1 Mna tsuwa lya kwanza lya ghumwetsi ghwa saba, mwitingane hamwe mnitambikile, mleke kusang'ana ng'onde yoyose ila. Alyo tsuwa lya kutowa tsimati. 2 Mtsolapfa tsinambiko tsa kulakatsighwa, na hatsilakatsighwa tsitsoninung'ila ghoya nene IMNDEWA. Mlapfe wang'ombe weli wadowado, ng'unzu weli na iwana wamale we ng'olo saba, wane ghumwaka ghumwe, wose wenelele. 3 Pfipfila mtsolapfa nambiko ya usaghe utighinike ghendo na wikighwe ghamapfuta, mlapfe makimbo gha usaghe madatu kwa chila ng'ombe mmale, na makimbo meli kwa chila ng'unzu yumwe, 4 na kimbo limwe chila mwana we ng'olo. 5 Pfipfila mlapfe mvulati yumwe yawe nambiko ya kuwaleghusila nzambi ili kutenda ulamlitsi. 6 Mtsolapfa pfinu pfino bila kuleka tsinambiko tsamlapfagha, ka apfila nambiko ya kulakatsighwa ahala haghulawa ghumwetsi na nambiko yake ya usaghe, na nambiko ila ilapfighwa ilakatsighwe chila nemitondo na nambiko yake ya usaghe, nambiko tsake tsa chokunwa ka apfila pfailaghitsighwe. Na hatsilakatsighwa tsinambiko tsino tsomnung'ila ghoya.

7 Na mna tsuwa lya kumi lya ghumwetsi ghwa Saba, mwike ghumtingano mwenzeluka, litsuwa alyo mtsoleka ukuja na ng'amtsosang'ana baye. 8 Mtsomlapfila IMNDEWA nambiko ya kulakatsighwa, na hawolakatsighwa wamnung'ile ghoya Imulungu, mlapfe ng'ombe yumwe mmale, ng'unzu yumwe, na wana wamale we ng'olo saba, wane ghumwaka ghumwe, wose wenelele. 9 Mtsolapfa hamwe na nambiko ya usaghe, usaghe utighinike na wikighwe ghamapfuta, mlapfe makimbo madatu kwa ing'ombe ayo mmale, na makimbo meli kwa ing'unzu yula, 10 na kimbo limwe kwa chila mwana we ng'olo. 11 Pfipfila mtsolapfa mvulati yumwe yawe nambiko ya yakuleghusa nzambi.

12 Na mna tsuwa lya kumi na tano lya ghumwetsi ghwa Saba, mwike ghumtingano mwenzeluka, na mleke kusang'ana mna litsuwa alyo. Mdeng'elele chihungo chino kwe IMNDEWA kwa ghamatsuwa saba. 13 Mlapfe nambiko ya kulakatsighwa, na hawolakatsighwa wamnung'ile ghoya Imulungu, mlapfe wang'ombe wamale wadowado kumi na wadatu, na ng'unzu weli, na iwana we ng'olo wamale kumi na wane, wane ghumwaka ghumwe. Wose wenelele. 14 Pfipfila ulapfe nambiko ya usaghe utighinike na wikighwe ghamapfuta, ulapfe makimbo madatu kwa chila ng'ombe mmale, na makimbo meli kwa chila ng'unzu, 15 na kimbo limwe kwa chila mwana we ng'olo. 16 Pfipfila mtsolapfa mvulati yumwe yawe nambiko ya kuleghusa nzambi bila kuleka inambiko ila ilapfighwa ilakatsighwe chila tsuwa na nambiko ya usaghe na ila ya chokunwa. 17 Mna tsuwa lyakeli mtsolapfa iwang'ombe wamale kumi na weli, na ng'unzu weli na iwana we ng'olo wamale kumi na wane, wane ghumwaka ghumwe. Wose wenelele. 18 Pfipfila mlapfe nambiko ya usaghe na nambiko tsa chokunwa hamwe na awala wang'ombe, wang'unzu na wana we ng'olo, kwa kulola wali wangapi ka apfila pfailaghitsighwe. 19 Pfipfila mtsolapfa mvulati yumwe yawe nambiko ya kuleghusa nzambi bila kuleka inambiko ilapfighwa ilakatsighwe chila tsuwa na nambiko ya usaghe na ila ya chokunwa. 20 Tsuwa lya kadatu mtsolapfa ng'ombe wamale kumi na yumwe, ng'unzu weli, na wana wamale we ng'olo kumi na wane, wane ghumwaka ghumwe. Wose wenelele. 21 Mtsowalapfa hamwe na nambiko tsa usaghe hamwe na nambiko tsa chokunwa kwa kulola wali wangapi ka apfila pfailaghitsighwe. 22 Pfipfila mtsolapfa mvulati yumwe yawe nambiko yakuleghusa nzambi bila kuleka inambiko ilapfighwa ilakatsighwe chila tsuwa na nambiko ya usaghe na ila ya chokunwa. 23 Tsuwa lya kane mtsolapfa wang'ombe wamale kumi, na ng'unzu weli, na wana wamale we ng'olo kumi na wane, wane ghumwaka ghumwe, wose wenele. 24 Mtsowalapfa hamwe na nambiko tsa usaghe hamwe na nambiko tsa tsokunwa kwa kulola wali wangapi ka apfila pfailaghitsighwe. 25 Pfipfila mtsolapfa mvulati yumwe yawe nambiko yakuleghusa nzambi kubita inambiko ilapfighwa ilakatsighwe chila tsuwa na nambiko ya usaghe na ila ya chokunwa. 26 Mna tsuwa lya tano mtsolapfa wang'ombe tisa, ng'unzu weli, na wana wamale we ng'olo kumi na wane, na wane ghumwaka ghumwe, na wose wenelele. 27 Mtsowalapfa hamwe nambiko tso usaghe na hamwe nambiko tsokunwa kwa kulola wali wangapi ka apfila pfailaghitsighwe. 28 Pfipfila mtsolapfa mvulati yumwe yawe nambiko ya kuleghusa nzambi bila kuleka inambiko ilapfighwa ilakatsighwe chila tsuwa na nambiko ya usaghe na ila ya chokunwa. 29 Mna tsuwa lya sita mtsolapfa wang'ombe wanane, ng'unzu weli na wana wamale we ng'olo kumi na wane, wane ghumwaka ghumwe. Na iwenelele. 30 Mtsowalapfa hamwe na nambiko tsa usaghe hamwe na nambiko tsokunwa kwa kulola wali wangapi ka apfila pfailaghitsighwe. 31 Pfipfila mtsolapfa mvulati yumwe yawe nambiko yakuleghusa nzambi bila kuleka inambiko ilapfighwa ilakatsighwe chila tsuwa na namabiko ya usaghe na ila ya chokunwa.

32 Mna tsuwa lya saba mtsolapfa wang'ombe saba, na ng'unzu wadatu, na iwana wamale we ng'olo kumi na wane, wane ghumwaka ghumwe. Wose wenelele. 33 Mtsowalapfa hamwe na nambiko tsa usaghe na hamwe na nambiko tso kunwa kwa kulola wali wangapi ka apfila pfailaghitsighwe. 34 Pfipfila mtsolapfa mvulati yumwe yawe nambiko ya kuleghusa nzambi bila kuleka inambiko ilapfighwa ilakatsighwe chila tsuwa na nambiko ya usaghe na ila ya chokunwa.

35 Mna tsuwa lya nane mwike mtingano mwenzeluka, mnitambikile na mleke kusang'ana ng'onde yoyose. 36 Pfipfila mtsolapfa nambiko ya kulakatsighwa, nayo hailakatsighwa ininung'ile ghoya nene IMNDEWA. Mlapfe ing'ombe mmale yumwe, ng'unzu yumwe, wana we ng'olo wa mwaka ghumwe saba iwenelele. 37 Mtsolapfa na nambiko yo usaghe hamwe na nambiko ya chokunwa, kwa ayula ing'ombe mmale, na kwa ng'olo yumwe na kwa awala iwana we ng'olo saba, kwa kulola wali wangapi ka pfailaghitsighwe. 38 Pfipfila mtsolapfa mvulati yumwe yawe nambiko ya kuleghusa nzambi bila kwisemwa kulapfa nambiko ila ya kulakatsighwa chila litsuwa, na inambiko ila ya usaghe, na inambiko ya chokunwa.

39 Aghano ghagho ghamalaghitso gha nambiko gha chila chihungo ka pfailaghitsighwe, bila kuleka tsinambiko tsa kulakatsighwa, nambiko tsa usaghe, tsinambiko tsenu tsa ukwika natsili, tsinambiko tsokubama mwenyegho, na atsila tsa chokunwa na atsila tsa kukala tseghemba. 40 Apfo Musa kawalongela iwanu wa Isiraeli chila chinu IMNDEWA chayamlaghitse.