1 IMNDEWA kamlongela Musa na Aruni, 2 Kulawa lukolo lwa Lawi, uwapete iwana wa Kohati, kwa kulola pfeleko pfawo, na tsikaye tsawo, 3 kulawa wane miyaka selasini mbaka wane miyaka hamsini, awala iwodaha kusang'ana kune Lihema Lienzeluke 4 Aino iyo sang'ano ya wana wa Kohati kwe pfinu pfihenzeluke ghendo.

5 Ahala hawotsakwinuka woke, Aruni ne wanaghe watsakwingila mghati mwe Lihema, watsolihulumsa panziya ilibaghula hanu haenzeluke na ihaenzeluke ng'ani, ilili hambele ha lisanduku lya laghano kuya walighubike lisanduku kwa lipanziya alyo. 6 Mchanya mwake watsakwika ngotsi ndekendeke ya mene, kuya watsotandatsa chitambala cha langi ya buluu iliyeka, na kwingitsa imibiki yo kulighalila.

7 Mchanya mwe metsa ya kulapfila ipfighate, ipfikwikighwa hambele ha IMNDEWA, watsotandatsa chitambala cha langi ya buluu, na mchanya mwake watsakwika tsisahani, pfisahani pfa ubani, bakuli, na pfikombe pfo kwikila nambiko ya chokunwa. Matsuwa ghose pfighate pfitsokala mchanya mwe imetsa ayo. 8 Kuya watsopfighubika ipfinu apfo pfose kwa chitambala chidung'u, na mchanya mwake watsakwika chighubiko cha ngotsi ndekendeke ya mene. Pfipfila watsakwingitsa imibiki ya ukulighalila imetsa ayo.

9 Kuya watsosola chitambala cha langi ya buluu, na kughubika ichighutso che pfitasa, makasi ghake, pfisahani pfake na pfinu pfose ipfitumika kughumila ghamapfuta gha nzeituni. 10 Watsochika hamwe na pfinu pfake pfose mghati mwe ngotsi ndekendeke ya mene na kuyoha mna imibiki yo kuchighalila.

11 Kuya watsotandatsa chitambala cha buluu mchanya mwe lisanduku lya nzahabu lya kudusulila upfumba na kulighubika kwa ngotsi ndekendeke ya mene mchanya mwake. Kuya watsakwingitsa imibiki yake ya ukulighalila. 12 Watsosola ipfinu pfose ipfitumika mna Lihema Lienzeluke, watsopfoha kwa chitambala cha langi lya buluu na kupfighubika kwa ngotsi ndekendeke ya mene, kuya watsopfika mchanya mwe imibiki yake yo ukulighalila. 13 Watsolapfa lipfu mna matsabahu, na mchanya mwake watsotandatsa chitambala cha langi ya nzambalau. 14 Mchanya mwe ichikong'o acho watsakwika ipfinu pfose ipfitumika mna sang'ano. Ipfinu apfo pfitsakuwa, pfihali pfa kuhalila ghumoto, pfinanikilo, tsikoleo tso ukulapfila lipfu na mabakuli. Kuya mchanya mwake watsotandatsa chighubiko cha ngotsi ndekendeke ya mene na kwingitsa imibiki yake ya ukulighalila. 15 Aruni ne wanaghe hawotsomalitsa kughubika Lihema Lienzeluke, ipfinu, na ipfinu pfake pfose, na wang'andusa ghumwanza, iwanu wa pfeleko pfa Kohati watsakutsa kupfighala. Lekeni wawo ng'awobamighwa wapfikinde ghendo ipfinu'pfo pfihenzeluke, hela watsakufa. Ayo tsaikala sang'ano ya iwanu wa kabila lya Kohati ahala lihema lihenzeluke halisoghetsighwe. 16 Eleazali imwana wa mtambika Aruni yeye kobamighwa yalololesa ghoya mapfuta ghe pfitasa, upfumba unung'ila ghoya, nambiko tse pfijo tsa chila tsuwa, mafuta gha kuhimikighwa na chila chinu ichihimikighwe mghati mwe lihema alyo.

17 Kuya IMNDEWA kamlongela Musa na Aruni, 18 "Mleke kuwaleka iwanu wa lweleko lwa Kohati wakomighwe. 19 Lelo, ili kuwatenda waleke kukomighwa kwa kupfisoghelela ipfinu pfa Lihema Lienzeluke ghendo, kutsotenda pfino, Aruni ne wanaghe watsakwingila na kuwagholela chila munu chayobamighwa kutenda na sang'ano yake. 20 Lekeni iwanu wa lweleko lwa Kohati ng'awatsakwingila ghendo kupfilola ipfinu apfo pfienzeluke, wang'atenda apfo watsakufa."

21 IMNDEWA kamlongela Musa, 22 Uwapete wanu wa lweleko lwa Gerishoni kwa kuwinza tsikaye tsawo na kolo tsawo. 23 Kutsowapeta iwamale wose kulawa wane miyaka selasini na wane miyaka hamsini iwodaha kusang'ana mna Lihema Lienzeluke. 24 Aino itsakuwa sang'ano ya Wagerishoni na ipfinu pfawatsoghala, 25 Kughala mapanziya gha Lihema Lienzeluke na chighubiko chake, chighubiko cha ngotsi ndekendeke ya mene ichili mchanya mwake, lipanziya lya ghumlango ghwa Lihema Lenzeluke, 26 mapanziya na mitsabi ya luwa itsunguluke Lihema na lisanduku lya kulakatsila nambiko, na ipfinu pfose ipfitumika hamwe ne pfinu pfino. Wawo watsotenda ghose ighobamighwa mna ipfinu pfino. 27 Aruni ne wanaghe iwali watambika wawo watsowalaghitsa Wagerishoni ahala hawatsoghala ipfinu na sang'ano tsawotsotenda. Kutsowagholela ipfinu pfose pfawobamighwa kughala. 28 Aino iyo sang'ano ya iwanu wa lweleko lwa Gerishoni mna Lihema Lienzeluke, watsolongotsighwa na Itamali imwana wa mtambika Aruni.

29 Pfipfila kutsowapeta iwanu wa lweleko lwa Melali kwa kuwinza tsikaye tsa aba tsawo na kolo tsawo. 30 Kutsowapeta iwamale wose kulawa wane miyaka selasini mbaka wane miyaka hamsini iwodaha kusang'ana mna Lihema Lienzeluke. 31 Sang'ano yawo itsakuwa ino, ukughala tsifulemu, imifumbati, tsingutso na ipfikalilo pfake. 32 Pfipfila watsoghala tsingutso tse luwa itsitsunguluka, ipfikalilo pfake, pfighingi pfa lihema, mitsabi hamwe na ipfinu pfose ne pfombo pfake pfose. Chila munu katsoghala ka pfayagholelighwe. 33 Aino iyo sang'ano ya iwanu wa lweleko lwa Melali mna lihema lya kwitinganila, watsolongotsighwa na Itamali imwana wa mtambika Aruni.

34 Apfo Musa na Aruni na pfilongotsi wose wawapeta iwanu wa lukolo lwa Kohati kwa kuwinza pfeleko pfao na tsikaye tsa aba tsawo. 35 Tsawawapeta iwanu wose kulawa wane miyaka selasini mbaka wane miyaka hamsini iwodaha kusang'ana mna Lihema Lienzeluke. 36 Wose iwapetighwe tsawapfikila elufu mbili, miya saba na hamsini. 37 Awano wawo iwanu wa lweleko lwa Kohati iwasang'ane mna Lihema Lienzeluke iwapetighwe na Musa na Aruni ka IMNDEWA pfayamlaghitse Musa.

38 Iwanu wose wa lweleko lwa Gerishoni iwapetighwe kwa kuwinza pfeleko pfao na tsikaye tsa aba tsawo, 39 kulawa wane miyaka selasini mbaka hamsini iwodaha kusang'ana mna Lihema Lienzeluke, 40 tsawapfikila wanu elufu mbili, miya sita na selasini. 41 Awano wawo iwanu wa lweleko lwa Gerishoni iwasang'ane mna Lihema Lienzeluke iwapetighwe na Musa na Aruni ka IMNDEWA pfayamlaghitse Musa. 42 Wose iwapetighwe wa lukolo lwa Melali kwa kuwinza pfeleko pfawo na tsing'anda tsa tsawo, 43 kulawa wane miyaka selasini mbaka hamsini, iwadahile kusang'ana mna Lihema Lienzeluke, 44 tsawapfikila wanu elufu ndatu na miya mbili. 45 Awano wawo iwanu wa lweleko lwa Melali iwapetighwe na Musa na Aruni ka IMNDEWA pfayamlaghitse Musa.

46 Apfo Musa, Aruni, na pfilongotsi wose wa Isiraeli wawapeta Walawi kwa kuwinza pfeleko pfao na tsikaye tsa aba tsawo, 47 kulawa wane miyaka selasini mbaka hamsini na awala iwatsile kusang'ana na kughala ipfinu mna Lihema Lienzeluke, 48 wose tsawawa wanu elufu nane, miya tano na semanini. 49 Chila munu tsakeng'ighwa sang'ano yo kutenda na choni cho kughala mna lihema lya kwitinganila ka IMNDEWA pfayamlaghitse Musa.