1 Waisiraeli wanza keli ghumwanza ghwao, na waghenda kwika indalo yawo mna chiwala cha Moabu, kumwambu kwa Yolidani habehi na Yeriko. 2 Na mfalume Balaki mwana wa Sipoli, tsakamanya ghose Waisiraeli ghawawatendele Waamoli. 3 Yeye hamwe na Wamoabu wose tsawawapfuka sideke Waisiraeli. Tsawawapfuka kwaapfila tsawawengi ng'ani. 4 Apfo Wamoabu wawalongela pfilongotsi wa Midiani, "Makingili ghano ghe wanu sambi baha ghatsohinya chila chinu ichitutsunguluka ka apfila ing'ombe mmale pfayakuja imitsani mna ghumghunda." Balaki mwana wa Sipoli, tsakakala yuyo imfalume wa Moabu matsuwa agho, 5 katuma wanu waghende kwa Balamu, mwana wa Beori ako Petoli, habehi na ghumto ghwa Efulati ighuli mna isi ya Amawi. Kamlongela Balamu pfino, "Kuna wanu walawa Misiri, na wenela chila hanu muisi, na wosoghela watse wasole isi yangu. 6 Lelo utse, undighitile wanu wano, kwaapfila wao wana ngupfu kubita nene, songaha nodaha kuwatowa na kuwawinga woke muisi. Nene nomanya ghweghe haumotetsa iwanu, nawo womotetsighwa na haulighita iwanu, nawo wolighitighwa." 7 Apfo pfilongotsi wa Moabu na Midiani woka waghenda kwa Balamu, aku wasola tsisendi tso kumliha yawalaghulile. Wapfika na wamlongela chayolonga Balaki. 8 Balamu kawalongela, "Chilo chino muwase kuno, na nene nitsowalongela chayatsonongela IMNDEWA." Apfo pfilongotsi awo wa Moabu wakala na Balamu. 9 Kuya Imulungu kamghendela Balamu, kamghutsa, "Awano waukala nawo tsina nani?" 10 Balamu kamwidika Imulungu, kalonga, "Balaki mwana wa Sipoli katuma wanu watse wanongele pfino, 11 ‘Kuna wanu wengi walawa Misiri, nawo wenela chila hanu muisi. Lelo nokulomba, utse uwalighite iwanu awo songaha nodaha kwitowa nawo na kuwawinga.’" 12 Imulungu kamlongela Balamu, "Uleke kughenda nawo iwanu wano, na uleke kuwalighita iwanu awo kwaapfila awo wamotetsighwa." 13 Apfo nemitondo Balamu koka, kawalongela pfilongotsi wa Balaki, "Muye mna isi yenu, kwaapfila Imulungu kalema kunileka nighende na mwemwe." 14 Pfilongotsi wa Moabu woka, nawo woya kwa Balaki, wamlongela, "Balamu kalema kutsa na twetwe."

15 Kuya Balaki katuma pfilongotsi wangi, nawo tsawengi ng'ani, na tsawana ukulu kubita awala wa mwanduso. 16 Nawo tsawapfika kwa Balamu, wamlongela, "Balaki mwana Sipoli kolonga pfino, ‘Chinu chochose chileke kukutenda uleke kutsa kuna nene,’ 17 Nitsokutenda utunyighwe, na chochose chaunilomba nitsotenda, lelo utse undighitile iwanu wano." 18 Lekeni Balamu kawedika iwatumighwa wa Balaki, "Hata ka Balaki katsongaya ing'anda yake imema fetsa na nzahabu, nene sitenda chinu chochose baye kubita achila chayandaghitse IMNDEWA, Imulungu wangu, sihungutsa baye wala sikongetsa baye. 19 Namwe mkale hano chilo chino, songaha nodaha kumanya IMNDEWA yonongela choni keli." 20 Apfo Imulungu kamtsila Balamu chilo chicho, kamlongela, "Kwaapfila iwanu wano watsa kukukema, ghenda nawo, lekeni utende achila chanikulongela."

21 Balamu kalamka nemitondo, keka chinu cho kukalila mchanya mwe ichihongwe wake, kadina, na kaghenda na pfilongotsi awo wa Moabu. 22 Imulungu tsakona maya kwaapfila Balamu katoghola kaghenda, apfo imalaika we Imulungu tsaketingana naye mnzila. Lelo Balamu tsakadina mna ichihongwe wake, naye tsakelongotsa na iwatumwa wake weli. 23 Apfo ichihongwe yula tsakamwona imalaika we IMNDEWA kema mnzila aku kakinda limaghe lisomwolighwe mna iyala, ichihongwe kabaghuka, kaghenda mmbalimbali mwe nzila. Balamu kamlapula ichihongwe ayo yoye mnzila. 24 Kuya imalaika we IMNDEWA tsakalongola hambele, tsakema hanu hasisili he nzila, mna imighunda ya minzabibu, na chila ubali tsakuna ngema. 25 Ichihongwe hayamwonile Imalaika ayo we IMNDEWA, kekunughitsa kune ingema, na kaghubanaghitsa mghulu ghwa Balamu mna ingema. Balamu kamlapula keli ichihongwe. 26 Kuya Imalaika we IMNDEWA kalongola keli hambele, kema hanu hasisili ng'ani he nzila, na tsahaduhu hanu ha kubaghukila kujilo wala kumoso. 27 Ichihongwe hayamwonile imalaika ayo, kafughama. Balamu kona maya kamlapula ichihongwe ayo na ing'weku yake. 28 Baho IMNDEWA katenda lidomo lye wa ichihongwe ayo lilonge, kamlongela Balamu, "Chanikutendile choni mbaka unilapule mala ndatu?" 29 Balamu kamlongela ichihongwe, "Ghweghwe kunibetsa, ka ning'awile na limaghe ning'akukomile sambi baha." 30 Ichihongwe kamwidika Balamu, "Angu nene si chihongwe wako baye? Naghwe kunidina ughima wako wose mbaka leloli, pfii tsa ma nikutendela chinu ka achino?" Balamu kedika, "Baye." 31 Baho IMNDEWA kafumbula tsinenge tsa Balamu, naye kamwona Imalaika we IMNDEWA kema mnzila, aku kakinda limaghe ilisomolighwe mna yala yake. Baho Balamu kenama ichihanga chake chidonza hasi. 32 Imalaika we IMNDEWA kamlongela Balamu, "Ebali ghweghwe umtowa ichihongwe wako mala ndatu? Nene nitsa kukughoma, kwaapfila inzila yaughenda noyona iha hambele hangu. 33 Ichihongwe wako kambona na kanihepa mala ndatu, na ka ng'abaghuke baye yakale kutali na nene, nene ning'akukomile ghweghwe na chihongwe yuno ning'amlekile mghima." 34 Balamu kamlongela imalaika we Imulungu, "Nitenda nzambi kwaapfila simanyile baye ka ghweghwe tsakwima mnzila ungome. Lelo ka ng'ubama baye nene nighende ako, nene nitsakuya ukaye yangu." 35 Lekeni Imalaika we IMNDEWA kamlongela Balamu, "Ghenda ne wanu wano, lekeni kutsolonga achila chanikulongela." Apfo Balamu kaghenda na pfilongotsi wa Balaki. 36 Balaki hayahulike ka Balamu kakutsa, kalawa kaghenda kumbokela mna ghumji ghwa Ari, ghumji ghuno tsaghukala mmbalimbali mwa ghumto ghwa Arinoni, kwaghuli mbaka ghwa Moabu. 37 Balaki kamlongela Balamu, "Ule ng'autsile baye mala lumwe ahala hanikukemile? Pfii nene sidaha baye kukutenda utunyighwe?" 38 Balamu kamlongela Balaki, "Lelo nitsa, pfii nene nodaha kulonga mbuli yoyose aila? Imbuli yoyose iyonongela Imulungu iyo yanitsolonga." 39 Balamu kaghenda hamwe na Balaki, nawo wapfika Kiriati Husoti. 40 Ako Balaki kachinja ng'ombe na ng'olo, inyama ingi kawagholela Balamu na pfilongotsi iwakalile hamwe naye.

41 Ilupfi yake, Balaki kamsola Balamu, kagheluka naye mbaka wapfika hanu hawomtambikila Baali, na kuko, Balamu tsakawona Waisiraeli wangi chila ubali.