1 IMNDEWA kamlongela Musa, 2 "Uwoyitsile Wamidiani aghala ghawawatendele Waisiraeli, kuya ghweghwe hambele kutsohupa." 3 Musa kalonga ne wanu, kawalongela pfino, "Muweke iwanu wakale ghoya kwe ng'ondo, waghende wakawatowe Wamidiani, wakoitse achila Wamidiani chawawatendile hambele he IMNDEWA. 4 Chila kabila lya Isiraeli lighale wanu elufu imwe, waghende kung'ondo." 5 Apfo wanu elufu imwe tsawalawa mna chila likabila lya iwanu wa Isiraeli, na wapfika wamale elufu kumi na mbili iwakalile ghoya kwe ng'ondo. 6 Kuya Musa kawatuma waghende kung'ondo aku walongotsighwa na Finehasi, mwanaghe mtambika Eliazali. Naye tsakaghenda aku kasola ipfinu pfa hanu henzeluke na tsimalati tsokukemela ing'ondo. 7 Tsawawatowa Wamidiani ka IMNDEWA pfayamlaghitse Musa, na wawakoma wamale wose. 8 Na wafalume watano wa Midiani tsawakomighwa hamwe na iwanu awo, wafalume awo tsa Ewi, Rekemu, Suri, Huri, na Reba. Pfipfila tsawamkoma Balamu mwana wa Beoli. 9 Iwanu wa Isiraeli tsawawaghogha iwapinga wa Midiani na iwana wao, na wawaboka wang'ombe na wang'olo wao, na tsimali tsao tsose, na kuka nawo. 10 Walakatsa imiji yawo na tsikaye tsawo tsose tsawang'ali wokala, na pfibumbulika pfao pfose. 11 Tsawoka na tsimali tsawabokile, ne wapinga ne wana iwawaghoghile, na tsawasola na mipfugho yawo. 12 Tsawawaghala iwapinga ne wana wao, na tsimali tsao na mipfugho yawo kwa Musa na Eliazali na kwe Waisiraeli wose iwekile ndalo yawo mna isi ya chiwala ili Moabu, kumwambu kwa Yoridani ako Yeriko.

13 Musa na mtambika Eliazali, na pfilongotsi wose wa Waisiraeli tsawalawa mna indalo yao, waghenda kuwabokela iwanu iwalawile kung'ondo. 14 Musa kawonela maya wakulu na pfilongotsi iwawemile iwanu wala iwoyile kulawa kwing'ondo. 15 Musa kawaghutsa, "Ule mwemwe muwaleka waghima iwapinga wano wose?" 16 Mlole, awano tsawawo iwategheletse achila chayalongile Balamu, kuwahonza Waisiraeli wamtendele Imuulungu nzambi akula Peoli, mbaka utamu wihile uwatsila iwanu we IMNDEWA. 17 Apfo muwakome iwana wose wamale na chila pinga iyamanyile kuwasa na mmale. 18 Lekeni mleke kuwakoma iwapinga wose awala ng'ana wawase na mmale baye, muwaleke waghima, awo wakuwa wenu mwemwe muwenyegho. 19 Awala wose iwokomile imunu au iwakindile ilukuli lwe munu yafile wobamighwa wakale kunze kwe ndalo kwa ghamatsuwa saba, mwihopfughe mwemwe muwenyegho hamwe ne wanu wamuwaghoghile, mna litsua lya kadatu na lya saba. 20 Pfipfila mghatende maghwanda ghenu ghele, liwe ghwanda litengenetsighwa kwa ngotsi, kwa mighala ya mene, au kwa mighome. 21 Kuya imtambika Eliazali kawalongela iwamale wose iwoyile kulawa kung'ondo, "Alino laghitso lila IMNDEWA lyayamwing'ile Musa. 22 Lekeni mabwe gha nzahabu, gha fetsa, gha shaba, gha chuma, gha bati, na gha lisasi, 23 chochose chila ching'ekighwa mmoto ing'achilakala baye, acho chakuwa chela kwa kulakatsighwa mmoto. Pfipfila pfobamighwa pfihopfughighwe kwa ghamatsi gha ukuleghusila nzambi. Chochose chila ching'ekighwa mmoto cholakala, acho uchihopfughe kwa ghamatsi agho. 24 Namwe mtsapfe ghamagwanda ghenu mna litsua lya saba, namwe mwakuwa mwela na mwodaha kwingila kune indalo."

25 IMNDEWA kamlongela Musa, 26 "Ghweghwe na mtambika Eliazali, na pfilongotsi wa iwanu wa Waisiraeli, mwobamighwa mpete pfinu pfose ipfibokighwe kwing'ondo ne iwanu ne iwanyama wose iwabokighwe. 27 Mpfighole pfinu apfo mna mabughulu meli, bughulu limwe liwe lya wamale iwaghendile kung'ondo, na lingi liwe lya wanu wose. 28 Kuya kulawa kune libughulu lyaweng'ighwe iwanu iwaghendile kwitowa, ubaghule itsaka iwe ye IMNDEWA, chinu chimwe kulawa mna chila miya tano, wawe wanu, ng'ombe, punda, ng'olo, au mene. 29 Umwing'e mtambika Eliazali iwe nambiko kwe IMNDEWA. 30 Kulawa mna libughulu lila liwe lya wanu wose, usole yumwe kulawa mna chila hamsini, wawe wanu, ng'ombe, pfihongwe, ng'olo au mene. Awo uweng'e Walawi iwosang'ana kuna lihema lya IMNDEWA." 31 Musa na Mtambika Eliazali tsawatenda ka IMNDEWA pfayamlaghitse Musa. 32 Ipfinu pfawabokile iwanu iwaghendile kwing'ondo tsa, mene na ng'olo laki sita na elufu sabini na tano, 33 tsa ng'ombe elufu sabini na weli, 34 tsa pfihongwe elufu sitini na imwe, 35 na pfigholi elufu selasini na weli, awo ng'ana wawase na mmale baye. 36 Na libughu lila lyibaghulighwe lyiwe lya iwamale iwaghendile kwitowa, tsalina mene na ng'olo laki ndatu, elufu selasini na saba, na miya tano, 37 Ng'olo miya sita na sabini na tano kulawa mna awo tsawalafighwa wawe wa IMNDEWA. 38 Kuya tsalina ng'ombe elufu selasini na sita, na ng'ombe sabini na weli tsawalapfighwa wawe wa IMNDEWA. 39 Na pfihongwe wao tsa elufu selasini na miya tano, na pfihongwe sitini na yumwe tsawalapfighwa wawe wa IMNDEWA. 40 Ne pfigholi elufu kumi na sita, na wanu salasini na weli tsawalafighwa wawe wa IMNDEWA. 41 Apfo Musa kamwing'a mtambika Eliazali tsaka ayo ilapfighwe kwe IMNDEWA ka Imulungu pfayamlaghitse Musa. 42 Libughulu lila lyaweng'ighwe Waisiraeli tsalilingana na libughulu lya iwanu iwaghendile kung'ondo, 43 na libughulu lyaweng'ighwe Waisiraeli tsa mene na ng'olo laki ndatu, elufu selasini na saba na miya tano, 44 na ng'ombe elufu salasini na sita, 45 na tsa pfihongwe elufu salasini na miya tano, 46 na wanu elufu kumi na sita. 47 Kulawa mna libughulu lyaweng'ighwe Waisiraeli Musa tsakasola munu yumwe na imnyama yumwe kulawa mna chila wanu hamsini na mna chila wanyama hamsini, kaweng'a Walawi iweng'ighwe ing'onde yo kusang'ana kuna Lihema Lienzeluke ka pfayamlaghitse IMNDEWA. 48 Kuya pfilongotsi wose na iwakulu wose we ng'ondo tsawamghendela chalumwe Musa, 49 wamlongela, "Twetwe watumighwa wako tsatuwapeta iwanu wose we ng'ondo watuwalongotse, na twona haduhu hata yumwe iyahunguke. 50 Apfo tughala pfinu pfa nzahabu, ka tsibangili tsa mmaghulu, na tsa mmoko, tsipete tsa mpfidole, tsa mmaghutwi, tsatupatile kune ng'ondo. Tupfilapfa pfinu kwaapfila IMNDEWA tsakaukinga ughima wetu." 51 Musa na mtambika Eliazali tsawabokela pfinu pfose ipfihambighwe nzahabu. 52 Inzahabu yose ilapfighhwe na pfilongotsi wose kwe IMNDEWA tsaipfika kilo miya mbili. 53 Bila kupeta ipfinu pfila pfawasolile iwanu we ng'ondo. 54 Apfo Musa na Mtambika Eliazali tsawabokela nzahabu ayo kulawa kwe wakulu awo nawo waighala mna Lihema Lienzeluke, chiwe ka chinu cha kukumbukagha Waisiraeli hambele he IMNDEWA ka Imulungu kowalinda.