1 Nemitondotondo, Yoshua na Waisiraeli wose walawa Shitimu. Hawaghupfikile ghumto Yoridani, weka tsindalo tsawo na wakala baho aku wobetetsa kuloka. 2 Matsuwa madatu haghamalile, pfilongotsi wabita mna tsindalo, 3 wawalongela iwanu, "Hamtsolyona Lisanduku lya laghano lya IMNDEWA Imulungu wenu lidutighwa na iwatambika Walawi, mtsolawa aho hamli na kuliwinza. 4 Apfi pfipfo pfamtsoimanya inzila yachi ya ukubita, kwaapfila ng'ana mwang'e baye inzila aino. Lekeni mleke kulisoghelela habehi Lisanduku alyo, kaleni kutali chidogho, ka mighulu elufu imwe apfino."

5 Yoshua kawalongela iwanu, "Mwitende mwele, kwaapfila ilupfi IMNDEWA Imulungu katsotenda pfinu pfa kukangawatsa mna mwemwe."

6 Kuya kawalongela iwatambika, "Soleni lisanduku lya laghano, mlongole nalyo hambele ha iwanu." Apfo walisola na walongola nalyo hambele ha iwanu. 7 IMNDEWA Imulungu kamlongela Yoshua, "Leloli nitsakwandusa kukutenda woneke mkulu hambele ha iwanu wose wa Isiraeli, ili wamanye ka nene nahamwe naghwe ka pfanikalile hamwe na Musa. 8 Uwalongele iwatambika awo iwoghala Lisanduku lya laghano, ‘Hamtsopfika mmbalimbali mwa ghumto Yoridani, mwime mna ghamatsi.’ " 9 Pfipfila Yoshua kawalongela Waisiraeli, "Soghelani hano habehi na mghategheletse malonga gha IMNDEWA, Imulungu wenu." 10 Yoshua kaghendelela kulonga, "Apfi pfipfo pfamtsomanya ka Imulungu iyali mghima kahamwe namwe, na yeye katsowawinga, Wakanani, Wahiti, Wahivi, Waperisi, Wagirigashi, Waamoni na Wayebusi, aku mwolola kwa nenge tsenu. 11 Mlole! Lisanduku lya laghano lya IMNDEWA wa isi yose lyolongola kuloka ghumto Yoridani. 12 Lelo msaghule wamale kumi na weli kulawa mna ghamakabila gha Isiraeli, chila kabila yalawe munu yumwe. 13 Mighulu ya iwatambika iwoduta lisanduku lya laghano lya IMNDEWA wa isi yose, haitsokanyagha ghumto Yoridani, ghamatsi ghatsoleka ukuhulumka, na aghala ighohulumka kulawa kuchanya ghatsakwima ka sughulu." 14 Apfo iwanu walawa mna tsindalo tsawo, wakaloke ghumto Yoridani, aku iwatambika iwoduta lisanduku lya laghano wawalongolela. 15 Hawapfikile iwatambika awo iwaghalile lisanduku lya laghano hana ghumto ghwa Yordani, ghumto ighumemagha ghamatsi mna ghumsimu ghwa ukupfuna, na maghulu ghawo haghakanyaghe mna ghamatsi gha ghumto aghwo, 16 baho ghamatsi ighang'ali ghohulumka kulawa uchanya, tsaghema ghawa sughulu, ghamema mbaka kuna ghumji ghwa Adamu, ighuli habehi na isi ya Seratani. Ghamatsi ighang'ali ghohulumka kughenda bahari ya Araba, pfipfila tsaikemighwa ibahari ye Munyu, tsaghanyala ghendo, na iwanu waloka kughenda Yeriko. 17 Waisiraeli hawang'ali woloka, iwatambika iwaghalile lisanduku lya laghano tsawema hanu hanyalile haghati ha ghumto Yoridani mbaka iwanu wose waloka.