1 Apfo IMNDEWA kamlongela Aruni, "Ghamatotso ghose ghawotenda iwanu hanu henzeluke ghendo ghatsakuwa ghako ghweghwe na wanagho na lukulo lwa aba wako, na ghamatotso ghose igholawila mna ing'onde ya ukutambika ghatsakuwa ghako ghweghwe na wanagho na lukolo lwako lwose. 2 Pfipfila waghaleni ndughu tsenu wa kabila lya Lawi watse wamwapfileni ahala ghweghwe na wanagho hamsang'ana hambele ha Lihema Lienzeluke. 3 Wao watsosang'ana tsing'onde tsautsoweng'a na atsila tsa lihema, lekeni waleke kupfisoghelela ipfinu pfose pfa hanu haenzeluke ghendo, wala ichikongo, hela watsakufa wao na mwemwe. 4 Nawo wetselunga naghwe, na kukwapfila kusang'ana ng'onde tsose itsili mna Lihema Lienzeluke, na munu muhenza yaleke kuwasoghelela habehi. 5 Mwemwe wenyegho mtsotenda tsing'onde tsa hanu haenzeluke ghendo na tsing'onde tsa hane matsabahu, hela imaya yangu ileke kuwalawila keli. 6 Nene mwenyegho niwasaghula Walawi wayenu kulawa mna Waisiraeli wawe ka ghweko kuna mwemwe, wasang'ane ng'onde tsa Lihema Lienzeluke. 7 Lekeni ghweghwe na wanagho mtsosang'ana ng'onde tsose tsa ukutambika tsa matsabahu, na pfose ipfili hanu haenzeluke ng'ani. Nomwing'ani ing'onde ino ya ukutambika ka ghweko. Imunu wowose iyali si mtambika baye yang'asoghelela habehi katsakomighwa."

8 IMNDEWA kamlongela Aruni, "Nikusaghula ghweghwe wimile ipfinu pfose pfawongaya Waisiraeli, pfose ipfenzeluke pfawongalila iwanu wa Isiraeli. Nokwing'a pfinu pfose ghweghwe na wanagho pfiwe bughulu lyenu, na apfo pfitsakuwa pfenu matsuwa ghose." 9 Ipfinu pfino pfenzeluke ghendo, apfila ing'apfilakatsighwa baye mmoto, apfo pfitsakuwa pfenu ka tsinambiko tsa usaghe, tsinambiko itsilapfighwa tsileghuse nzambi na tsinambiko tsa maliho itsilapfighwa tsileghuse matotso. Chila chinu iwanu chawondapfila chiwe nambiko yenzeluke, chakuwa chakwako na wanagho. 10 Mpfije pfinu pfino ka pfinu pfenzeluke ng'ani, iwamale waliyeka wawo iwatsakuja, pfinu apfo pfenzeluka ghendo kuna mwemwe. 11 Pfipfila pfinu pfingi pfose Waisiraeli pfawondapfila nene ka nambiko tsa kwinulighwa pfitsakuwa pfenu. Nokwing'a ghweghwe na wanagho wamale na wapinga pfiwe pfenu matsuwa ghose. Munu wowose iyelile mna ing'anda yako kodaha kuja pfinu apfo. 12 Nokwing'a pfijo pfose ipfinoghile Waisiraeli pfawolimbula na kundapfila nene ka apfila ghamapfuta, idipfai na ingano. 13 Chila chijo ichikwipfa iwanu chawolimbula mna imighunda na kungalila nene, chakuwa chako. Imunu wowose yelile mng'anda mwako kodaha kuja. 14 Chila chinu ichibaghulighwe chilapfighwe kwe Imulungu mna isi ya Isiraeli, chose acho chitsakuwa chako. 15 "Chila chipfughula inda, yawe we munu au we imnyama, chawomlapfila IMNDEWA, kakuwa wako. Lekeni kobamighwa umghombole imwana chaudele we munu na ayula we imnyama ing'ayelile baye. 16 Pfipfughula inda awo woghombolighwa wang'awa na mwetsi ghumwe kulawa hawoneke, ulihe pfihande pfitano pfa fetsa, kwa kulola ipfinu pfa kulingila ipfili mna Lihema Lienzeluke. 17 Lekeni iwopfughula inda we ng'ombe na we ng'olo, na ayula we imene waleke kughombolighwa, kwaapfila awo wenzeluka. Idamu yawo uimwaghe hane matsabahu na ghamapfuta ghao ughalakatse ghawe nambiko ya kulakatsighwa, na ukulakatsighwa ako kumnung'ila ghoya IMNDEWA. 18 Inyama yawo yakuwa yenu, ka apfila ichidali na lihatsa lya mghulu wa kuchughu ghwa kujilo. 19 Nitsokwing'a ghweghwe na wanagho wamale na wapinga ipfinu pfose pfawondapfila iwanu wa Isiraeli, liwe bughulu lyenu matsuwa ghose. Lilaghano lino lyanikwika na ghweghwe ne watsukulu wako litsokala matsuwa ghose." 20 IMNDEWA kamlongela Aruni, "Ghweghwe ng'utsobokela isi yoyose baye iwe yako wala ng'utsohangila nawo baye imali mna wao, nene yuyo libughulu lyako, naghwe kutsonihala nene kune iwana wa Isiraeli."

21 Nawo Walawi niweng'a tsaka tsose tsawondapfila Waisiraeli tsiwe tsao. Agho maliho kwa sang'ano tsawosaang'ana tsa Lihema Lienzeluke. 22 Kulawa sambi iwanu wa Isiraeli waleke kulisoghelela Lihema Lienzeluke, hela wotenda nzambi na wakufa. 23 Lekeni Walawi waliyeka wawo iwobamighwa wasang'ane mna Lihema Lienzeluke, na totso ililawila amo, alyo lyenu. Ghumwiko ghuno ghutsakuwa ghwa ghamatsuwa ghose mna pfeleko pfenu pfose ipfikutsa. Nawo ng'awatsobokela isi yoyose baye iwe yao mna Waisiraeli, 24 kwaapfila niweng'a tsaka tsose tsawondapfila Waisiraeli tsiwe nambiko ya kwinulighwa. Apfo tsaniwalongela, "Mna iwanu wa Isiraeli, mwemwe ng'amtsobokela isi yoyose baye iwe yenu."

25 Kuya IMNDEWA kamlongela Musa, 26 Walongele Walawi pfino, "Hamtsobokela itsaka kulawa kwa Waisraeli yaniweng'ileni mwemwe iwe yenu, namwe mwobamighwa mumlapfile IMNDEWA tsaka kulawa mna tsitsaka atso tsambokele tsiwe nambiko. 27 Inambiko ayo itsotogholighwa ka nambiko ila ya kulimbula ye pfijo au ka nambiko ya dipfai iyondapfila Muisiraeli yungi. 28 Apfo mwobamighwa mumghalile IMNDEWA tsaka kulawa kuna tsisaka tsose tsambokela kulawa kwa Waisiraeli. Itsaka ayo yamndapfila nene mtsomwing'a mtambika Aruni. 29 Mghalileni itsaka ibaghulighwe iwe ya IMNDEWA kulawa mna pifnu pfinoghile na pfenzeluke pfamwing'ighwe. 30 Apfo uwalongele, ‘Hamtsonilapfila apfila ipfinoghile kubita pfose pfiwe nambiko, apfila ipfitsokala pfitsakuwa pfenu. Nene nitsomanya ka inambiko ayo ilawa mna pfijo pfenu wenyegho na ilawa mna dipfai yenu wenyegho. 31 Namwe mtsakuja hanu hohose hala, mwemwe na iwanu wa mng'anda mwenu mwose, agho maliho ghenu kwa sang'ano yamtenda mna Lihema Lienzeluke. 32 Ng'amtotsa baye mwemwe mng'aja pfinu apfo ka mumlapfila IMNDEWA ipfinu pfinoghile kubita pfose. Mleke kupfitenda pfiwe pfiha hambele he IMNDEWA pfinu apfo pfawondapfila Waisiraeli hela mtsakufa.’"