1 Imulumgu tsakamlongela Musa, 2 "Walongele Waisiraeli pfino, hampfika mna isi yanimwing'ani mkale, 3 na hamnilapfila nene tsinambiko kulawa kune mifugho yenu, au nambiko ya kulakatsighwa, imnyama wa yawilaghane mwenyegho kulapfa au imnyama iyolapfa imunu kwa ukubama mwenyegho, au imnyama iyolapfighwa mna pfihungo pfenu, na ukulakatsighwa kwe iwanyama awo komnung'ila ghoya IMNDEWA. 4 Imunu iyolapfa tsinambiko tsino tse wanyama pfipfila yamlapfile nambiko ya usaghe, uwe kimbo limwe utighinike ghendo na iuhanganyike na kimbo limwe lya ghamapfuta. 5 Pfipfila yalapfe kimbo limwe lya dipfai, iwe nambiko ya chokunwa kwa chila mwana we ng'olo iyolapfighwa yalakatsighwe. 6 Hamlapfa ing'olo mmale yawe nambiko, pfipfila mlapfe makimbo meli gha usaghe ihuhanganyike na kimbo limwe na nusu lya ghamafuta uwe nambiko ya usaghe. 7 Hamwe na kimbo limwe lya dipfai, iwe nambiko ya chokunwa, na hayolakatsighwa yamnung'ile ghoya IMNDEWA. 8 Hamlapfa imwana mmale we ng'ombe yawe nambiko yakulakatsighwa au yawe nambiko ya chinu choyolaghana imunu, au yawe nambiko ya kukala tseghamba ne Imulungu. 9 Imunu iyolapfa tsinambiko tsino tse wanyama pfipfila yamlapfile nambiko ya usaghe, uwe makimbo sita utighinike ghendo na ihuhanganyike na makimbo meli ghe ghamapfuta, 10 hamwe na makimbo meli gha dipfai, ghawe nambiko ya chokunwa. Ukulakatsighwa kwe iwanyama wano komnung'ila ghoya IMNDEWA. 11 Apfino pfipfo ipfinu ipfibamighwa kulapfighwa ahala hayolapfighwa chila ng'ombe mmale, ing'unzu, mwana we ng'olo mmale, au mvulati. 12 Ipfinu apfo ipfilapfighwa pfakongetseka kwa kulola iwanyama iwolapfighwa wali wangapi. 13 Chila Muisiraeli yatende apfi chila hayolapfa nambiko yo kulakatsighwa ye mnyama, ukulakala kwake komnung'ila ghoya IMNDEWA. 14 Na ka mna muhenza iyokala namwe kwa matsuwa chidogho au kwa matsuwa ghose, naye kobama kulapfa nambiko ya kulakatsighwa, ya ukumnung'ila ghoya IMNDEWA, imunu ayo yatende ka pfamtenda mwemwe. 15 Mna pfeleko pfenu pfose ipfikutsa, malaghitso ghaghala ghamkinda mwemwe, imuhenza yamkala naye, naye yaghakinde ghagho, hambele he Imulungu wose mtsolingana. 16 Mwemwe na iwahenza wamkala nawo wose mtsakuwa na malaghitso ghamwe na imiko imwe."

17 Kuya IMNDEWA kalonga na Musa, 18 "Walongele Waisiraeli pfino, ‘Hampfika mna isi yanimghalani, 19 hamkuja ipfijo pfambeta mna isi ayo, mbaghule chijo chidogho, mlapfe nambiko kwa IMNDEWA. 20 Mlapfileni chighate ichilawa mna usaghe wa pfijo pfenu pfamlimbule na kupfibeta kulawa hanu hawobetela ipfijo. 21 Mtsondapfila nene Imulungu inambiko ino ya chighate chokulimbula mna pfeleko pfenu pfose ipfikutsa. 22 Lekeni ka mtsototsa na kuleka kughakinda ghamalaghitso ghano ghanimlongele Musa, 23 na ka mna ghamatsuwa ighakutsa iwanu ng'awokinda baye ghose nene Imulungu ghanimlongele Musa, 24 ka litotso alyo lyitendeka bila kumanyika wala ghumtingano ghwose ng'aghutangile baye, apfo mtingano ghwose ghwa Isiraeli, watsolapfa ng'ombe yumwe mmale yawe nambiko ya kulakatsighwa, na hayolakala yamnung'ile ghoya IMNDEWA, na walapfe nambiko ya usaghe na nambiko ya chakunwa kwa kuwinza ghamalaghitso ghake. Pfipfila walapfe mvulati yumwe yawe nambiko ya kuwaleghusila nzambi. 25 Mtambika katsotenda chihendo chokuwalamlitsa Waisiraeli ne Imulungu, nawo watsoleghusighwa inzambi yawo kwaapfila tsawatenda aku ng'awamanyile baye na wao tsawamghalila IMNDEWA inambiko yakulakatsighwa na ayila nambiko ya kuleghusa nzambi kwa totso lyawatendile. 26 Waisiraeli wose hamwe na iwagheni iwokala nawo, watsoleghusighwa inzambi yao kwaapfila wose tsawatotsa. 27 Imunu yumwe yang'atenda nzambi aku ng'amanyile abe, ayo yalapfe imene mbughuma yane ghumwaka ghumwe, yawe nambiko yakumleghusila nzambi yake. 28 Imtambika katsomlapfa imene ayo, naye komlamlitsa ne Imulungu, naye koleghusighwa izambi yake. 29 Mkinde laghitso limwe chila munu iyotenda nzambi aku ng'omanya baye, yawe Muisiraeli au yawe mgheni yamkala naye. 30 Munu wowose iyotenda nzambi kwa kubama mwenyegho, yawe Muisiraeli au yawe mgheni, ayo komligha IMNDEWA, na yabaghulighwe yakale kutali ne wanu wake. 31 Kwaapfila kalema aghala ghayalongile IMNDEWA na kalema kughakinda ghamalaghitso, ayo yabaghulighwe ghendo, na keyonza mwenyegho hayatsakufa.’"

32 Waisiraeli hawang'ali wakunyika, wamwona munu yumwe kodondola tsingodi mna litsuwa lya Sabato. 33 Iwanu iwamonile kudondola tsingodi wamghala kwa Musa na Haruni na kwa Waisiraeli wose. 34 Nawo wamwihindila mng'anda kwapfila nga'awamanyile baye chinu cho kumtenda. 35 IMNDEWA kamlongela Musa, "Imunu'yo yakomighwe, Waisiraeli wose wakamtowe ne ghamabwe ako kunze mwe ndalo." 36 Apfo iwanu wose wamsola imunu'yo, wamghala kunze mwe ndalo, na kuko wamtowa na ghamabwe mbaka kafa, ka IMNDEWA pfayamlaghitse Musa.

37 Kuya IMNDEWA kamlongela Musa, 38 "Walongela Waisiraeli, uwalaghitse wapfoghose pfifundo mna tsimembe tsa ghamagwanda ghao, na wadadatsile tsinyutsi tsa langi ya buluu mchanya mwa chila chipfundo. Uwalongele watende apfo mna pfeleko pfao ipfikutsa. 39 Pfifundo apfo pfitsowatenda mwemwe mkumbukeghe, chila hampfona mtsoghakinda ghamalaghitso ghangu na kughatenda, hela mleke kutenda aghala ghambama wenyegho na ghala ghamkona kwa nenge tsenu wenyegho. 40 Pfifundo apfo pfitsowatenda mkumbuke ghamalaghitso ghangu ghose na kughakinda muwe wenzeluka. 41 Nene na IMNDEWA, Imulungu wenu, yaniwapfile mna isi ya Misiri ili niwe mulungu wenu. Nene na IMNDEWA, Imulungu wenu."