1 Na mfalume yumwe Mkanani wa isi ya Aladi iyakalile ubali wa kusini wa Kanaani, hayahulike ka Waisiraeli wakutsa kwa kwang'ila inzila ya Atarimu, kaghenda kwitowa na Waisiraeli, kawaghogha wamwenga wao na koka nawo. 2 Baho Waisiraeli welighita kwe IMNDEWA, walonga, "Ka ghweghwe kutsotwapfila tuwatowe iwanu wano, twetwe tutsoghenda kuihinya imiji yawo kwaajili yako." 3 IMNDEWA kahulika chililo chawo, naye kawapfila, wawakoma na kuihinya ghendo imiji yawo. Apfo hanu aho tsahakemighwa Horima.

4 Waisiraeli tsawoka kulawa chidunda Hori na wang'ila inzila ya bahali ya shamu ili waitsunguluke isi ya Edomu. Lekeni mnzila iwanu watenyuka ghumoyo. 5 Wanza kumsing'inikila Imulungu na Musa, walonga, "Ebali mwemwe mtulapfile mna isi ya Misiri tutse tufile akuno kunyika? Kwaapfila hano haduhu ichijo wala haduhu ghamatsi, na chijo chino twetwe chitubwikitsa" 6 IMNDEWA kaghala iwanzoka wane isumu mna iwanu, nawo wawaluma na Waisiraeli wengi tsawafa. 7 Iwanu wamghendelela Musa, na wamlongela, "Tutenda nzambi ghendo, kwaapfila tsatumlonga pfihile Imulungu na ghweghwe, utulombele kwe IMNDEWA yawasoghetse iwanzoka wano." Apfo Musa kawalombela iwanu. 8 Naye IMNDEWA kamlongela Musa, "Utende nzoka wa shaba, na umkondeke mna libiki yalebele. Na munu wowose iyolumighwa ne nzoka, yang'amlola inzoka ayo, katsohona." 9 Apfo Musa kafina inzoka we shaba, na kamkondeka mna libiki. Chila munu iyalumighwe ne nzoka hayamlolile inzoka ayo, tsakahona.

10 Waisiraeli waghendelelela na ghumwanza ghwao, nao weka indalo yao mna isi ya Oboti. 11 Woka hanu aho na waghenda ukwika indalo yao hanu hokemighwa Iye Abarimu, iili mna inyika iilolesa Moabu, ubali wa kwalilawila litsuwa. 12 Woka hanu aho na waghenda kune chiwala cha Zeredi, na kuko weka indalo yawo. 13 Kulawa aho waghenda kune ghumto ghwa Arinoni, ighulapfa ghamatsi mna is Waamoli na kwang'ila kunyika. Ghumto agho tsaghwamna ghumbaka wa Wamoabu na Waamoli ilili ubali wa kulawila litsuwa, kuko weka indalo yao. 14 Apfo yandikighwa mna chitabu cha ing'ondo cha IMNDEWA, "Ghumji ghwa Wahebu ighuli mna isi ya Sufa na lwanda lwa Arinon, 15 na mhulumko ghwa lwanda alwo ighuhulumkila mna ghumji ghwa Ari, na kughenda kune ghumbaka ghwa Moabu." 16 Kulawa ako Waisiraeli waghendelela na ghumwanza ghwao mbaka wapfika Beeri, acho chisima IMNDEWA chayamlongele Musa, "Uwatinganitse iwanu hamwe na nene nitsoweng'a ghamatsi." 17 Kuya Waisiraeli wemba wila uno,

"Ghwe chisima, ulapfe ghamatsi, Lelo mchimbile!

18 Chisima chawahimbile wakulu,

chisima chawachifukule wakulu we wanu,

kwa ng'weku tsao tsa ukulu na tsing'weku tsao tso kwangila."

Kulawa kune inyika tsawoka mbaka wapfika Matana, 19 na kulawa Matana tsawaghenda Nahalieli, na kulawa Nahalieli tsawaghenda Bamothi, 20 na kulawa Bamothi waghenda kune ulwanda ulukwingila mna isi ya Moabu, hane hanu ha ukutambikila cha chidunda Pisiga, ichilola kuhisi mwenyika.

21 Iwanu wa Isiraeli tsawatuma wanu waghende kwa mfalume Sihoni wa Waamori, wakamlongele pfino, 22 "Utulelekelele twang'e mna isi yako, hatutsobaghuka baye wala kwingila mna mighunda yenu au mighunda yenu ya mitsabibu, na ng'atukunwa baye ghamatsi gha pfisima pfenu, twolumbilila kwa kwang'a mna inzila ng'ulu ye imfalume mbaka hatulawa mna isi yako." 23 Lekeni mfalume Sihoni ng'atoghole baye kuwaleka Waisiraeli wabite mna isi yake. Apfo kawakema iwanu wake wetingane hamwe, kaghenda nawo Yahasa ili mnyika na kuko ketowa na Waisiraeli. 24 Lekeni Waisiraeli wamkoma kwa kumsubutula na lipanga, waisola isi yake kulawa mto ghwa Arinoni mbaka mto ghwa Yaboki, mbaka isi ya Waamoni, Ghumbaka ghwa isi ya Amoni tsaghung'ali ghukalitsighwa sideke. 25 Waisiraeli waisola imiji yawo yose na wakala mna imiji yose ya Waamori mna Hesiboni, na kaye tsake tsose. 26 Hesiboni tsaghumji ghwake Sihoni mfalume wa Waamori, yeye tsaketowa na mfalume wa Moabu na kamboka isi yake yose mbaka kolongo Arnoni. 27 Apfo iwanu wa ghumwande tsawemba wila uno,

"Itsani Hesiboni na tutsenge,

ghumji kwa Sihoni ghutsengighwe keli.

28 Kwaapfila ghumoto tsaghulawa Hesiboni,

na milambi ya ghumoto ilawa mna ghumji ghwa Sihoni,

na ilakatsa ghumji gha Ari wa Moabu,

na ilakatsa pfidunda pfa ghumto ghwa Arinoni.

29 Mtsochona mwemwe iwanu wa Moabu,

Mkomighwa, mwemwe wanu yamtambikila imulungu Kemoshi!

Kawatenda wanenu wamale watsumile kuna isi tsingi,

na wanenu mapinga waghoghighwa

na waghalighwa kwa Sihoni,

mfalume wa Amori.

30 Lekeni sambi watsukulu wao tuwakoma,

kulawa Hesiboni mbaka Diboni,

kulawa Nasimu mbaka Nofa, habehi na Medeba."

31 Apfo Waisiraeli tsawakala mna isi ya Waamori. 32 Kuya Musa katuma wanu waghende kughupelemba ghumji ghwa Yazeli ghuli pfihi, awo waghuboka hamwe na pfijiji pfake, na wawawinga Waamori iwakalile aho. 33 Waisiraeli wahunduka waghenda ubali wa kasikazini na wakololetsa inzila ighenda Bashani. Mfalume Ogu wa Bashani na wanu wake walawa waghenda kwitowa nawo ako Edirei. 34 Lekeni IMNDEWA kamlongela Musa. "Uleke kumpfuka, kwaapfila nene nitsokwapfila umtowe yeye na wanu wake wose na isi yake yose, na umtende ka pfaumtendile mfalume Sihoni wa Waamori iyakalile mna isi ya Heshiboni." 35 Apfo Waisiraeli wamkoma mfalume Ogu, ne wanaghe ne wanu wake wose, tsakuduhu munu iyalekighwe mghima. Na waisola isi yake iwa yawo.