1 Kuya IMNDEWA kamlongela Musa, 2 "Umlongele Aruni pfino, hayatsakwika pfitasa pfila saba mna chighutso che pfitasa, yatsike ili tsilangatse ubali wa hambele he chighutso acho." 3 Aruni katenda ka pfayalaghitsighwe, keka ipfitasa pfila ili pfilangatse ubali wa hambele he chighutso che pfitasa, ka apfila Imulungu pfayamlaghitse Musa. 4 Chighutso che pfitasa tsachitengenetsighwa kwa nzahabu ihondighwe kulawa uchanya mbaka hasi, keka ipfitasa pfila ili pfilangatse ubali wa hambele we chighutso che pfitasa, ka apfila Imulungu Pfayamlaghitse Musa.

5 Kuya IMNDEWA kamlongela Musa, 6 "Uwabaghule Walawi kulawa mna iwanu wa Isiraeli kuya uwatende wele. 7 Apfino pfipfo pfautsowatenda wele, uwamitsile ghamatsi gho kuwatenda wele, kuya uwaghete lukuli lughima, watsapfe maghwanda ghao na wehopfughe wenyegho wele. 8 Kuya watsosola ngo'mbe yumwe mdoghodogho na nambiko ya usaghe, usaghe utighinike ghendo uhanganyighwe ne ghamapfuta, naghwe kutsosola mwana mmale yungi we ng'ombe kwa ajili ya nambiko ya kuleghusa nzambi. 9 Kuya kutsowalongela Waisiraeli wetingane hamwe na kuwaghala walawi hane Lihema Lienzeluke. 10 Hautsowaghala Walawi hambele hangu, Waisiraeli watsowekila mwitwi Walawi ghamoko ghawo. 11 Kuya Aruni katsoweka Walawi hambele hangu ka nambiko ya kwinulighwa kulawa kwa Waisiraeli ili wanitumikile. 12 Kuya Walawi watsakwika ghamoko ghawo mwitwi mwe wang'ombe awo, yumwe katsolapfighwa yawe nambiko ya kuleghusa nzambi na yungi yawe nambiko ya kulakatsighwa iilapfighwa kuna nene ili welamlitse ne Imulungu. 13 Kuya kutsowemitsa Walawi hambele ha Aruni ne wanaghe na kuweka hambele hangu ka nambiko ya kwinulighwa. 14 Apfi pfipfo pfautsowabaghula Walawi kulawa mna Waisiraeli wangi ili wawe wangu. 15 Hautsomalitsa kuwatenda Walawi wele na kuwatenda ka nambiko ya kwinulighwa, wodaha kwingila ili wasang'ane tsing'onde tse Lihema Lienzeluke. 16 Awa walapfighwa ili wawe wangu ghendo, wakale hanu ha wana chaudele wa Isiraeli. 17 Kwaapfila chila mwana chaudele iyali mna Isiraeli, ayo wangu, yawe we munu au we mnyama, kwaaapfila tsaniwatenda wele kwaajili yangu mna litsuwa lyaniwakomile iwana chaudele mna isi ya Misiri. 18 Lelo nowasola Walawi wakale hanu ha iwana chaudele wa Waisiraeli. 19 Na nimwing'a Aruni ne wanaghe ili wamwapfile kusang'ana mna Lihema Lienzeluke kwa ajili ya Waisiraeli na kuwalamlitsa ne Imulungu ili Waisiraeli waleke kutingwa ahala hawakwingila mna Lihema Lienzeluke." 20 Apfo Musa, Aruni na Waisiraeli wose wawahimika Walawi ka IMNDEWA pfayamlaghitse Musa. 21 Kuya Walawi wetenda wela kwa kwimitsila ghamatsi kulangusa ka watsileka nzambi tsawo, watsapfa maghwanda ghao, naye Aruni kawalapfa ka nambiko ya kwinulighwa hambele he IMNDEWA. Pfipfila Aruni kawatenda wele. 22 Hawamalitse kutenda apfo, Walawi waghenda kusang'ana ng'onde tsa Lihema Lienzeluke aku Aruni ne wanaghe wowalongotsa ka IMNDEWA pfayamlaghitse Musa.

23 IMNDEWA kamlongela Musa, 24 "Chila Mlawi yane miyaka ishilini na mitano na kughendelela, katsosang'ana mna Lihema lyangu Lienzeluke. 25 Na katsoleka kusang'ana hayatsopfika miyaka hamsini. 26 Lekeni kodaha kuwapfila Walawi wayaghe hawosang'ana mna lihema, ila ng'obamighwa baye yatende ng'onde yoyose yaliyeka. Apfi pfipfo pfautsowagholela Walawi tsisang'ano."