1 Lelo iwanu wandusa kumsing'inikila IMNDEWA kwa maghayo ghawang'ali wopata. IMNDEWA hayahulike tsakaghudubuka ng'ani, apfo kawaghalila moto. Ghumoto agho tsaghwaka haghati hao na ghulakatsa ubali umwe we ndalo. 2 Apfo iwanu wamlilila Musa ili yawapfile. Naye Musa kamlomba IMNDEWA Imungu, na baho ghumoto ghutsimika. 3 Apfo ihanu aho tsahakemighwa Tabera, maana yake kulakatsa, kwaapfila aho ghumoto tsaghuwalakatsa iwanu.

4 Tsahana kingili limwe lye iwanu iling'ali likwanga na Waisiraeli. Kingili alyo lye iwanu tsalina batsu kulu lya kuja inyama. Nawo Waisiraeli walila walonga, "Tupata kwani inyama yo kuja?" 5 "Twokumbuka iwasomba, ghamaghitsi, ghamatikiti, tsimbogha, ipfitungulu, ne pfitungulu swaumu pfatujile akula Misiri bila kughula! 6 Lekeni sambi twahela ngupfu, haduhu chijo chingi ila mana iliyeka!" 7 Mana tsa pfaili ka mbeghu ya uhemba, ne langi yake nzelu ihanganyighwe na njano. 8 Iwanu tsawatsungulukatsunguluka kuikunga, kuya tsawaisagha kwe ghamabwe au matuli, kuya tsawaitoghosa mna pfiya na kutengenetsa maandatsi. Ung'aja mwidomo ka maandatsi ghatsingighwe kwa mapfuta. 9 Nechilo litungwe halilaghale mna ndalo, imana nayo tsailaghala hamwe ne litungwe. 10 Musa tsakahulika iwanu wose pfawang'ali wolila, chila munu hane ghumlango ghwa indalo yake. Apfo IMNDEWA tsakaghudubuka ng'ani, naye Musa pfipfila tsakaghudubuka. 11 Kuya Musa kamlongela IMNDEWA, "Ebali unitendela pfihile nene mtumighwa wako? Mbona ng'unitoghola baye? Ule ungayile mtsigho gho kuwalela iwanu wose wano? 12 Angu yaniweleke nene mbaka unongele niwabape mna mambagha yangu ka apfila mai pfayobapa imwana yoneke sambi, na kuwahilika mbaka kune isi yaulongile koweng'a tsina aba tsao?. 13 Nitsopata kwani inyama yo kuweng'a iwanu wose wano? Kwaapfila wonilila wolonga, ‘Utwing'e inyama tuje!’ 14 Nene sidaha baye kuwaghala iwanu wose wano niliyeka, aino sang'ano ng'omu ng'ani kuna nene! 15 Ka apfino pfipfo pfaunitenda, nokulomba, ng'apfu unikome, ka kombonela libatsi, lekeni uleke kunileka nighendelele kughaya."

16 Kuya IMNDEWA kamlongela Musa, "Uwalongele iwanzehe sabini wa Isiraeli wetingane hamwe, awala wauwona wotogholighwa na wohulikitsighwa ne iwanu, uwaghale hane Lihema lya Kwitinganila, weme habei na ghweghwe. 17 Nitsohulumka hasi na kulonga na ghweghwe, nitsosola ghumuhe chidogho ghwanikwing'ile ghweghwe niweng'e iwanu awo. Nawo watsokwapfila kuwalela iwanu wano hamwe naghwe, ili uleke kughala mtsigho ghuno uliyeka. 18 Lelo uwalongele iwanu pfino, ‘Ilupfi mwitende mwele kwaapfila mtsakuja inyama. IMNDEWA kahulika pfamng'ali mlila no kulonga, haduhu wo kumwing'ani inyama na ng'apfu mng'akalile Misiri.’ Lelo Mtwatsa Imulungu katsomwing'ani inyama namwe mtsoija. 19 Ng'amtsakuja inyama kwa tsuwa limwe, au matsuwa meli, au matsuwa matano, au matsuwa kumi, au matsuwa ishilini, 20 ila kwa mwetsi mghima! Mtsakuja mbaka iwabwikitse. Agho ghose ghatsolawila kwaapfila mumlema IMNDEWA iyali hano mna mwemwe, no kulila hambele yake no kulonga, ‘Ebali tulawile Misiri?’"

21 Lekeni Musa kamlongela IMNDEWA, "Ahano iwanu iyaniwalongotsa iwoghenda kwa maghulu laki sita, naghwe kolonga, ‘Nitsoweng'a inyama yo kuwenela mwetsi mghima!’ 22 Angu wang'ombe na wang'olo wang'achinjighwa watsowenela? Angu lelo iwasomba wose wa mwibahali walowighwe kwaajili yawo?" 23 IMNDEWA kamwidika Musa, "Angu nene sidaha baye? Lelo kutsakona ka ghanilonga ka ghatsolawila au baye." 24 Apfo Musa kaghenda kuwalongela aghala ghayalongile IMNDEWA. Kuya kawalongela wanzehe sabini iwali pfilongotsi wetingane hamwe kulawa mna wanzee wala, kaweka walitsunguluke lihema. 25 Baho IMNDEWA kahulumka kulawa mna libingu kalonga naye. Kuya kaweng'a wanzee wala sabini Muhe ghughula ghwayamwing'ile Musa. Muhe haghuwengile iwanzehe awala, wandusa kulonga aghala ghayaweng'ile Imuhe, lekeni tsawatenda apfo mala lumwe hela. 26 Wanzehe weli iwasaghulighwe na Musa, tsa Elidadi na Medadi, tsawakala kune ndalo, wayao hawaghendile kune Lihema. Muhe ghuwahulumkila ghwandusa kulonga mbuli yawalongele IMNDEWA. 27 Msongolo yumwe katsuma kaghenda kumlongela Musa, "Elidadi na Medadi wolonga mbuli tse IMNDEWA kune ndalo." 28 Baho imwana wa Nuni yokemighwa Yoshua iyang'ali yomwapfila Musa kulawa hayakalile mdodo, kamlongela Musa, "Mndewa wangu, uwaghome!" 29 Lekeni Musa kedika kalonga, "Pfii kombonela chepfu? Ng'apfu IMNDEWA yang'aweng'ile iwanu wose Muhe ghwake nawo wawe manabii!" 30 Kuya Musa na wanzehe awala wa Isiraeli, woya kune ndalo.

31 Hambele IMNDEWA kaghala libeho kwa ukwidukitsa, libeho alyo lighala wang'wale kulawa kune ibahali. Kawatenda waghwe kutsunguluka indalo. Tsawelundika utali wa futi ndatu kulawa hasi mbaka uchanya. Wang'wale awo tsawamema kutsunguluka indalo kwa ghumwanza ghwa tsuwa limwe chila ubali. 32 Pfipfila mna litsuwa alyo lyose, iwanu wang'ali woghogha iwang'wale chilo chighima mbaka ilupfi yake. Chila munu tsakaghogha kulawa kilo elufu imwe na kughendelela. Tsawawanzatsa chila hanu hambalimbali he indalo ili wanyale. 33 Lekeni inyama haikalile ing'ali nyingi, IMNDEWA kawonela maya iwanu, kaweng'a utamu mkulu. 34 Apfo ihanu aho tsahakemighwa Kibroti Hataava, mana yake "Makabuli gha umelo" Kwaapfila ako kuko kwawatsikighwe iwanu wane umelo. 35 Kulawa Kibroti Hatava iwanu waghenda mbaka Hazeroti, kuko weka indalo yawo na kukala.