1 Ghamalango gha ukwingilila Yeriko tsaghahindighwa ghendo, ili Waisiraeli waleke ukwingila. Haduhu munu yadahile kwingila mghati wala kulawa kunze. 2 Kuya IMNDEWA kamlongela Yoshua, "Ulole nikwing'a ghumji ghwa Yeriko mmoko mwako, hamwe na imfalume wake na iwaasikali wake iwana libapfu lya ukwitowa. 3 Mwemwe na iwanu wose wa ing'ondo mghutsunguluke ghumji aghuno mala lumwe chila tsuwa, na mtende apfino kwa matsuwa sita. 4 Na watambika saba chila yumwe yakinde malati ya membe ya ng'olo mmale, walilongolele lisanduku lya lilaghano. Mna litsuwa lya saba mghutsunguluke ghumji aghwo ghwa Yeriko mala saba, aku iwatambika wotowa tsimalati tsawo. 5 Hawotsotowa tsimalati tsawo kwa litsi likulu, na iwanu wose hawotsohulika wakemelele, kuya imibanda ya ghumji itsakughwa. Aho iwanu watsoghughendela ghumji aghwo, chila munu kulawa hanu hake hayemile."

6 Apfo Yoshua mwana wa Nuni kawakema iwatambika kawalongela, "Liduteni lisanduku lya lilaghano lya IMNDEWA Imulungu, na watambika saba walilongolele aku wakinda malati saba tsa membe tsa ng'olo wamale." 7 Na kawalaghitsa iwanu apfino, "Lelo mghende, mghutsunguluke ghumji, na iwanu wana tsisilaha walilongolele lisanduku lya IMNDEWA."

8 Yoshua hayamalitse ukulonga na iwanu, iwatambika iwakindile tsimalati saba tsa membe tsa ng'olo wamale wabita hambele ha IMNDEWA, walongola aku wotowa tsimalati tsawo, na lisanduku lya lilaghano lya IMNDEWA, ling'ali liwawinza kuchughu. 9 Na iwanu wana tsisilaha wawalongolela iwatambika iwang'ali wotowa tsimalati, aku iwabetetsi wangi wang'ali woliwinza lisanduku lya lilaghano kuchughu. Nawo wang'ali woghendelela kutsitowa tsimalati tsawo. 10 Yoshua kawalaghitsa iwanu kalonga, "Mleke kukemelela, wala kutowa lwangi, wala mleke kulonga chinu chochose mbaka litsuwa lyanitsowalongela, baho namwe hamtsokemelela." 11 Apfo Yoshua kawatenda iwanu waghutsunguluke ghumji mala lumwe aku woliduta lisanduku lya lilaghano lya IMNDEWA, kuya woya mna tsindalo tsawo, na wakala mumo chilo chighima. 12 Ilupfi yake nemitondotondo Yoshua kalamka na iwatambika waduta lisanduku lya lilaghano lya IMNDEWA. 13 Iwatambika awala saba iwakindile tsimalati tsa membe tsa ng'olo wamale walongola hambele ha lisanduku lya lilaghano lya IMNDEWA, aku woghendelela kutowa tsimalati tsawo. Na iwanu wana tsisilaha wawalongolela iwatambika wana tsimalati, na wamwenga tsa wa kuchughu wang'ali woliwinza lisanduku. Nawo iwatambika waghendelela kutowa tsimalati tsawo. 14 Mna litsuwa lya keli, waghutsunguluka ghumji aghwo mala lumwe, na woya mna tsindalo tsawo. Watenda pfipfo kwa matsuwa sita. 15 Na mna litsuwa lya saba, walamka lupfilipfili na waghutsunguluka ghumji ghwa Yeriko ka pfawatendagha. Lekeni mna litsuwa alyo waghutsunguluka mala saba. 16 Hawatsunguluke lwa saba, iwatambika hawatowile tsimalati tsawo, Yoshua kawalaghitsa iwanu kalonga, "Kemeleleni kwaapfila IMNDEWA kamwing'ani ghumji aghuno. 17 Na ghumji aghwo ghutsohinyighwa na chila chinu ichili mumo, kwaapfila ghulapfighwa kwa IMNDEWA. Lekeni Rahabu, ipinga ayula chiweghe mumleke mghima, na iwanu wake iwali mkaye mwake, kwaapfila tsakawapfisa iwapelembi wetu watuwatumile. 18 Lekeni mleke kusola chinu chochose ichilapfighwe kwa IMNDEWA, kwaapfila mng'achisola mtsoitenda indalo ya Waisiraeli ilighitighighwe na ighaye. 19 Lekeni ifetsa, inzahabu, ishaba, na ichuma, ipfinu apfo pfienzeluka, pfitsakwikighwa pfiwe pfa IMNDEWA." 20 Iwatambika watowa tsimalati, na iwanu hawahulike wakemelela kwa litsi likulu, imibanda ya ghumji ighwa ghendo. Bahala iwanu waghughendela ghumji aghwo, chila munu kulawa ahala hayemile, waghusola ghumji aghwo. 21 Kwa mimaghe yawo wamkoma chila munu iyali mumo, wamale, wapinga, wadodo, wabala, wang'ombe, wang'olo na pfihongwe. 22 Yoshua kawalongela iwanu awala weli iwaghendile kughupelemba ghumji aghwo kalonga, "Mghende mna ing'anda ya ipinga ayula ichiweghe, mlapfeni kunze na iwanu wake wose ka pfammwilahile." 23 Apfo iwapelembi awala iwaghendile kupelemba ghumji aghwo waghenda wamlapfa Rahabu kunze, aba wake, mai wake, na ndughu tsake wose, wawalapfa kunze iwanu wake wose, na waweka kunze habehi na indalo ya Waisiraeli.

24 Waghulakatsa na moto ghumji ghwose, na chila chinu ichili mumo, lekeni ifetsa, inzahabu, ishaba, na ipfinu pfa chuma wapfika pfiwe pfa IMNDEWA. 25 Lekeni Yoshua kamleka mghima Rahabu, ipinga ayula chiweghe na ndughu tsake wose, kwaapfila yeye tsakawapfisa iwanu weli iyawatumile Yoshua wakaghupelembe ghumji ghwa Yeriko, na ipinga ayo chiweghe kokala na Waisiraeli mbaka leloli aino. 26 Matsuwa agho Yoshua kelaha, kalonga, "Imunu wowose iyatsotsenga keli ghumji aghuno ghwa Yeriko yalighitighwe hambele ha IMNDEWA. Imunu wowose iyatsotsenga ilukwalambatsa lwa ghumji aghuno imwanaghe chaudele yafe, na ayula iyatsotsenga ghamalango gha ghumji aghuno imwanaghe mtsuwanda yafe." 27 Apfo IMNDEWA tsakakala hamwe na Yoshua, na ukumanyika kwa Yoshua tsakwenela isi yose.