1 IMNDEWA kamlongela Musa, 2 Uwalaghitse Waisiraeli pfino na kuwalongela, Mwemwe mtsondapfila mna chipindi ichibamighwa ipfijo ipfilapfighwa pfilakatsighwe mmoto, apfila ipfininung'ila ghoya nene Imulungu. 3 Uwalongele wandapfile nambiko tsino itsilakatsighwa kwa ghumoto, wana ng'olo weli wamale wane ghumwaka ghumwe, iwenelele, awo watsakuwa nambiko ilapfighwa chila tsuwa. 4 Ng'olo yumwe kutsomlapfa nemitondo, na yungi kutsomlapfa nemihe. 5 Chila yumwe katsolapfighwa hamwe ne nambiko ya usaghe, iwe kimbo limwe lya usaghe iuhanganyike na kimbo limwe lya ghamapfuta gha tseituni ikamighwe. 6 Inambiko ino itsolapfighwa chila tsuwa, nayo itsolakatsighwa ghendo mmoto, tsayanza kulapfighwa akula kuchidunda Sinai, iwe nambiko ye chijo, iwe ya kumnung'ila ghoya IMNDEWA. 7 Pfipfila mlapfe kimbo limwe lya dipfai liwe nambiko ya chokunwa ahala hamumlapfa mwana we ng'olo yumwe, Muighide inambiko ino ye mbwali Hanu Henzeluke ghendo. 8 Na nemihe kutsomlapfa mwana we ng'olo yungi yalakatsighwe mmoto, hamwe na nambiko tsila tse usaghe na ila ye chokunwa ka pfamtendile nemitondo, hatsilakatsighwa tsoninung'ila ghoya nene IMNDEWA.

9 Mna tsuwa lya sabato, mghale iwang'olo weli wamale, wane ghumwaka ghumwe na iwenelele, hamwe na nambiko ye pfijo, ya makimbo meli gha usaghe utighinike ghendo na iuhanganyighwe na ghamapfuta, na nambiko yake yo chokunwa. 10 Inambiko ino itsolapfighwa ilakatsighwe chila haipfika Sabato, bila kuleka kulapfa tsinambiko tsila tse wana weng'olo tsitsolapfighwa chila tsuwa hamwe ne nambiko ila ye chokunwa.

11 Chila haghukwanza ghumwetsi, mtsomlapfila IMNDEWA nambiko ya kulakatsighwa mmoto, mtsomlapfila ng'ombe weli wamale, wawe wadowado, na ng'olo yumwe mmale, na wana wamale we ng'olo saba, wawe na ghumwaka ghumwe, na wenelele. 12 Mtsolapfa nambiko ya usaghe utighinike ghendo, uwe makimbo madatu ihunganyighwe na ghamapfuta kwa chila hamumlapfa ing'ombe yumwe mmale yalakatsighwe. Na mtsolapfa makimbo meli gha usaghe ihunganyighwe na ghamapfuta kwa chila hayolapfighwa ng'olo yumwe mmale. 13 Na kimbo limwe lya usaghe ihunganyighwe na ghamapfuta kwa chila hayolapfighwa mwana we ng'olo. Tsinambiko tsino hatsilakatsighwa, tsoninung'ila ghoya IMNDEWA. 14 Nambiko ya chokunwa iwe makimbo meli ghe dipfai kwa chila ng'ombe mmale na kimbo limwe na nusu kwa chila ng'olo yumwe mmale na kimbo limwe kwa chila mwana we ng'olo. Aino nambiko ya kulakatsighwa iilapfighwa chila haghukwanza ghumwetsi mna ghumwaka ghwose. 15 Kuya mtsomlapfila IMNDEWA mvulati yumwe, yawe nambiko ya kuleghusa nzambi, bila kwisemwa kulapfa inambiko ila ilapfighwa chila tsuwa ilakatsighwe hamwe na nambiko yake ya chokunwa.

16 Kuya tsuwa lya kumi na nne mna ghumwetsi ghwa mwanduso, itsakuwa Pasaka. 17 Na Tsuwa lya kumi na tano lya ghumwetsi aghwo, litsakuwa chihungo. Mtsakuja pfighate ipfilihela ihamila kwa ghamatsuwa saba. 18 Na mna tsuwa lya mwanduso lye chihungo mtsakuwa na mtingano mwenzeluka mnitambikile. Mleke kusang'ana mna litsuwa alyo. 19 Mtsomlapfila IMNDEWA wang'ombe weli wamale, wawe wadowado, ng'olo yumwe mmale, na wana we ng'olo saba wamale, wane ghumwaka ghumwe, na wose wenelele. 20 Chila ng'ombe yumwe ulapfe hamwe na nambiko ya usaghe ya makimbo madatu iutighinike ghendo na iuhanganyighwe na ghamapfuta chila ng'olo yumwe mmale na makimbo meli chila haulapfa imwana yumwe we ng'olo, 21 na kwa chila mwana we ng'olo wa awala saba ulapfe kimbo limwe lya usaghe. 22 Pfipfila mlapfe imene yumwe mmale yawe nambiko ya kuwaleghusila nzambi tsenu ili kutenda ulamlitsi. 23 Mtsilapfe nambiko tsino bila kuleka inambiko yamlapfa chila litsuwa nemitondo. 24 Pfipfila mtsolapfa usaghe uwe nambiko ya kulakatsighwa mna ghamatsuwa agho ghose saba, umnung'ile IMNDEWA ghoya. Mtsolapfa nambiko ino bila kuleka inambiko yamlapfa chila tsuwa na ila ya chokunwa. 25 Na mna tsuwa lya saba mtsakuwa na mtingano mwenzeluka mnitambikile, na mleke kusang'ana ng'onde yoyose.

26 Mna litsuwa lya mwanduso lya chihungo cha mapfuno, mtsolapfila IMNDEWA ipfijo pfamwanzile kulimbula, mwobamighwa mwike mtingano mwenzeluka mnitambikile. Mleke kusang'ana ng'onde yoyose. 27 Mndapfile iwana weli we ng'ombe, ing'olo yumwe mmale, na wana we ng'olo saba, wawe wamale na wane ghumwaka ghumwe, wenelele, wawe nambiko ya kulakatsighwa, na hawolakatsighwa waninung'ile ghoya nene Imtwatsa. 28 Pfipfila ulapfe hamwe na nambiko ya usaghe utighinike na une ghamapfuta, ulapfe makimbo madatu gha usaghe kwa chila ng'ombe yumwe, makimbo meli kwa chila ng'olo yumwe, 29 na kimbo limwe kwa chila mwana we ng'olo ili kuwatendela ulamlitsi. 30 Pfipfila mlapfe mvulati yumwe yawe nambiko ya kuwaleghusila nzambi tsenu. 31 Mtsolapfa nambiko tsino tsilakatsighwe bila kuleka inambiko ila ilapfighwa chila tsuwa, hamwe na nambiko yake ya chokunwa.