1 Mna mwetsi ghwa mwanduso ghwa mwaka ghwa keli Mtwatsa Imulungu tsakalonga na Musa mna nyika Sinai ahala Waisiraeli hawalawile Misiri. Kalonga, 2 "Waisiraeli wadeng'elele chihungo cha Pasaka ka pfaikighwe." 3 Aino itsakuwa nemihe mna litsuwa lya kumi na nne lya ghumwetsi ghuno, ka imiko na malaghitso pfagholonga. 4 Apfo Musa kawalongela iwanu wadeng'elele chihungo che Pasaka. 5 Na wadeng'elela chihungo cha Pasaka nemihe mna litsuwa lya kumi na nne lya ghumwetsi ghwa mwanduso mna nyika ya Sinai. Waisiraeli watenda ghose ka IMNDEWA pfayamlaghitse Musa. 6 Lekeni wamwenga ng'awadeng'elele baye Ipasaka mna litsuwa alyo, kwaapfila tsawakinda mauti, tsaweha hambele he Imulungu. Awo tsawawaghendela Musa na Aruni, 7 walonga, "Twetwe twiha kwaapfila tukinda mauti, lekeni ebali tughomighwa tuleke kumlapfila IMNDEWA nambiko tsake ka pfaikighwe hamwe na Waisiraeli wangi?"

8 Musa kawedika, "Mbete tanu mbaka ahala hanitsopata malaghitso ghenu kulawa kwe IMNDEWA."

9 Naye IMNDEWA kamlongela Musa, 10 "Walongele pfino Waisiraeli, ‘Munu yumwe kulawa mna mwemwe au yumwe wa watsukulu wenu yang'awa keha kwaapfila kakinda mauti au yang'awa ka kutali mna ghumwanza, lekeni kobama yadeng'elele chihungo cha Pasaka, 11 imunu ka ayo kobamighwa yatende apfo ahala mwetsi ghumwe haghubita, nemihe ya litsuwa lya kumi na nne lya ghumwetsi ghwa keli. Katsodeng'elela kwa kuja pfighate pfilihela hamila na mbogha tsili usungu. 12 Waleke kuleka chijo chochose mbaka nemitondo, wala kubena mpate ghwe mnyama wa Pasaka. Watsotenda chihungo chino che Pasaka kwa kukinda malaghitso na imiko yake yose. 13 Lekeni munu wowose yelile au ng'ali mna ghumwanza baye, ka ng'adeng'elele chihungo cha Pasaka, imunu ayo katsobaghulighwa ne wanu wake kwaapfila ng'andapfile nambiko ka pfaikighwe. Ayo yahighighwe kwe nzambi yake iyatendile. 14 Ka hana muhenza kokala hamwe namwe na kobama yanendele chihungo cha Pasaka, imunu ayo yatende pfipfo kwa kukinda imiko na malaghitso ghose gha Pasaka. Chila Munu yang'awa muhenza au mwenyekaye yawinze malaghitso ghaghala.’ "

15 Litsuwa alila Lihema Lienzeluke halihimikighwe, libingu lihulumka lighubika Lihema. Nechilo libingu alyo tsalyoneka ka moto mbaka nemitondo. 16 Apfo pfipfo tsa pfaili chila tsuwa, libingu halighubike lihema nemisi na nechilo tsalyoneka ka moto. 17 Libingu halinulighwe mchanya mwe Lihema, Waisiraeli tsawamwagha indalo na watsenga ndalo ahala libingu halimile. 18 Tsawamwagha indalo kwa kuwinza malaghitso gha IMNDEWA, na tsawatsenga keli indalo kwa kuwinza malaghitso ghake. Matsuwa ghose libingu halikalile mchanya mwe Lihema iwanu tsawakala mna indalo ayo. 19 Hata ka libingu alyo tsalikala mchanya mwe Lihema kwa matsuwa mengi, Waisiraeli tsawamuhulikitsa IMNDEWA, apfo ng'awokile baye. 20 Hata ka libingu alyo tsalikala mchanya mwe Lihema matsuwa chidogho, Waisiraeli tsawakala mna ndalo ka IMNDEWA pfayawalaghitse. 21 Matsuwa ghangi libingu alyo tsalikala mna Lihema kulawa nemihe mbaka nemitondo hela. Na halinulighwe tsawandusa ghumwanza. 22 Ka libingu tsalikala mchanya mwe Lihema kwa matsuwa meli, mwetsi ghumwe, mwaka ghumwe na kughendelela, Waisiraeli ng'awokile baye, lekeni halinulighwe nawo pfipfila wenuka woka. 23 Tsawatsenga indalo na kumwagha indalo kwa kuhulikitsa malaghitso ghe Imulungu ka IMNDEWA pfayawalaghitse kubitila Musa.