1 IMNDEWA kamlongela Musa na Aruni, kalonga, 2 Alino laghitso lyayatulaghitse IMNDEWA, Uwalongele Waisiraeli wakughalile ing'ombe pinga iyali mdung'u iyenelele na ng'ana yanduse ng'onde yo kulima. 3 Namwe mmwing'e mtambika Eliazali ing'ombe ayo, naye yamsole na yamghale kunze kwe ndalo, na munu yumwe yamsubutule hambele hake. 4 Kuya Mtambika Eliazali yaditse mna idamu ayo kwa chidole chake, na yaimitse mala saba, kwakulola ubali wa hambele we Lihema lienzeluke. 5 Ing'ombe ayo yalakatsighwe aku Imtambika kolola, chila chinu chake chitsolakatsighwa, iwe ngotsi, inyama, idamu au iwe mipfi yake. 6 Kuya Imtambika yasole lubiki lwa mweletsi, putila lya hisopo, na nyutsi ndung'u, yapfase mna ghumoto aghwo ighumlakatsa ing'ombe. 7 Kuya mtambika yatsapfe maghwanda ghake, na yoghe mmatsi, kuya kodaha kwingila kune ndalo. Naye imtambika katsakuwa keha hambele he Imulungu mbaka nemihe. 8 Na imunu iyamlakatse ing'ombe ayo naye yatsapfe magwanda ghake na yoghe mmatsi, naye katsakuwa keha hambele he Imulungu mbaka nemihe. 9 Imunu yelile yatsole ilipfu lye ng'ombe ayo, na yalyike ghoya hanu hanoghile kunze mwe ndalo, yawekile Waisiraeli lipfu alyo, nawo watsolihanganya ne ghamatsi, nagho ghakuwa matsi gha kuleghusila inzambi ghumtingano ghwose ghwa Isiraeli. 10 Imunu iyotsola ilipfu alyo yatsapfe ghamagwanda ghake, naye katsakuwa keha hambele he Imulungu mbaka nemihe. Laghitso lino liwe lya matsuwa ghose kwa wanu wa Isiraeli, na kwa imhenza iyokala nawo.

11 Imunu yang'akinda lukuli lwa munu yafile kakuwa keha kwa matsuwa saba. 12 Naye yehopfughe mna litsuwa lya kadatu na lya saba kwa ghamatsi ghagho ghokuleghusila nzambi, na baho kakuwa kela. Lekeni ka ng'ehopfugha baye mna litsuwa lya kadatu na lya saba, ayo kakuwa keha. 13 Imunu wowose iyokinda lukuli lwa munu yafile, naye ng'ehopfugha baye, imunu ayo kolitenda Lihema lya IMNDEWA lihe, ayo yabaghulighwe yakale kutali na wanu Waisiraeli. Munu ayo keha ghendo kwaapfila ng'awammitsile baye ghamatsi ghala gho kuleghusila nzambi.

14 Mtende chihendo chino ahala imunu yang'afila mghati mwe chibumbulika, imunu wowose iyakwingila na ayula iyali mumo ahala imunu hayafile, munu ayo katsakuwa keha hambele he Imulungu kwa ghamatsuwa saba. 15 Chiya chochosse chili mwatsi, ichilihela chighubiko, acho nacho chakuwa chiha. 16 Imunu wowose iyokinda lukuli lwa munu iyakomighwe au ayula iyafile mwenyegho kunze kune mighunda, au yang'akinda imipate ye munu au likabuli, munu ayo keha kwa ghamatsuwa saba. 17 Kwa ajili ya iwanu awo wehile watsosola ilipfu lye ing'ombe yula mdung'u iyalakatsighwe yaleghuse tsinzambi, lipfu alyo yalihanganye ne ghamatsi gha kumto ighali mchiya. 18 Imunu yelile katsosola putila, na yaliditse mna ghamatsi agho, kuya yachimitsile chibumbulika, pfiya pfose pfili mghati mwe chibumbulika na wanu wose iwali mghati amwo. Pfipfila yammitsile imunu iyakindile imipate ye munu au iyakindile ilukuli lwa imunu iyakomighwe au wa munu iyafile mwenyegho au iyalikindile likabuli. 19 Imunu yelile katsommitsila imunu yehile mna litsuwa lya kadatu na lya saba, apfo mna litsuwa lya saba imunu kakuwa kela, naye yatsapfe ghamagwanda ghake na yoghe mna ghamatsi, na nemihe haipfika kakuwa kela. 20 Lekeni ka imunu ayo yehile ng'ehopfugha baye, ayo yabaghulighwe yakale kutali na mtingano wa wanu wa Isiraeli, kwaapfila kalitenda Lihema lya lihe. Kwaapfila ng'emitsile baye mwenyegho ghamatsi ghala igholeghusa inzambi, apfo keha. 21 Alino litsakuwa laghitso lyao lya ghamatsuwa ghose. "Imunu iyomitsa ghamatsi gho kuleghusila nzambi naye yatsapfe ghamagwanda ghake, na ayula iyokinda ghamatsi agho kakuwa keha hambele he Imulungu mbaka nemihe. 22 Na chinu chochose chayokinda munu yehile nacho chakuwa chiha, na imunu yungi wowose iyochikinda ichinu acho, naye kakuwa keha mbaka nemihe."