1 Iwana wa Rubeni na Gadi tsawana mifugho mingi sideke. Hawonile ka isi ya Yezeri na Gileadi inogha kwa kufughila iwanyama, 2 Tsawawaghendela Musa na mtambika Eleazari na pfilongotsi wangi we iwanu Isiraeli, wawalongela, 3 "Imiji ya Ataroti, Diboni, Yazeri, Nimra, Heshiboni, Eleale, Sebamu, Nebo na Beoni, 4 isi iyaibokile IMNDEWA iwe ya Waisiraeli inogha kwa kufughila iwanyama, natwe tuna mifugho mingi sideke. 5 Lelo ka mwotutogholela twowalomba mtwing'e isi ino iwe ulisi yetu, mleke kutulosa kumwambu kwa ghumto ghwa Yordani."

6 Musa kawedika iwanu wa Gadi na Rubeni kalonga, "Angu mwobama mkale hano aku wandughu tsenu wakuka kung'ondo? 7 Angu ng'amkona baye ka mwowakeng'ena Waisiraeli waleke kughenda kune isi yaweng'ighwe ne IMNDEWA?" 8 Apfino pfipfo pfawatendile aba tsenu ahala haniwatumile kulawa Kadeshi Barinea wakaipelembe isi. 9 Wapelembi awo tsawaghenda mbaka kune lwanda lwa Eshikoli, wayona isi, lekeni hawoyile wawatenyula Waisiraeli waleke kughenda kune isi yaweng'ile IMNDEWA. 10 Mna litsuwa alyo IMNDEWA tsakona maya kelaha, kalonga, 11 "Nelaha ghendo! ‘Haduhu hata munu yumwe yalawile misiri yane miyaka ishilini na kughendelela iyatsoyona isi yanilahile kuweng'a Abrahamu, Isaka na Yakobu, kwaapfila ng'awanihulikitse baye kwa mimoyo yao yose.’ 12 Wose ng'awatsoyona baye ila Kalebu mwana wa Yefune, wa lukolo lwa Mkenitsi, na Yushua mwana wa Nuni wawo watsoyona kwaapfila wawo wanihulikitsa kwa mimoyo yao yose. 13 Na IMNDEWA kawonela maya Waisiraeli, kawatenda wayungeyunge kunyika kwa miyaka alubaini mbaka icheleko chitendile nzambi chose chife. 14 Lelo mwemwe lweleko lwa wanu wane nzambi, mwinuka hanu ha wahenga wenu mtsa hano mumtende IMNDEWA yawonele keli maya waisiraeli, 15 na mng'alema kumuwinza IMNDEWA katsomlekeni keli kunyika, namwe mtsotenda iwanu wano wose wakomighwe."

16 Baho wamsoghelela Musa wamlongela, "Tanu utuleke tuwatsengele pfikwama wang'olo wetu ne wana wetu tuwatsengele imiji. 17 Lekeni twetwe twoghenda kwig'ondo hamwe na ndughu tsetu waisiraeli, tutsowapfila mbaka twone hanu hawotsokala. Lekeni iwana wetu watsokala mna imiji itsungulusighwe ubanda ilii iwana wetu waleke kutowighwa ne iwanu we isi ino. 18 Ng'atutsakuya ukaye baye mbaka Waisiraeli wose hawatsopata isi ya kukala. 19 Wala ng'atutsosola baye chinu chochose kulawa kuna wawo akula kumwambu kwa ghumto Yordani kwaapfila twetwe ma tupata hanu hetu akuno Mashaliki ya ghumto ghwa Yordani."

20 Musa kawalongela, "Ka aghano ghamlongile hambele he IMNDEWA mtsoghatenda, lelo soleni pfinu pfenu pfa kwitowela mke kwing'ondo. 21 Chila munu yoghenda kwitowa katsoloka ghumto Yordani aku IMNDEWA katsomlongotsa, mtsowakoma awala iwowehila mbaka Imulungu yawahume, 22 na kuisola isi iwe yenu. Hamtsomalitsa kutenda apfo, mtsakuya kwaapfila mtenda achila chamumlongele IMNDEWA na ndughu tsenu Waisiraeli. Kuya IMNDEWA katsotoghola isi ino ya ubali wa mashaliki ya Yordani iwe yenu. 23 Lekeni nowakanya ghendo, ka ng'amtendile achino chayamlongile, mtsakuwa mtenda nzambi hambele he IMNDEWA, na mtsohighighwa kwa tsinzambi tsenu. 24 Lelo watsengeleni iwana wenu imiji na wang'olo wenu muwatsengele pfikwama, kuya mtende ka pfamlongile."

25 Kuya iwanu wa Gadi na wa Rubeni wamlongela Musa, "Twetwe watumighwa wako tutsotenda ka pfautulaghitse. 26 Wapinga wetu, iwana, na mifugho yetu itsokala hano hane imiji ya Gileadi. 27 Lekeni twetwe watumighwa wako tutsoghenda kung'ondo tung'alongotsighwa ne IMNDEWA. Tutsoloka ghumto Yordani na kwitowa ng'ondo ka pfaulongile."

28 Apfo Musa kaweng'a malaghitso ghano mtambika Eleazari, Yoshua mwana wa Nuni, na pfilongotsi wose wa Waisiraeli, kalonga, 29 "Ka iwanu wa Gadi na wa Rubeni watsoloka ghumto Yordani hamwe namwe aku wakinda pfinu pfa kutowela kulongotsighwa na IMNDEWA kuya muhume na kuisola isi ayo, apfo mtsoweng'a isi ino Gileadi iwe yawo. 30 Lekeni ka ng'awotsoloka baye mna ghumto Yoridani hamwe na pfinu pfao pfa kutowela hamwe namwe mwiketowe, ng'awotsobokela baye isi ino, apfo watsoisola chidogho isi ya Kanaani ihili ubali wa kwalikuswela litsua."

31 Iwanu wa Gadi na Rubeni wedika walonga, "Twetwe watumighwa wako tutsotenda ka IMNDEWA pfayatulongele. 32 Kwa kulongotsighwa na IMNDEWA, tutsoloka hamwe na mighowa yetu mbaka Kanaani, na isi yatwing'ighwe hano mashaliki ya Yordani itsakuwa ulisi wetu." 33 Apfo Musa kaweng'a iwanu wa llikabila lya Gadi na lya Rubeni na iwanu nusu wa likabila lya Manase mwana wa Yosefu isi yose ya Sihoni, mfalume wa Waamori na isi ya mfalume Ogu wa Bashani hamwe na imiji na isi itsunguluke imiji ayo. 34 Likabila lya Rubeni tsawatsenga keli imiji ya Diboni, Ataroti, Aroeri, 35 Atiroti Shofani, Yazeri, Yogibeha, 36 Beti Nimura na Beti Harani, imiji itsungulusighwe ubanda na pfikwama pfa wang'olo. 37 Wanu wa kabila lya Rubeni tsawatsenga keli miji ya Heshiboni, Eleale, Kiriataimu, 38 Nebo na Baali Meoni, na Sibima. Imiji yawatsengile keli tsawaikema mataghwa ghangi.

39 Iwanu wa Makili iyali mwana wa Manase tsawaipfamila isi ya Gileadi, waisola na wawawinga Waamori iwang'ali wokala amwo. 40 Apfo Musa tsakaweng'a iwanu wa lweleko lwa Makiri iyali imwana wa manase isi ya Gileadi, nawo wakala mumo. 41 Wanu wa lukolo lwa Yairi iyali mwana wa Manase tsawetowa na pfijiji pfa Gileadi na kupfisola, kuya kapfing'a taghwa Hawotiyairi, mana yake Pfijiji pfa Yairi. 42 Naye Noba tsaketowa na kuisola Keneti na pfijiji pfake ipfitsunguluke, na kapfikema Noba, ka pfalili taghwa lyake.