1 Balamu kamlongela Balaki, "Nitsengele hano pfikong'o saba pfo kulakatsila tsinambiko, kuya ungalile wang'ombe wamale saba na wang'olo wamale saba." 2 Balaki katenda ka pfayalongile Balamu. Apfo walapfa ng'ombe yumwe mmale na ng'olo yumwe mmale mchanya mwa chila chikong'o. 3 Kuya Balamu kamlongela Balaki, "Wime hano habehi na inambiko yako ya ukulakatsighwa, na undeke ng'ende songaha IMNDEWA katsetingana na nene, na chochose chayonangusa nitsakutsa kukulongela." Naye kaghenda yaliyeka hanu ha ukutambikila. 4 Imulungu ketingana na Balamu, naye Balamu kamlongela, "Tsanitsenga pfikong'o saba na ndapfa ng'ombe yumwe na ng'olo yumwe mchanya mwa chila chikong'o." 5 IMNDEWA kamwing'a Balamu imbuli iyobamighwa kulonga, kamlongela yoye kwa Balaki. 6 Balamu koya na kampfika Balaki kema bahala habehi na nambiko yake ya ukulakatsighwa, hamwe na pfilongotsi wose wa Moabu 7 Balamu katunga imbuli ino, kalonga,

"Balaki kangala hano kulawa Aramu,

ona mfalume wa Moabu kangala hano kulawa mna pfidunda pfa mashaliki,

‘Utse undighitile iwanu wa Yakobu,

utse uwalonge pfihile iwanu wa Isiraeli!’

8 Nitsomlighitatse imunu yula Imulungu yang'amlighite?

Nitsowalongatse pfihile iwanu wala Imulungu ng'awalongile pfihile baye?

9 Kulawa mna pfidanando pfe mibambalawe nene nowona,

kulawa mchanya mwe pfidunda nene nowasungulila,

iwanu awo iwokala waliyeka iwebona ka wao ng'aweghala na wanu wangi baye.

10 Nani iyodaha kuwapeta iwanu wa Yakobu apfila pfawali wengi ka msanga?

Au iyodaha kupeta hata ilobo imwe ya iwanu wa Isiraeli?

Nene na nife ka pfawafagha iwanu iwanoghile, na hanitsigha nitsighe ka wawo!"

11 Baho Balaki kamlongela Balamu, "Lelo utendile choni? Nikughala ahano undighitile awano iwonihila, lekeni ghweghwe kowamotetsa ghendo." 12 Balamu kamwidika Balaki, "Angu nene sibamighwa baye kulonga malonga ghayangaile IMNDEWA?"

13 Hambele Balaki kamlongela Balamu, "Tuke hanu hangi, ako kutsowona, lekeni kutsowona chidogho wala ng'audaha baye kuwona wose, ukandighitile awo kulawa kuko." 14 Balaki kamsola Balamu kamghala ha chiwala cha Sofimu, kune hanu ha ukutambikila cha chidunda Pisiga. Kuko katsenga masanduku gha kulakatsila tsinambiko saba na kalapfa ng'ombe yumwe mmale na ng'olo yumwe mmale mchanya mwa chila lisanduku lya kulakatsila wawe nambiko. 15 Balamu kamlongela Balaki, "Wime hano habehi na inambiko yako ya kulakatsighwa, undeke ng'ende akula kumwambu niketingane na IMNDEWA." 16 IMNDEWA kamwing'a Balamu imbuli iyobamighwa kulonga, kamlongela yoye kwa Balaki. 17 Apfo Balamu koya kampfika Balaki kema habehi na inambiko yake ya kulakatsighwa, hamwe na pfilongotsi wose wa Moabu. Balaki kamghutsa, "IMNDEWA yakulongele choni?" 18 Baho Balamu kamtungila ng'ungo, kalonga,

"Winuke Balaki utegheletse,

nitegheletse, ghweghwe mwana wa Sipoli,

19 Imulungu si munu baye mbaka yaghutsuke,

wala si mwana we munu baye mbaka yaghalambuke,

yang'eka laghano yaleke kulitenda,

na yang'alonga chinu yaleke kuchitenda chilawile? 20 Ulole yeye kangaya laghitso lya kumotetsa, naye ma kamotetsa,

na nene sidaha kutenda pfingi baye.

21 IMNDEWA ng'onile baye ukwiha kwa wanu wa Yakobu

wala ng'onile ghehile ghe wanu wa Isiraeli.

IMNDEWA kahamwe nawo yeye kotunyighwa ka kwa kutowelighwa lukenze,

yeye kotunyighwa ka mfalume wawo.

22 Imulungu iyawalapfile kulawa Misiri.

Yeye kana tsingufu ka tsa mbogho.

23 Ukulaghula ng'akudaha baye ghendo kuwabela iwanu wa Yakobu,

wala uhawi kwa wanu wa Isiraeli.

‘Mlole ipfinu pfakukangawatsa Imulungu pfayawatendele Waisiraeli.’

24 Ulole Waisiraeli wakwinuka ka isimba ipinga,

na wakwinuka ka simba mmale, ng'owasa baye mbaka yaje mnyama yamkomile,

na mbaka yanwe idaho ye imnyama iyamkomile."

25 Kuya Balaki kamlongela Balamu, "Uleke kuwalighita wala kuwamotetsa ghendo" 26 Lekeni Balamu kamwidika Balaki, "Angu sikulongele baye ka nene notenda achila Imulungu chayonongela?"

27 Kuya Balaki kamlongela Balamu, "Lelo utse, nikughale hanu hangi, songaha IMNDEWA katsotoghola ghweghwe undighitile wanu wano kulawa kuko." 28 Apfo Balaki kamghala Balamu mbaka hane hanu ha ukutambikila cha chidunda Peoli, aho imunu yang'ema kolola kunyika. 29 Balamu kamlongela Balaki, "Nitsengele masanduku saba gha kulakatsila tsinambiko na unyikile ng'ombe wamale saba na ng'olo wamale saba." 30 Balaki katenda ka Balamu pfayamlongele, kuya kalapfa ing'ombe yumwe mmale na ng'olo yumwe mmale mchanya mwe chilalisanduku wawe nambiko.