1 Mfalume Yabini wa ghumji ghwa Hazori hayahulike apfo, katuma wanu waghende kwa mfalume Yobabu wa isi ya Madoni, na kwa mfalume wa ghumji ghwa Shimroni na ghumji ghwa Akishafi, 2 na kwa wafalume iwakalile mna ipfindunda pfa kasikazini, na Araba ubali wa kusini mwa Kinereti, na mna ichiwala cha Nafati Dori iili ubali wa maghalibi. 3 Pfipfila katuma kwa Wakanaani iwakalile ubali wa maghalibi, na kwa Waamori, Wahiti, Waperizi, Wayebusi iwakalile kupfidunda, na Wahivi iwakalile kuhisi mwa chidunda Herimoni ili mna isi ya Misipa. 4 Apfo, watsa na iwanu wawo wose wa ing'ondo, tsawawengi ka msanga ighuli kumwani, tsawatsa na mituka mingi ikweghighwa na falasi, na tsawatsa na falasi wengi. 5 Wafalume awano wose, na iwanu wawo tsawetingana hamwe na weka indalo yawo hana imbwibwi ya Meromu, wetowe na Waisiraeli.

6 IMNDEWA kamlongela Yoshua, "Uleke kuwapfuka, ilupfi masaa ka aghano nitsowakoma na kukwing'a mmoko mwako, mtsowaghana iminyughe ye imighulu wafalasi wawo na mtsolakatsa imituka yawo." 7 Apfo Yoshua na iwanu wake wose wa ing'ondo waghenda kwa kuwedukitsa na kuwatowa hane imbibwi ya Meromu. 8 IMNDEWA kaweka mna ghamwoko gha Waisiraeli, nawo wawatowa wawawinga na watsumila nzila ighenda Sidoni Ng'ulu na Misirefoti Maimu, mbaka kupfikila ulwanda lwa Misipa ubali wa mashariki, na kuduhu munu iyalekighwe mghima. 9 Yoshua kawatendela ka IMNDEWA pfayamlongele, kawaghana iminyughe mna imighulu wafalasi wawo na kailakatsa imituka yawo ikweghighwa na wafalasi. 10 Yoshua hayang'ali yakuya, kaghusola ghumji ghwa Hazori, kamkoma imfalume wake, kwaapfila ghumji ghwa Hazori aho ghumwande tsa ghugho ghumji mkulu ghwa tsifalume atso tsose. 11 Wamkoma chila munu iyakalile mumo, kuduhu munu iyakalile mghima, na waghulakatsa ghumji agh ghwa Hazori. 12 Pfipfila Yoshua kaisola imiji yose aila iyaighoghile, na kawakoma wafalume wake wose, ka Musa imtumwa wa IMNDEWA pfayamlaghitse. 13 Waisiraeli ng'awailakatse baye imiji ikalile mpfidunda pfa ghamahame ghawo, ila ghumji ghwa Hazori ghuliyeka ghugho ghwayalakatse Yoshua. 14 Waisiraeli wesolela wenyegho chila chinu, na iwanyama iwakalile mna imiji ayo. Lekeni wawakoma iwanu wose iwakalile mumo, ng'awamlekile baye munu wowose yawe mghima. 15 Ka IMNDEWA pfayamlaghitse imtumighwa wake Musa, pfipfo Musa naye kamlaghitsa Yoshua, Yoshua naye katenda pfipfo ka pfayalaghitsighwe. Katenda chila chinu ka IMNDEWA pfayamlaghitse Musa.

16 Apfo Yoshua kaisola isi yose, isi ya ipfidunda, isi ya Negebu, isi yose ya Gosheni, isi ya Shefala, na pfidunda pfa Isiraeli na isi tsake tsili mpfiwala. 17 Kulawa chidunda cha Halaki, ichighenda Seiri, mbaka Baali Gadi mna ulwanda wa Lebanoni hasi ha chidunda cha Herimoni, kawaghogha wafalume wose, kawatowa na kuwakoma. 18 Yoshua tsaketowa na wafalume awano wose kwa matsuwa mengi. 19 Kuduhu mji ghoghose ghungi ghwikile laghano lya ukukala tseghamba na Waisiraeli ila awala Wahivi iwokala Gibeoni, aghwo ng'awaghutowile baye. Lekeni imiji ingi yose tsawaisola kwa ukwitowa. 20 IMNDEWA mwenyegho yuyo yawatendile wawe wasughu wetowe na Waisiraeli, tsakabama waleke kwonelighwa libatsi ila wakomighwe ghendo. Apfo pfipfo IMNDEWA pfayamlaghitse Musa. 21 Matsuwa agho Yoshua kaghenda kuwatowa Waanaki iwang'ali wokala mna pfidunda pfa Heburoni, Debili na Anabu, kulawa isi yose ya ipfidunda pfa Yuda, na kulawa isi yose ya ipfidunda ya Isiraeli. Yoshua kawatowa na kuihinya imiji yawo. 22 Tsakuduhu Waanaki iwakalile mna isi ya Waisiraeli, ila tsawasighala chidogho mna isi ya Gaza na Ashidodi. 23 Apfo Yoshua kasola isi yose ka IMNDEWA pfayamlaghitse Musa, na kaweng'a isi ayo Waisiraeli iwe yawo, kuya kaighola isi ayo kwa chila kabila.

Apfo iwanu iwali muisi wakala bila ukwitowa.