1 Kuya Kola, imwana wa Ishali wa lukolo lwa Kohati, iyolawila mna likabila lya Lawi, kawasola Datani na Abiramu, iwanaghe Eliabu, na kamsola Oni mwanaghe Peleti, iwalawile mna kabila lya Rubeni. 2 Iwanu wano hamwe na Waisiraeli, na pfilingotsi miya mbili na hamsini, iwasaghulighwe na iwomanyika na Waisiraeli wose, wamlema Musa. 3 Wetingana hamwe kuwalonga Musa na Aruni, wawalonga pfino, "Mwemwe mlumbilila ghendo, Waisiraeli wose wenzeluka, chila yumwe kenzeluka, na Imulungu kahamwe nawo. Ule lelo mwemwe mwitunya kubita mtingano ghwose ghwe IMNDEWA?" 4 Musa hayahulike apfo, kafunama. 5 Kuya kamlongela Kola na awala iyelongotse nawo, "Nemitondo Imulungu katsotulangusa tsina nani iwali wakwake yeye, na nani iyenzeluke, kwaapfila yeye iyomsaghula yuyo iyatsomsoghelela habehi. 6 Lelo mtende apfi, nemitondo ghweghwe Kola na iwanu wako msole pfetetso, 7 mwike ghamakala gha ghumoto na mdusule upfumba, kuya mpfighale hambele he IMNDEWA. Kuya tutsolola yuhi yasaghulighwe ne IMNDEWA. Mwemwe wana wa Lawi mlumbilila sideke!" 8 Kuya Musa kamlongela Kola, "Tegheletseni mwemwe wana wa Lawi! 9 Angu mwemwe mwakona chinu chidodo kwa Imulungu wa Isiraeli kuwasaghula mwemwe kulawa mna Waisiraeli wose, mdahe kumsoghelela na kumsang'anila mna Lihema Lienzeluke lye Imulungu, na kuwatumikila Waisiraeli wose? 10 Yeye kawaghala muwe habehi naye, mwemwe na Walawi wayenu wose. Lelo namwe pfipfila mwobama ing'onde yo kutambika? 11 Apfo ghweghwe na wayagho mwomsing'inikila Imulungu, Angu Aruni nani mbaka mwomsinikila?" 12 Kuya Musa kawakema Datani na Abiramu, wanaghe Eliabu, lekeni wamwidika, "Ng'atukutsa baye", 13 "Angu si chinu chidodo baye kwa ghweghwe kutulapfa Misili, isi ine lidongo linoghile kwa ukulima na ukufugha ili utse utukomele akuno kunyika? Kuya ghweghwe kwetenda kwa mkulu wetu? 14 Kuya ghweghwe ng'utughalile baye mna isi ila ine lidongo linoghile na uki wala ng'utwing'ile baye mghunda na mighunda ya mitsabibu iwe yetu. Angu kwodaha kututende twetwe tuwe pfifita? Twetwe ng'atukutsa baye" 15 Musa tsakona maya sideke, kamlongela IMNDEWA, "Uleke kutsitoghola tsinambiko tse wanu wano. Nene sisolile ipunda wa munu wowose baye wala simlaghile munu wowose baye. 16 Musa kamlongela Kola, Ilupfi mtse ghweghwe na iwanu wako hambele he IMNDEWA. Haruni pfipfila kakuwa kabaho. 17 Chila munu yasole chetetso chake na yeke upfumba mghati mwake, na mpfighale hambele ye IMNDEWA, pfetetso pfose pfiwe miya mbili hamsini. Ghweghwe na Aruni wose msole pfetetso pfenu." 18 Apfo chila munu kasola chetetso chake, keka ghumoto na kadusula upfumba. Kuya wose waghenda wema hane libani lya lihema lihenzeluke hamwe na Musa na Haruni. 19 Kuya Kola kawalongela Waisiraeli wose iwomuhulikitsa wetingane hamwe hane libani lya Lihema Lienzeluke, Baho ghumng'alo ghwe Imulungu ghuwalawila iwanu wose iwetingane hamwe. 20 Kuya IMNDEWA kalonga na Musa na Aruni, kawalongela, 21 "Mwibaghule na mkale kutali ne wanu awo ili nene nidahe kuwakomela lumwe iwanu awo." 22 Lekeni Musa na Haruni wafunama, walila kwa kukemelela, walonga, "Ghwe Mulungu, ghwe kwa Mulungu yuweng'a iwanu ughima, angu imunu yumwe yang'atenda nzambi, kowonela maya mtingano ghwose?" 23 IMNDEWA kamlongela Musa, 24 Uwalongele iwanu iwali hane ghumtingano woke waleke kukala habehi na lihema lya Kola na Datani na Abiramu. 25 Apfo Musa kenuka na kawaghendela Datani, Abiramu na pfilongotsi wose wa Isiraeli wamuwinza yeye. 26 Hayapfikile kaghulongela mtingano ghwe wanu, "Nowadedetsa mke kulawa hane ghamahema ghe wanu wano wehile wala mleke kukinda chinu chao chochose chila, hela namwe mtsokomighwa hamwe nawo kwa nzambi tsao tsawatendile." 27 Apfo iwanu woka kulawa hane ghamahema gha Kola, Datani na Abiramu. Datani na Abiramu walawa kunze wema hane mibani ya ghamahema ghawo hamwe na wehe tsawo, ne iwana wao iwabala na awala iwakong'a. 28 Musa kawalongela iwanu, "Apfi pfipfo iwanu pfawatsomanya ka IMNDEWA yuyo iyanitumile nitende agha ghose, wala nene sitenda baye ka pfanibama nene mwenyegho. 29 Ka iwanu wano wakufa ka iwanu wose pfawafagha, au wang'atingwa ka wanu wangi pfawotingwa, apfo mmanye ghendo IMNDEWA ng'anitumile baye. 30 Lekeni Imulungu yang'atenda chinu chingi, ng'ana chilawile baye, na lidongo ling'atulika na kuwametsa wose na chila chinu ichili chawo, na wang'ahulumka kutsimu aku wang'ali waghima, baho mtsotanga ghendo ka iwanu wano wambetsa IMNDEWA." 31 Baho hayamalitse kulonga apfo, lidongo lili hasi ha Datani na Abiramu litulika. 32 Na liwametsa iwanu wose, ne wanu wa tsikaye tsawo, hamwe na wanu wose iwelongotse na Kola na pfinu pfao pfose. 33 Apfo wose wahulumka kutsimu, na chila chinu ichili chao, nalyo lidongo liwaghubika na wahupa kulawa hane ghumtingano ghwe wanu. 34 Waisiraeli wose iwakalile habehi nawo hawahulike chililo chao watsuma aku wolonga, "Tutsume hela lidongo litsotumetsa na tuye" 35 Kuya ghumoto kulawa kwe IMNDEWA ghuhulumka ghuwalakatsa iwanu wala miya mbili na hamsini iwang'ali wodusula upfumba hane Lihema Lienzeluke.

36 Kuya IMNDEWA kamlongela Musa, 37 "Mlongele Eliazari, mwana wa mtambika Aruni yapfisole pfetetso apfo, aho hane ghumoto, na yakaghumwaghe kutali ghumoto aghwo, kwaapfila pfetetso apfo pfenzeluka. 38 Pfetetso apfo pfiwa pfenzeluka ghendo, kwaaapfila iwanu wano tsawapfighala hambele hangu. Apfo upfisole pfetetso pfa wanu awo iwakomighwe kwa nzambi tsawo, pfihonde honde pfiwe pfisisili, kuya utengenetse chighubiko cha matsabahu, chiwe chitango cha kuwakanya Waisiraeli wose." 39 Apfo Eliazari kapfisola pfetetso apfo pfa shaba ipfighalighwe ham bayele he Imulungu na awala iwalakatsighwe na ghumoto, napfo pfihondighwa pfiwa chighubiko cha ichikong'o. 40 Achino chitsakuwa chitango cha kuwakanya Waisiraeli, ka imunu wowose iyali si wa lukolo lwa Aruni yaleke kughenda kumdusulila upfumba IMNDEWA, hela katsokomighwa ka Kola ne wanu wake. Aghano tsaghatendeka ka IMNDEWA pfayamlongele Eleazari kubitila Musa.

41 Lekeni ilupfi yake iwanu wose wa Isiraeli wamsing'inikila Musa na Aruni, walonga, "Mwemwe muwakoma iwanu we Imulungu" 42 Iwanu hawetingane kumsining'inikila Musa na Aruni, wahunduka walola kwalili Lihema Lienzeluke, na baho wona libingu lighubika Lihema, na ghumng'alo ghwe IMNDEWA ghwoneka. 43 Musa na Aruni tsawaghenda, wema hambele ha Lihema Lienzeluke, 44 baho IMNDEWA kamlongela Musa, 45 "Mke mkale kutali ne iwanu wano, ili awo niwakomele lumwe." Lekeni Musa na Aruni wafunama. 46 Musa kamlongela Aruni, "Sola chetetso chako, wike ghamakala ighakwaka kulawa hane lisanduku la kulakatsila tsinambiko, na wike upfumba udusuke. Kuya utsume ughende kune ghumtingano ghwe iwanu, na kuko ukatende chihendo cha kuwalamlitsa iwanu. Kwaapfila imaya ye IMNDEWA ma ipfika na sambi utamu wihile wandusa kuwadununza." 47 Apfo Aruni kasola chitetso chake ka Musa pfayamlongele, katsuma kaghenda haghati ghati he ghumtingano, aku iwanu tsawanza kughaya, kadusula upfumba, na baho kawalamlitsa iwanu kwe Imulungu. 48 Yeye tsakema haghatighati he wanu iwafile na wanu iwali waghima, na baho utamu ula wihile tsaumala. 49 Iwanu iwafile kwa utamu awo ako tsawapfika elufu kumi na nne na miya saba, bila kuwapeta iwanu wala iwafile hamwe na Kola. 50 Utamu'wo haumalile, Aruni koya kwayali Musa hane ghumlango ghwa Lihema Lienzeluke.