1 Kuya IMNDEWA kamlongela Musa, 2 Walongele Waisiraeli malaghitso ghano, imunu mmale au pinga hayatsakwika natsili ng'ulu lya kwihika hambele he IMNDEWA, au kwibaghula ne IMNDEWA, 3 yaleke kunwa dipfai wala mbwali, yaleke kunwa sanga ya nzabibu au mbwali ng'ali, yaleke kunwa matsi gha nzabibu wala kuja nzabibu tsipfile wala tsinyalile. 4 Matsuwa ghose hayatsakwika natsili yaleke kuja chinu chochose ichilawa mna mnzabibu, kulawa tsimbeghu mbaka imibangu.

5 Matsuwa ghose gha natsili yake ya kwibaghula, yaleke kugheta mvili tsake mbaka natsili yake ya kwihika hambele he IMNDEWA itimile, katsokala kahenzeluka, katsotsileka mvili tsake tsikule. 6 Matsuwa ghose ghayebaghula yawe we Mtwatsa Imulungu, yaleke kuseghelela mauti, 7 hata ka gha aba, mai, ndughu au lumbu lyake, hela katsetenda keha kwaapfila kehika hambele he Mtwatsa Imulungu. 8 Matsuwa ghose hayatsakuwa mnatsili, katsakuwa kahenzeluka kwe IMNDEWA.

9 Ka munu kakufa kwa kwidukitsa hambele he munu yekile natsili, na kutsitenda tsimvili tsa yekile natsili tsihe, katsotsigheta mna litsuwa lya saba. 10 Na mna litsuwa lya nane katsoghala kwa mtambika njiwa weli au makinda meli gha tetele hane ghumlango ghwa Lihema Lienzeluke. 11 Mtambika katsomlapfa yumwe yawe wa nambiko ya kuleghusa nzambi, na yungi yawe wa nambiko ya kulakatsighwa, naye katsomleghusila nzambi yake yo kukinda mauti. Mne litsuwa lilyo katsotsigheta tsimvili tsake na kakuwa kaenzeluka, 12 na kwitenda yele hambele he IMNDEWA kwa matsuwa ghake ghokwibaghula. Matsuwa agho gha mwanduso ghatsopetighwa kwaapfila tsimvili tsake itsihopfughighwe, tsatsafinala. Katsolapfa ng'olo wa mwaka ghumwe, ili yawe nambiko ya kuleghusa totso.

13 Aghano ghagho malaghitso gha imunu yekile natsili ahala hayomalitsa kwiika hambele he IMNDEWA. Katsoghalighwa hane ghumlango ghwa Lihema Lienzeluke, 14 na kumlapfila IMNDEWA nambiko tsake, mwanang'olo yumwe wa mwaka ghumwe iyenelele wa nambiko ya kulakatsighwa, mwana weng'olo pinga yumwe wa mwaka ghumwe iyenelele wa nambiko ya kuleghusa nzambi, na ng'olo mmale yumwe wa nambiko ya kukala tseghamba ne Imulungu.

15 Pfipfila katsolapfa chiseghe cha pfighate ipfilihela hamila, maandasi gha usaghe utighinike na mapfuta, hamwe na nambiko tse pfijo na pfokunwa.

16 Mtambika katsomlapfila IMNDEWA pfinu pfose pfino hamwe na nambiko ya kuleghusa nzambi na nambiko ya kulakatsighwa. 17 Katsomlapfila IMNDEWA ing'olo ayo ka nambiko ya kukala tseghamba ne Imulungu, pfipfila katsolapfa chiseghe che pfighate ipfilihela hamila, nambiko ye pfijo na pfokunwa. 18 Aho hane ghumlango ghwa Lihema Lienzeluke, imunu ayo yekile natsili katsoghetsa mvili tsake na kutsika mna ghumoto ighuli mna nambiko yo kukala tseghamba ne Imulungu.

19 Kuya mtambika katsosola lihegha lye ng'olo mmale ilyambikighwe hamwe na liandatsi limwe ing'alighelighwe hamila na pfighate pfisisili ing'apfighelighwe hamila kulawa mna chiseghe, katsomwing'a imunu yekile natsili mna ghamoko ghake ahala hayomalitsa kugheta tsimvili tsake. 20 Pfipfila mtambika katsopfihighisa ipfinu apfo, chidali na lihatsa ka nambiko ya kwinulighwa hambele he IMNDEWA. Pfose pfino pfitsakuwa ka nambiko yenzeluke kwa mtambika. Hayomalitsa kutenda apfo imunu yekile natsili katsakunwa idipfai.

21 Aghano ghagho malaghitso gha imunu yekile natsili ahala hayelaha kumlapfila IMNDEWA nambiko. Nambiko yake yomlapfila IMNDEWA, ilinge na apfila pfayelahile hata ka katsolapfa chinu chingi.

22 IMNDEWA kamlongela Musa, 23 Mlongele Aruni ne wanaghe, apfino pfipfo pfamtsowamotetsa Waisiraeli,

24 IMNDEWA yawamotetse na kuwalolesa,

25 IMNDEWA yawalole kwa uluso na yawatendele ighanoghile,

26 IMNDEWA yawalanguse wende wake na yawatende mkale tseghamba.

27 "Apfi pfipfo pfawatsolikema taghwa lyangu kwa Waisiraeli, na nene nitsowamotetsa."