1 Imfalume kamlongela Musa, 2 "Uwalaghitse Waisiraeli na uwalongele, ‘Hamkwingila mna isi ya Kanani, isi yanimwing'ani iwe yenu, imibaka ye isi yenu iwe pfino, 3 ubali wa kusini ghumbaka ghwenu ghutsolawa mna inyika ya Sini, na ghutsobita mmbalimbali mwa Edomu, ghutsakwanzila ubali wa kusini kwaitsigha ibahali ye Munyu. 4 Kuya utsohunduka na kughenda Akirabini, na ghutsopfosa Sini na kutsighila kadeshi Barinea, kuya ghutsoghenda, Hazari Adari na kupfika Azimoni, 5 na kulawa Azimoni ghutsohunduka na kughenda kune chikolongo cha Misili, na ghutsosigha hane ibahali ya Mediterania. 6 Ghumbaka ghwenu ghwa ubali wa maghalibi ghutsakwanzila ibahali ya Mediterania. 7 Na ghumbaka ghwenu ghwa ubali wa kasikasini ghutsolawa ibahali ya Mediterania na ghutsopfika hane chidunda Hori. 8 Kulawa hane chidunda Hori ghumbaka ghutsopfika hane nzila ighenda Hamati, na ghutsoghenda Sedadi, 9 kuko ghutsakwang'ila Zifuloni na kutsighila Hazali Enani. Aghwo ghutsakuwa ghumbaka ghwenu ghwa Kasikazini. 10 Ghumbaka ghwenu ghwa ubali wa Mashaliki ghutsakwanzila Hazari Enani na ghutsopfika Sefamu. 11 Kulawa Sefamu ghutsohulumka na kughenda Libila, ubali wa mashaliki wa Aini, na ghutsohulumka keli na kupfika kune ibahali ya Kinereti ubali wa Mashaliki. 12 Kuya ghutsohulumka na kupfika kune ghumto Yoridani na ghutsotsigha hane ibahali ya Munyu. Aino iyo isi yenu na imibaka yake itsinguluka.’ " 13 Apfo Musa kawalongela Waisiraeli, "Aino iyo isi yamtsosola iwe yenu kwa kwasa sisimbi tsilamle, isi Imfalume iyalaghitse weng'ighwe ghamakabila tisa na nusu. 14 Likabila lya Rubeni, na lya Gadi, nusu ya likabila lya Manase tsabokela isi yao kwa kulola kolo tsao tsowolawa. 15 Ghamakabila agho meli na nusu tsawabokela isi yao ihili kumwambu kwa ghumto Yolidani, akula kwalilawila Litsuwa."

16 Imfalume kamlongela Musa, 17 "Mtambika Eliazali na Yoshua mwana wa Nuni wawo iwatsowagholela isi iwe yenu. 18 Pfipfila kutsosola chilongotsi yumwe kulawa mna chila kabila yakwapfile mna ukughola isi. 19 Aghano ghagho ghamataghwa ghao, Likabila lya Yuda, kasolighwa Kalebu mwana wa Yefune. 20 Likabila lya Simeoni, kasolighwa Shemueli mwana wa Amihudi. 21 Likabila lya Benjamini, kasolighwa Elidadi mwana wa Kisiloni. 22 Likabila la Dani, kasolighwa Buki mwana wa Yogili. 23 Likabila la Manase mwana wa Yosefu, kasolighwa Hanieli mwana wa Efodi. 24 Likabila lya Efuremu mwana wa Yosefu, kasolighwa Kemueli mwana wa Shifutani. 25 Likabila lya Zebuluni, kasolighwa Elisafani mwana wa Parinaki. 26 Likabila la Isakari, kasolighwa Palitieli mwana wa Azani. 27 Likabila lya Asheri, kasolighwa Alihudi mwana wa Shelomi. 28 Likabila lya Nafutali, kasolighwa Pedaheli mwana wa Amihudi. 29 Iwanu wano wawo IMNDEWA iyawalaghitse wawagholele iwanu isi Kanani iwe ulisi wawo."