1 Sauli hayamalitse ukulonga na Daudi, Yonasani mwana wa Sauli, baho ghumoyo ghwake na ghumoyo ghwa Daudi ghuwa ghumwe, na Sauli tsakamkunda kwa ghumoyo ghwake ghwose ka pfayekunda yeye imwenyegho. 2 Kulawa litsuwa alyo, Sauli kakala na Daudi ukaye yake, ng'amlekile baye yoye ukaye kwa aba wake. 3 Yonasani keka laghano na Daudi kwaapfila tsakamkunda ka pfayekunda mwenyegho. 4 Yonasani katsula lijoho liyapfalile kamwing'a Daudi hamwe na chikoti chake, na lipanga lyake, iminde yake, mishale na ghumsipi ghwake. 5 Chochose Sauli chayomtuma Daudi yatende, Daudi katenda pfinoghile. Apfo Sauli kamsaghula yawe mkulu wa iwanu we ng'ondo. Imbuli ayo iwanogheletsa iwanu wose na iwakulu wa Sauli.

6 Iwamale iwolawa kung'ondo hawang'ali wakuya ukaye akuno welongotsa na Daudi iyamkomile Mfilisiti ayula, wapinga kulawa chila mji ghwa Isiraeli walawa waghenda kumbokela mfalume Sauli. Wapinga awo wang'ali wakwimba wila na kubigha kwa ukudeng'elela, wang'ali wotowa pfigoma na pfing'weng'we. 7 Hawang'ali wobigha, wemba kwa kwidikila,

"Sauli kakoma wanu maelufu,

na Daudi kakoma wanu makumi elufu."

8 Sauli kona maya sideke, kwaapfila pfawang'ali wakwimba kwa ukwidikila, apfo ukwimba ako kumdesa ghendo. Kalonga, "Wamwing'a Daudi wanu makumi elufu, lekeni nene wangaya iwanu elufu. Lelo ng'ambe ufalume yeng'ighwe Daudi." 9 Kulawa litsuwa alyo, Sauli ng'amwonile keli baye Daudi ka munu yanoghile.

10 Ilupfi yake, muhe yehile iyatumighwe na Imulungu, kamwingila Sauli kwa ngupfu, yang'ali yolonga chaka ka mkalukwale ukaye yake. Daudi yeye yang'ali yotowa iching'weng'we ka pfayetendagha. Naye Sauli tsakakinda mgoha mna ghumoko ghwake, 11 kamwasila Daudi ghumgoha agho mala mbili kwaapfila tsakelongela, "Nitsomhoma Daudi kwa ghumghoha mbaka yananahile mbanda." Lekeni Daudi tsakahepa mala tsose atso mbili.

12 Sauli kampfuka Daudi kwaapfila IMNDEWA tsakahamwe naye, Lekeni tsakamleka Sauli. 13 Apfo Sauli kamleka yoke kulawa hana yeye kwa kamsaghula yawe mkulu iyolongotsa maasikali elufu imwe. Naye Daudi kawalongotsa pfinoghile mng'ondo. 14 Chila chinu chayatendile Daudi, katenda pfinoghile kwaapfila Imulungu tsakahamwe naye. 15 Sauli hayamwonile Daudi kotenda pfinoghile mna chila chinu yang'ali yompfuka. 16 Lekeni iwanu wose wa Isiraeli na Yuda tsawamkunda Daudi, kwaapfila tsakawalongotsa pfinoghile kung'ondo.

17 Sauli kamlongela Daudi, "Ayuno Merabu, mwanangu pinga mkulu, nitsokwing'a umkwele kwa laghitso alino, ka kwitsetowa kwa ngupfu tsako tsose na witowe ng'ondo tsa IMNDEWA." Kwapfila Sauli tsakelongela mmoyo mwake, "Sitsomwinulila baye ghumoko ghwangu, leka Wafilisti watende apfo."

18 Daudi kamlongela Sauli, "Angu nene nili nani ghendo mbaka nimkwele neghe imfalume? Lukolo lwangu na hata ikaye ya aba wangu ng'awomanyika baye mna Isiraeli." 19 Lekeni ghamatsuwa haghapfikile kwa Sauli ukumlapfa imwanaghe Merabu yakwelighwe na Daudi, Sauli ng'amlapfile baye yakwelighwe na Daudi, ila tsakamlapfa yakwelighwe na Adirieli imunu wa ghumji ghwa Mehola.

20 Naye Mikali neghe Sauli kamkunda Daudi. Sauli hayahulike apfo kadeng'elela ng'ani. 21 Sauli tsakelongela, "Leka yamkwele ayuno ili yawe mtegho kuna yeye. Nomanya ghendo Wafilisti watsomkoma." Apfo Sauli kamlongela Daudi, "Lelo nitsakuwa aba mkwe wako keli." 22 Kuya Sauli kawalaghitsa iwatumighwa wake, "Mlonge chinyelenyele na Daudi na mumlongele, ‘Mfalume kokukunda ng'ani, hata iwatumighwa wake pfipfila wose wokukunda.’ Apfo utoghole kumkwela imwanaghe."

23 Nawo iwatumighwa awo wa Sauli wamlongela Daudi imbuli ayo hambalimbali naye kawalongela, "Nene na munu yanilihela mali na simanyike baye Apfi mwoghamba mfalume kuwa aba mkwe wangu chinu chibewe?"

24 Iwatumighwa awala wamlongela Sauli ka Daudi pfayalongile. 25 Sauli kawalongela, "Mlongeleni Daudi apfino, ‘Mfalume ng'obama mali ingi ya ukumkwela imwanaghe baye, ila kobama magopfi miya imwe gha Wafilisti, ili yoitse aghala ghehile ghawamtendele iwanu iwomwihila.’ " Apfi pfipfo Sauli pfayabamile Daudi yakomighwe na Wafilisti. 26 Awala iwatumighwa hawamlongele Daudi aghala Sauli ghayobama, Daudi tsakadeng'elela ka mfalume katsakuwa aba mkwe wake. Apfo ng'ana litsuwa lya ukukwela lipfike, 27 Daudi na iwanu wake waghenda, wawakoma Wafilisti miya mbili, kaidumla imigopfi yawo, na kaighala kwa mfalume Sauli. Daudi kaipeta yose hambele hake ili Sauli yamtogholele kuwa aba mkwe wake. Apfo Sauli kamwing'a Daudi imwanaghe Mikali yamkwele.

28 Lekeni Sauli hayatangile ka IMNDEWA kahamwe na Daudi, na Mikali imwanaghe tsakamkunda ng'ani Daudi, 29 Sauli tsakaghendelela kumpfuka Daudi, ghamatsuwa ghose Sauli yang'ali yomwihila Daudi.

30 Iwakulu wa ing'ondo wa Wafilisti waghendelela ukwitowa na Waisiraeli, lekeni chila hawetowile Daudi tsakahuma kubita wakulu wangi wa Sauli, apfo taghwa lyake Daudi tsalimanyika ghendo.