1 Kuya ghumtingano ghwose ghwe iwanu wa Isiraeili ghupfika mna inyika ya Sini mna ghumwetsi ghwa mwanduso, nawo weka indalo yawo ako Kadeshi. Hawang'ali wakuko, Miriamu tsakafa na wamtsika kuko. 2 Ihanu hawekile indalo tsahaduhu matsi, apfo iwanu wose wetingana hamwe hambele ha Musa na Aruni. 3 Baho iwanu wesonga na Musa na Aruni, walonga, "Ng'apfu ghendo tung'afile hamwe na ndughu tsetu hambele ha Lihema lye IMNDEWA. 4 Ule mwemwe mghughala ghumtingano ghwe IMNDEWA mna inyika ino? Mtughala kuno tufe na hamwe na mipfugho yetu. 5 Ebali mwemwe mtulapfa mna isi ya Misili na mtughala hanu hano hakame? Haduhu hanu ho kuhanda ingano wala itini wala makomamanga. Kuduhu ghamatsi gho kunwa twetwe" 6 Lelo Musa na Aruni woka hanu haghuli ghumtingano ghwe iwanu, na waghenda hane ghumlango ghwa Lihema Lienzeluke, wafunama mbaka pfihanga pfao pfidonza hasi, Baho ghumng'alo ghwe Imulungu ghuwalawila. 7 IMNDEWA kamlongela Musa, 8 "Sola ing'weku yako iili hane lisanduku lya laghano, kuya ghweghwe na ndughu yako Aruni, muwalongele Waisiraeli wetingane hamwe, naghwe ulilongele libambalawe lilapfe ghamatsi aku wolola kwa tsinenge tsawo wenyegho. Apfo kutsowalapfila ghamatsi kulawa kune libambalawe na uwanwese iwanu wose iwetingane hamwe wa Waisiraeli, hamwe na mifugho yawo." 9 Apfo Musa kaghenda kuisola ing'weku ila hambele ha IMNDEWA ka pfayalaghitsighwe. 10 Musa na Aruni wawalongela Waisiraeli iwetingane hamwe hambele ha libambalawe, naye Musa kawalongela, Lelo tegheletseni, mwemwe imtulema, angu tuwalapfileni ghamatsi kulawa mna libambalawe lino? 11 Kuya Musa kenula ghumoko ghwake na kalitowa libambalwe mala mbili, ghamatsi ghalawa mengi, ghumtingano ghwose ghwe wanu ghunwa na mifugho yawo nayo inwa. 12 IMNDEWA kamlongela Musa na Aruni, "Kwaapfila mwemwe ng'amnitoghole nene baye, na ng'amndekile nilanguse ngupfu tsangu kwa Waisiraeli, wala ng'amnitendile baye mboneke nyenzeluka hambele he tsinenge tsa wanu wa Isiraeli, apfo mwemwe ng'amtsoghughala baye ghumtingano ghuno ghwe wanu kune isi yaniweng'ile." 13 Ghamatsi ghano matsi gha Meriba, kwaapfila iwanu wa Isiraeli tsawesonga na Imulungu, naye kelangusa kenzeluka mna wao.

14 Kuya Musa katuma iwanu kulawa Kadeshi, waghende kwa mfalume wa Edomu, na kamlongela "Ghweghwe koghamanya twetwe ndughu tsako Waisiraeli ghamaghayo ghose ghatughanzike, 15 apfila wahenga wetu pfawahulumke na kughenda Misiri, na twetwe tukala ako miyaka mingi. Wamisiri tsawatutendela ghehile ng'ani, twetwe na aba tsetu, 16 tumlilila IMNDEWA, naye katuhulika, kamtuma imalaika katsa kutulapfa Misiri, na twetwe twahano Kadeshi, ghumji ighubakane na isi yako. 17 Lelo tokulomba utulekelele tubite mna isi yako. Ng'atutsobita mna imughunda yenu baye wala ahila ya mitsabibu, wala ng'atukunwa baye ghamatsi gha pfisima pfenu. Tutsowinza nzila ng'ulu ya mfalume, na tutsolumbilila bila kubaghuka kujilo wala kumoso mbaka hatutsolawa mna isi yako." 18 Lekeni imfalume wa Edomu kawedika, "Baye, ng'amtsobita baye mna isi yangu, na ka mobita nitsolawa na kuwatowa." 19 Waisiraeli wamwidika, "Twetwe tutsowinza nzila ng'ulu. Ka imifugho yetu ing'anwa ghamatsi ghenu, twetwe tutsoliha, chatulomba utulekelele tubite kwa ghamaghulu ghetu wala ng'atubama chinu chingi baye." 20 Mndewa wa Edomu kawedika keli, "Ng'atuwalekelela mwang'e baye." Na baho, Waedomu wane ngupfu walawa waghenda kwitowa nawo. 21 Apfo Waedomu tsawalema kuwalekelela Waisiraeli wang'e mna isi yawo, Waisiraeli wahunduka kwang'a nzila ingi.

22 Waisiraeli wose tsawalawa Kadeshi, na wapfika kuchidunda Hori ichili mna ghumbaka ghwa Edomu. 23 IMNDEWA kamlongela Musa na Aruni kune chidunda cha Hori. 24 "Aruni katsakufa, ng'atsakwingila baye mna isi yaniweng'ile Waisiraeli, kwaapfila mwemwe weli tsamlema kulikinda laghitso lyangu akula Meriba. 25 Umsole Aruni na mwanaghe Eliazali uwaghale akuno kuchanya kune chidunda cha Hori. 26 Kuya umtsule Aruni magwanda ghake gho kutambikila, na umpfatse mwanaghe Eliazali. Aruni katsakufila kuchidunda." 27 Musa tsakatenda ka IMNDEWA pfayamlaghitse. Wose wadatu wagheluka kuchidunda aku iwanu wose wowalola. 28 Kuko Musa kamtsula Aruni maghwanda ghake gho kutambikila, kampfatsa imwanaghe Eliazali, na Aruni kafa kuko kuhanu ha ukutambikila kwe chidunda. Kuya Musa na Eliazali wahulumka kulawa kuchidunda. 29 Ghumtingano ghwose ghwa iwanu haghuhulike ka Aruni kafa, iwani wose wa Isiraeli tsawadomboketsa kwa matsuwa selasini.