1 Kuya Miliamu na Aruni wandusa kumlonga pfihile Musa kwaapfila tsakakwela ipinga Mkushi. 2 Walonga, "Apfi IMNDEWA kalonga na Musa yaliyeka? Pfii ng'alongile na twetwe pfipfila?" Baho IMNDEWA kahulika aghala ghawalongile. 3 Musa tsa mwenyepfale kubita iwanu wose iwakalile muisi. 4 Baho IMNDEWA kawalongela Musa, Aruni na Miliamu kwa ukwidukitsa, "Mwemwe wadatu mtse mna Lihema Lienzeluke." Apfo wose wadatu waghenda mna Lihema Lienzeluke. 5 Baho IMNDEWA kahulumka mna ngutso ya libingu, kema hane ghumlango ghwa Lihema, kawakema Aruni na Miliamu. Wose weli tsawasoghela hambele. 6 Kuya IMNDEWA kawalongela, "Mtegheletse ghanilonga, mna mwemwe ka hana nabii, nene IMNDEWA nelangusa mna ghamaono kuna yeye na nolonga naye ahala yang'awa mndoto. 7 Lekeni kwa mtumighwa wangu Musa, yeye kahake ghendo. Yeye kotogholighwa mna sang'ano yangu yose. 8 Nene nolonga naye mwatsimwatsi na simpfisa chinu baye. Yeye kombona nikonekatse. Ebali lelo mwemwe ng'ampfukile baye kumlonga pfihile mtumighwa wangu Musa?" 9 Baho IMNDEWA kawonela maya Miliamu na Aruni, kaghudubuka koka. 10 Nalyo libingu lilawa mna Lihema Lienzeluke lyuka, baho Miliamu tsakoneka kana utamu wa ngotsi, mtselu chwee!. Aruni hayahunduke na kumlola Miliamu, tsakakangawala hayamwonile kana utamu we ngotsi. 11 Kamlongela Musa, "Mndewa wangu, uleke kututenda tughaye kwaapfila ghatutendile ng'aghanoghile baye na tutenda nzambi. 12 Uleke kumtenda Miliamu yawe ka imwana yoneke kafa, lukuli lwake lwose luihinyika." 13 Apfo Musa kamlilila IMNDEWA kalonga, "Nokulomba umuhonetse." 14 Lekeni IMNDEWA kamlongela Musa, "Ka aba wake yang'ambwalulile ghamate, kumhigha ghamatotso, tsang'opata chinyala kwa matsuwa saba? Mlapfe kunze kwe ndalo yakale ako kwa matsuwa saba, kuya umuitse mna ndalo." 15 Apfo Miliamu kawingighwa yakale kunze kwe ndalo kwa matsuwa saba. Iwanu ng'awanduse keli ghumwanza mbaka Miliamu hayoile keli mna ndalo. 16 Haghamalile agho ghose iwanu wandusa ghumwanza kulawa Haseroti, waghenda watsenga indalo kune nyika ya Parani.