda Giligali, na hawapfikile ako, welaghana hambele ha IMNDEWA ka Sauli yuyo mfalume. Wamlapfila IMNDEWA nambiko tsa ukukala tseghamba. Naye Sauli hamwe na iwanu wa Isiraeli wadeng'elela ng'ani.