1 Kuya Musa kawakema pfilongotsi wa makabila gha Isiraeli kawalongela, IMNDEWA katulaghitsa apfino. 2 Imunu yang'elaha kumtendela IMNDEWA chinu au yang'elighita na keyoha yeye mwenyegho kwa achila chayalongile kotenda, yatende pfipfila ka pfayalongile kulawa mna mlomo wake.

3 Ipinga iyokala mng'anda mwa aba wake, ayula ng'ana yakwelighwe baye, yang'elaghana ne Imulungu ka katsomtendela chinu au yang'elighita, kobamighwa yatende achila chayelaghane. 4 Na aba wake yang'uhulika chayelaghane ne Imulungu na ukwilighita kwake, naye ng'omghoma baye, aho achila chayalaghane chitsomoha na ukwilighita kwake kutsomoha. 5 Lekeni ka aba wake katsohulika na kumghoma achila chayelaghane ne Imulungu, aho ng'achitsomoha baye. IMNDEWA katsomleghusila litotso lyake kwaapfila aba wake kamlemela ukwilighita na ukwilaghana. 6 Lekeni ka kakwelighwa na mulume aku ma kelaghana ne Imulungu na ukwilighita, au kalonga bila ukwalangula ghoya, na kwiyoha imwenyegho, 7 na mulume wake yang'ahulika, naye ng'omghoma baye, aho chayelaghane na chayelighite chitsomoha. 8 Lekeni ka mulume wake komlemela mna tsuwa alyo hayahulike, ipinga ayo ng'obamighwa baye kutenda achila chayelighite na chayelaghane ne Imulungu, na IMNDEWA komleghusila totso lyake. 9 Lekeni ka ipinga ka chitsuka au kalekighwa na immale wake, kobamighwa yatende chila chinu chayelaghane na chayelighite. 10 Lekeni ka ipinga iyakwelighwe keka laghano lyake au kelighita hayali kokala ukaye kwa imlume wake, 11 na imlume wake kamuhulika, naye ng'amlongele chinu chochose baye, wala ng'amghomile baye, aho laghano lyayekile lyakuwa pfipfo na achila chayelighite chakuwa pfipfo. 12 Lekeni ka imlume wake kohulika naye ng'obama baye ipinga wake yatende apfo, na komghoma, ipinga ayo yaleke kutenda achila chayelaghane, na Imulungu katsomleghusila litotso lyake. 13 Imulume kodaha kumleka ipinga wake yatende achila chayelaghane na chayelighite, au kodaha kumghoma ipinga wake yaleke kuchitenda achila chayelaghane na chayelighte. 14 Lekeni ka imlume wake ng'olonga chinu chochose baye kulawa tsuwa lila lyayohulika laghano lyayekile pinga wake au ukwilighita kwake, aho immale katoghola ipinga wake kutenda achila chayelaghane na chayelighite, kwaapfila ng'amghomile baye. 15 Lekeni ka mulume wake tsakenyamala ahala hayahulike, kuya ghang'abita matsuwa chidogho komghoma, imulume ayo katsosola totso lye ipinga wake. 16 Aghano ghagho ghamalaghitso gha IMNDEWA ghayamwing'ile Musa ghawalongotse mulume ne pinga, na ghawalongotse aba ne mwana ipinga yang'ana yakwelighwe, iyokala ukaye kwa aba wake.