1 Atsino hano tsiso isi Waisiraeli tsawemile weke ndalo ahala hawalawile Misili aku wamna ghamakingili ghao gha tsikolo, na kulongotsighwa na Musa na Aruni. 2 Na Musa kandika isi tsawemile weke ndalo mna ghumwanza ghwao, ka IMNDEWA pfayamlaghitse, na ghumwanza ghwao ghwima mna isi tsino. 3 Waisiraeli tsawoka mna ghumji kwa Ramesesi mna tsuwa lya kumi na tano mna ghumwetsi ghwa kwanza, tsuwa lya keli ahala ichihungo cha Pasaka hachimalile. Tsawoka kwa ingupfu ye Imulungu aku Wamisili wose wolola. 4 Aku Wamisiri wang'ali wowatsika iwana wao chaudele, awala IMNDEWA iyawakomile. Pfipfila Imulungu tsakaihinya imilungu yawo.

5 Apfo Waisiraeli tsawoka Rameseli, wapfika Sukoti, kuko weka indalo yawo. 6 Tsawoka kulawa Sukoti waghenda kwika ndalo yawo ako Etamu, ako mmbalimbali mwe inyika. 7 Walawa Etamu, wahunduka woya Pi Hahiloti, ubali wa mashaliki wa Baali Sefoni, kuko weka ndalo yao habehi na Migidoli. 8 Woka Pi Hahiloti, wang'a mna ibahali ya Shamu mbaka wapfika mna inyika Etamu, tsawaghenda mna inyika ayo kwa matsuwa madatu mbaka wapfika Mala, kuko weka ndalo yao. 9 Kulawa Mala, tswaghendelela na ghwamwanza ghwao mbaka wapfika Elimu, kuko Elimu tsakuna mbwibwi kumi na mbili, na mibiki ya mitende sabini, kuko Elimu weka ndalo yawo. 10 Woka kulawa Elimu, na waghenda kwika indalo yao habehi na ibahali ya Shamu. 11 Kulawa Ibahali ya Shamu, tsawaghenda kwika indalo mna inyika ya Sini. 12 Kulawa inyika ya Sini tsawapfika inyika ya Dofika, kuko weka ndalo yawo. 13 Kulawa Dofika waghenda kwika ndalo ako Alushi. 14 Tsawoka kulawa Alushi na waghenda kwika indalo ya ako Refidimu, ako Refidimu tsakuduhu ghamatsi gho kunwa iwanu. 15 Tsawoka Refidimu, waghende kwika indalo yao mna inyika ya Sinai. 16 Woka kulawa mna inyika ya Sinai, waghenda kwika indalo yao ako Kibroti Hataava. 17 Kulawa Kibroti Hataava, waghenda kwika indalo yawo ako Haseloti. 18 Woka Haseloti, na waghenda kwika indalo yao ako Ritima. 19 Tsawoka kulawa Ritima na wapfika Limoni Pelezi, kuko weka ndalo yao. 20 Kulawa Limoni Pelezi, tsawaghenda kwika ndalo yao ako Libina. 21 Kulawa Libina tsawaghenda kwika ndalo yao ako Lisa. 22 Tsawoka kulawa Lisa na waghenda kwika indalo yao ako Kehalata. 23 Kulawa Kehalata, tsawaghenda kuchidunda Shefeli, na kuko weka ndalo yao. 24 Kulawa kuchidunda Shefeli tsawaghenda kwika indalo yao ako Halada. 25 Na woka kulawa Halada waghenda Makeloti, ako nako weka indalo yao. 26 Kulawa Makeloti waghenda kwika indalo yao ako Tahati. 27 Woka kulawa Tahati waghenda kwika indalo yao Tera. 28 Kulawa Tera waghenda kwika indalo yao ako Mitika. 29 Woka kulawa Mitika, na wapfika Hashimona, kuko weka indalo yao. 30 Kulawa Hashimona waghenda kwika ndalo yao ako Moseroti. 31 Kulawa Moseroti waghenda kwika indalo yao ako Bene Yakani. 32 Woka ako Bene Yakani na wapfika Holi Hagidigadi, kuko weka indalo yao. 33 Kulawa Hori Hagidigadi tsawaghenda kwika indalo ako Yoti Bata. 34 Kulawa Yoti Bata waghenda kwika indalo yao ako Abirona. 35 Woka ako Abirona, waghenda Esioni Geberi, na kuko weka indalo yao. 36 Kulawa ako Esioni Geberi tsawaghenda na wapfika Kadeshi iili mna inyika ya Sini, kuko weka indalo yao. 37 Kulawa ako Kadeshi tsawoka mbaka wapfika kuchidunda Hori, kune ghumbaka ghwa isi ya Edomu. 38 Kwa laghitso lya IMNDEWA mtambika Aruni tsakagheluka kuchidunda Hori, na kuko kafa mna tsuwa lya mwanduso la mwetsi ghwa tano mna ghumwaka ghwa alubaini kulawa Waisiraeli hawalawile mna isi ya Misili. 39 Aruni tsakafa aku kana miyaka miya imwe na ishilini na midatu mna chidunda Hori. 40 Mfalume wa Aradi, Mkanaani iyakalile ubali wa Kusini wa isi ya Kanaani, tsakahulika ka Waisiraeli wang'ali wakutsa. 41 Kulawa chidunda Hori, waghenda kwika indalo yao Salimona. 42 Kulawa Salimona waghenda kwika indalo yao ako Punoni. 43 Woka ako Punoni na waghenda Oboti, kuko weka ndalo yao. 44 Kulawa Oboti waghendelela na ghwamwanza ghwao mbaka wapfika Lye Abarimu, kwaibakane na Moabu, kuko weka indalo yao. 45 Kulawa Lye Abaimu tsawaghenda kwika indalo yao Diboni Gadi. 46 Kulawa Diboni Gadi tsawaghenda na wapfika Almoni Diblataimu, weka ndalo. 47 Kulawa Almoni Diblataimu tsawaghendelela na ghumwanza ghwao mbaka wapfika mna pfidunda pfa Abalimu, habehi na chidunda Nebo, kuko weka ndalo yao. 48 Kulawa mna pfidunda pfa Abarimu, tsawaghenda kwika indalo yao mna ichiwala cha Moabu, kumwambu kwa ghumto ghwa Yoridani, habehi na Yeriko. 49 Tsaweka indalo habehi na ghumto ghwa Yoridani haghati ya Beti Yesimoti na lwanda lwa Abeli Shitimu.

50 Kuya IMNDEWA kalonga na Musa mna chiwala cha Moabu, kumwambu mwa ghumto Yoridani, habehi na Yeriko, kamlongela, 51 "Walongele Waisiraeli hawatsoloka ghumto ghwa Yoridani na kwingila mna isi Kanaani, 52 wawingeni wenye kaye wose we isi ayo ili hambele henu, mpfihinye pfinyagho pfao pfose pfa kusongola na apfila pfa kufina hanu hawotambikila. 53 Namwe mtsoisola is ayo iwe yenu na mtsokala mumo, kwaapfila niweng'a isi ayo iwe yenu. 54 Muighole isi ayo kwa kwasa tsisimbi mchanya tsilamle, lukolo lune wanu wengi lutsobokela hanu hakulu, na alula lune wanu chidogho lutsobokela hanu hadodo, tsisimbi tsing'amlaghalila munu wowose, aho hanu hakwake, mtsoisola isi kwa kulola tsikabila tsa aba tsenu. 55 Lekeni ka ng'amuwawinga baye wenyekaye we isi ayo, awala wamtsowaleka watsakuwa ka chibanzi mna tsinenge tsenu na ka mihonga mna tsimbapfu tsenu, nawo watsowasupfa mna isi ayo yamkala. 56 Na ka ng'amuwawinga baye nene nitsowatenda ka pfanibamile kuwatenda wao."