1 IMNDEWA kamlongela Musa, 2 "Msaghule chilongotsi yumwe kulawa chila kabila mna makabila kumi na meli gha Isiraeli, na uwatume wakaipelembe isi ya Kanaani, yanitsoweng'a Waisiraeli." 3 Musa kawatuma iwanu kulawa kune nyika ya Parani ka IMNDEWA pfayamlaghitse. Iwanu iwatumighwe tsawakala pfilongotsi wa ghamakabila gha Waisiraeli. 4 Awano wawo iwanu iwatumighwe, kulawa mna kabila lya Rubeni, Shamua mwana wa Zakuri.

5 Kulawa mna kabila lya Simioni, tsakatumighwa Shafati mwana wa Hori.

6 Kulawa mna kabila lya Yuda, tsakatumighwa Kalebu mwana wa Yefune.

7 Kulawa mna kabila lya Isakari, tsakatumighwa Igali mwana wa Yosefu.

8 Kulawa mna kabila lya Efulemu, tsakatumighwa Hoshea mwana wa Nuni.

9 Kulawa mna kabila lya Benyamini, tsakatumighwa Paliti mwana wa Rafu.

10 Kulawa mna kabila lya Zebuloni, tsakatumighwa Gadieli mwana wa Sodi.

11 Kulawa mna kabila lya Manase, tsakatumighwa Gadi mwana wa Susi.

12 Kabila mna kabila lya Dani, tsakatumighwa Amieli mwana wa Gemali.

13 Kulawa mna kabila lya Asheri, tsakatumighwa Seturi mwana wa Mikaeli.

14 Kulawa mna kabila lya Nafutali, tsakatumighwa Nabi mwana wa Wofisi.

15 Kulawa mna kabila lya Gadi, tsakatumighwa Geueli mwana wa Maki.

16 Aghano ghagho mataghwa ghe iwanu iwatumighwe na Musa waghende wakaipelembe isi ya Kanaani. Musa tsakamwing'a taghwa lingi imwana wa Nuni yakemighwe Hoshea, naye tsakamkema Yoshua. 17 Hawatumile waghende kuipelemba isi ya Kanaani kawalongela, "Mghende mbaka kune isi ya ubali wa kusini wa Kanaani, kuya mkagheluke kupfidunda, 18 mkaipelembe isi pfaili. Mkalole ka iwanu iwokala amwo wana ngupfu au nyondenyonde, wengi au wadodo. 19 Mkalole ka isi ayo inogha au iha, na ka imiji yawokala ndalo, au tsing'anda tsitsungulukighwe na maboma. 20 Mkalole ka lidongo lyomela pfijo au ng'aimela pfijo, ina mihulo au yahela. Mghangamale na hamtsakuya msole ghamatunda ghe isi ayo." Mna ghumsimu agho tsinzabibu tsing'ali tsikwipfa. 21 Iwanu awo tsawaghenda kuipelemba isi kulawa nyika ya Sini mbaka Rehobu, habehi na nzila ighendile Hamati. 22 Tsawaghenda mbaka ubali wa kusini wa Kanaani, wapfosa mbaka kune ghumji ghwa Hebuloni. Amwo tsawawapfika Waahimani, Washeshai na Watalimai, watsukulu wa Anaki. Ghumji ghwa Hebuloni tsaghutsengighwa miyaka saba ng'ana ghumji ghwa Soani ighuli Misiri ghutsengighwe. 23 Hawapfikile kune luwala lwa Eshikoli, iwanu awo waghana chikungwi cha mnzabibu line ghamatunda mengi, kuya tsawalighala mnzeghamnzegha. Pfipfila tsawasola makomamanga na tini. 24 Ihanu aho tsahakemighwa luwala lwa Eshikoli mana yake chikungwi, kwaapfila chikungwi cha nzabibu tsachighanighwa ihanu aho.

25 Hawamalitse kuipelemba isi kwa matsuwa alubaini iwanu'wo tsawoya. 26 Wawaghendela Musa, Aruni na iwanu wa Isiraeli ako Kadeshi, kune nyika ya Parani, wawalongela aghala ghose ghawonile na kuwalangusa ghamatunda ghawoyile nagho. 27 Wamlongela Musa, "Tsatuipfikila iisi yaututumile tukaipelembe, isi ayo ine lidongo linogha kwa kulima na kwa kufughila na aghano matunda ghake. 28 Lekeni wenyekaye wana ngupfu sideke, ne miji yawo mikulu ng'ani na itsungulusighwa maboma. Pfipfila tsatuwona watsukulu wa Anaki watali sideke. 29 Waamaleki wokala mna isi ya ubali wa Kusini wa Kanaani. Wahiti, Wayebusi, na Waamori wokala mna isi ine pfidunda, na Wakanaani wokala habehi na bahali ya Meditelania habehi na ghumto ghwa Yoridani." 30 Lekeni Kalebu kawalongela iwanu hambele ya Musa wenyamale, kalonga, "Tukeni tukaisole isi ayo iwe yetu kwaapfila todaha ghendo kuhuma." 31 Lekeni iwanu iwaghendile hamwe naye kuipelemba isi walonga, "Ng'atutsodaha baye kwitowa ne iwanu'wo, kwaapfila wawo wana ngupfu kubita twetwe." 32 Apfo walalatsa mbuli tsihile tse isi yawaipelembe kwa Waisiraeli, walonga, "Isi ayo yowakoma iwanu. Pfipfila iwanu watuwone ako, wakulu sideke. 33 Ako twona mitsinu, watsukulu wa Anaki. Twetwe tuwenyegho tsatwibona ka pfidanukila hambele hawo, nawo pfipfila tsawatwona twetwe ka pfidanukila."