1 Mfalume Adoni Sedeki wa Yerusalemu kahulika Yoshua pfayaghusolile ghumji ghwa Ai na kughuhinya ghendo na kumkoma imfalume wake, ka pfayaghuhinyile ghumji ghwa Yeriko na kumkoma imfalume wake. Pfipfila kahulika iwanu wa Gibeoni pfawekile laghano lya ukukala tseghamba na Waisiraeli, na pfawokala hamwe nawo. 2 Apfo yeye na iwanu wake wa Yerusalemu tsawengilighwa na wogha, kwaapfila Gibeoni tsaghukala mji ighumanyike mna imiji ya chifalume. Pfipfila tsaghukala mji mkulu kubita mji ghwa Ai, na iwanu wake tsawadaha kwitowa pfinoghile. 3 Apfo mfalume Adoni Sedeki wa Yerusalemu katuma nume kwa mfalume Hohamu wa Heburoni, mfalume Piramu wa Yarimuti, mfalume Yafia wa Lakishi na mfalume Debili wa Egiloni, kawalongela, 4 "Mtse mnyapfile tuwatowe Wagibeoni, kwaapfila weka laghano lya ukukala tseghamba na Yoshua na Waisiraeli." 5 Iwafalume awo watano wa Waamori: mfalume wa Yerusalemu, mfalume wa Heburoni, mfalume wa Yarimuti, mfalume wa Lakishi, na mfalume wa Egiloni, wawatinganitsa hamwe iwanu wawo wa ing'ondo, kuya wagheluka na wanu wawo wa ing'ondo mbaka Gibeoni, waghutsingila ghumji aghwo na kughutowa ghendo. 6 Wagibeoni wawatuma iwanu kwa Yoshua ako Giligali kwawekile indalo, wamlongela apfino, "Dedede Yoshua uleke kutuleka twetwe iwatumwa wako, utse sambi baha utwapfile na utukombole kwaapfila wafalume wose wa Waamori iwolawa mna isi tsa ipfidunda wawatinganitsa iwanu wawo wa ing'ondo na watsa kututowa."

7 Baho Yoshua na iwanu wake wose, na awala iwodaha kwitowa sideke woka Giligali. 8 IMNDEWA Imulungu kamlongela Yoshua, "Uleke kuwapfuka, kwaapfila nitsokwapfila kuwatowa, wala kuduhu munu wowose iyodaha kwima yetowe na ghweghwe." 9 Yoshua kanga chilo chose kulawa Giligali, kawatowa kwa kuwedukitsa. 10 IMNDEWA Imulungu kawaghuma wogha hambele ha Waisiraeli, Nawo wakoma iwanu wengi ako Gibeoni. Waisiraeli wawawinga, nawo watsumila kuna inzila igheluka Beti Horoni na watsuma mbaka mna ghumhulumko ghughenda nzila ya Azeka na Makeda. 11 Hawang'ali wotsuma kuwahepa Waisiraeli mna ghumhulumko ghwa Beti Horoni, IMNDEWA Imulungu kawaghalila mvula ng'ulu ya mabwe makulu kulawa kulanga iwatowele hawang'ali wamnzila. Iwanu iwafile kwa imvula ayo ya ghamabwe tsawawengi kubita awala iwakomighwe na limaghe na Waisiraeli. 12 Baho Yoshua kalonga na IMNDEWA mna litsuwa alyo IMNDEWA hayawekile Waamori mna ghamoko gha Waisiraeli, tsakalonga hambele ha iwanu wa Isiraeli,

"Ghwe litsua wime mna isi ya Gibeoni,

na mwetsi ghwime mna ulwanda wa Aiyaloni."

13 Apfo litsua tsalima na ghumwetsi tsaghwima mbaka Waisiraeli wose wawatowa awala iwowehila. Ka pfayandikighwe mna ichitabu cha Yashari.

Litsua tsalima haghatighati ha lilanga,

na ng'alighendile baye kutsama ka kwa tsua ghima. 14 Litsuwa ka alyo ng'ana lilawile baye wala kwoneka keli,

IMNDEWA Imulungu pfayamtegheletse apfo imunu. Kwaapfila IMNDEWA Imulungu imwenyegho tsakawatowela Waisiraeli. 15 Kuya Yoshua na iwanu wake woya kuna indalo ako Giligali.

16 Wafalume awano watano wa Waamori tsawatsuma, waghenda kwipfisa mna imango ya Makeda. 17 Yoshua tsakahulika ka wafalume watano woneka wepfisa mna imango ya Makeda. 18 Kalonga, "Mbimbilise mambwe makulu hana ghumlomo ghwa imango ayo, kuya mwike iwanu wabetetse. 19 Lekeni mwemwe mleke kukala aho, muwakoleletse awala iwowehila, muwatowe iwali kuchughu kwawo, mleke kuwaleka wengile mna imiji yawo, kwaapfila IMNDEWA Imulungu wenu katsomwapfilani ukuwakoma." 20 Apfo Yoshua na Waisiraeli wawakoma ghendo iwanu wose, na awala chidogho iwatsumile mna imiji yawo itsungulusighwe ubanda tsawahona. 21 Apfo iwanu wose wa ing'ondo woya tseghamba kwa Yoshua ako Makeda kuna indalo. Na kuduhu munu iyaghetsile kulonga chinu chochose ichihile kwa Waisiraeli. 22 Kuya Yoshua kalonga, "Mpfughule ghumlomo ghwa imango, na mngalile wafalume awo watano." 23 Imango ipfughulighwa, wamghalila Yoshua wafalume awo watano: mfalume wa Yerusalemu, mfalume wa Heburoni, mfalume wa Yamuti, mfalume wa Lakishi na mfalume wa Egiloni. 24 Na hawamghalile iwafalume awo, Yoshua kawakema Waisiraeli wose na wakulu wose wa ing'ondo iwelongotse naye, kawalongela, "Mseghele ahano na mwike maghulu ghenu msingo mwa iwafalume awano." Nawo iwakulu wa ing'ondo waseghela na wawabajugha msingo. 25 Yoshua kawalongela, "Mleke kupfuka, wala kutenyuka, na mghangamale, kwaapfila apfi pfipfo IMNDEWA pfayatsowatenda awala wose iwowehila hamtsetowa nawo." 26 Kuya Yoshua kawakoma na kawakondeka mna mibiki mitano, na wang'ali wolebela mna imibiki ayo mbaka nemihe. 27 Litsua haliswele, Yoshua kalaghitsa wahulumsighwe mchanya mwa imibiki, na wawasa mna imango iwakalile wepfisa, na hana ghumlomo ghwa imango weka mabwe makulu, na ghamabwe agho ghabaho mbaka leloli aino.

28 Litsua alyo Yoshua hayaghusolile ghumji ghwa Makeda, tsakamkoma mfalume wake na chila munu iyakalile mumo, ng'alekile munu baye, kamtendela mfalume wa Makeda ka pfayamtendele imfalume wa Yeriko. 29 Kuya Yoshua na Waisiraeli wose walawa Makeda na waghenda kuna ghumji ghwa Libina na waghutowa. 30 IMNDEWA kaweng'a ghumji aghwo na imfalume wake mna ghamoko gha Waisiraeli, wawakoma iwanu wose na ng'awalekile baye munu wowose. Wamtendela mfalume wa Libina ka pfawamtendele mfalume wa Yeriko. 31 Kuya Yoshua na Waisiraeli wose walawa Libina waghenda Lakishi, waghutsunguluka na waghutowa. 32 IMNDEWA kaweng'a ghumji aghwo mna ghamoko gha Waisiraeli, na Yoshua kaghusola ghumji agho mna litsua lya keli, kawakoma iwanu wose ka pfayatendile akula Libina. 33 Baho, mfalume Horamu wa Gezeri tsakatsa kuwapfila iwanu wa Lakishi, lekeni Yoshua kamtowa yeye na iwanu wake, na ng'alekile munu wowose baye. 34 Kuya Yoshua na Waisiraeli wose walawa Lakishi waghenda Egiloni, waghutsunguluka na waghutowa. 35 Waghusola mna litsua lilyo, na kuwakoma iwanu wake wose ka pfayatendile akula Lakishi. 36 Kuya Yoshua na Waisiraeli wose walawa kuna ghumji ghwa Egiloni wagheluka kuna ghumji ghwa Heburoni, nawo waghutowa, 37 waghusola, na wawakoma iwanu wake wose na imfalume wake, wahinya kaye tsose itsili habehi na kukoma chila munu ka pfawatendile akula Egiloni. 38 Kuya Yoshua na Waisiraeli wose woya kuna ghumji ghwa Debili na kughutowa. 39 Waghusola ghumji aghwo, mfalume wake na miji yose ighutsunguluke, na kukoma chila munu iyakalile amwo, ng'awalekile munu baye. Waghutendela ghumji aghwo ghwa Debili na mfalume wake ka pfawatendile akula Heburoni na Libina na wafalume wawo. 40 Apfo Yoshua kasola isi yose, kawatowa wafalume wose wa isi tsa ipfidunda, Negebu, mna ipfiwala, na mna imihulumko na wafalume wawo wose, ng'alekile chinu chochose baye china ughima, kakoma wose ka IMNDEWA Imulungu wa Isiraeli pfayamlaghitse. 41 Yoshua kawatowa mala lumwe iwanu wose kulawa Kadeshi Barinea mbaka Gaza na kulawa Gosheni mbaka Gibeoni. 42 Yoshua kawatowa wafalume awano wose na isi tsawo, kwaapfila IMNDEWA, Imulungu wa Isiraeli tsakawapfila Waisiraeli. 43 Kuya Yoshua koya na Waisiraeli wose ako Giligali kwawalongole kukala.