1 Mne chilo chila Waisiraeli wandusa kudadama na walila, 2 Wamsing'inikila Musa na Aruni walonga, "Ng'apfu tung'afile Misiri au kukuno kunyika. 3 Ebali IMNDEWA yotughala kune isi ayo? Tutsokomighwa kune ng'ondo, wapinga wetu ne wana wetu watsoghoghighwa kwa ngupfu! Ng'apfu tuye Misiri kubita kughenda Kanaani." 4 Kuya welongela, "Tumsaghuleni chilongotsi yungi tuye Misiri."

5 Baho Musa na Aruni wafunama hambele ha Waisiraeli wose. 6 Iwanu weli iwaghendile kuipelemba isi, imwana wa Nuni, yakemighwe Joshua na imwana wa Yefune, yakemighwe Kalebu wadegha maghwanda ghawo, 7 na wawalongela Waisiraeli wose, "Isi yatughendile kuisaghanisa inogha ng'ani. 8 Ka IMNDEWA katsotutoghola, katsotughala ako na kutwing'a isi ayo ine lidongo linoghile kwa kulima na ukupfughila. 9 Lekeni mleke kumlemela IMNDEWA, wala mleke kuwapfuka iwanu iwokala mna isi ayo. Kwaapfila awo kuna twetwe twowona ka nyondenyonde na chinu chawekingila chilawa chuka, na IMNDEWA ka hamwe natwe, mleke kuwapfuka." 10 Lekeni Waisiraeli wose wabama kuwatowa ne ghamabwe. Na mng'alo ghwe IMNDEWA ghulawila kwa kwidukitsa mna lihema lya kwitinganila, hambele ha iwanu wose wa Isiraeli.

11 Kuya IMNDEWA kamlongela Musa, "Angu wanu wano watsoghendelela kunibetsa nene mbaka tsuwachi? Na mbaka tsuwachi woghendelela kuleka kunitoghola nene? Hamwe na ipfihulo pfose pfanitendile kune iwanu wano. 12 Nitsoweng'a utamu mkulu nawo utsowakoma, lekeni nitsokutenda ghweghwe uwe aba wa taifa kulu na line ngupfu sideke kubita wawo!"

13 Lekeni Musa kamlongela IMNDEWA, "Iwanu wano tsakuwalapfa Misiri kwe ngupfu yako. Wamisiri hawotsohulika ka kuwatenda apfo iwanu wako, 14 watsowalongela iwanu iwokala mna isi ino. Kwaapfila iwanu wano ma wahulika ka ghweghwe IMNDEWA kwa hamwe natwe, na kwakoneka mwatsimwatsi ahala libingu lyako halikwima mna twetwe, na ka kotulongolela nemisi kwe ngutso ya libingu na kotulongolela nechilo kwe ngutso ye ghumoto. 15 Lelo ung'awakoma iwanu wako wose kwa mala lumwe, iwanu iwahulike mbuli tsako watsolonga, 16 ‘IMNDEWA kawakoma iwanu wake kunyika kwaapfila ng'adahile baye kuwaghala kune isi yalongile koweng'a.’ 17 Lelo nokulomba IMNDEWA, utulanguse ukulu wako kwa kutenda ghautulongele ahala haulongile, 18 ‘Nene IMNDEWA sisumkagha baye kona maya, na nowonela libatsi awala iwototsa na wane nzambi. Lekeni sitsoleka baye kuwahigha iwana na iwatsukulu kwa nzambi tsa aba tsawo, mbaka lweleko lwa kadatu na lweleko lwa kane,’ 19 Kwa uluso wako mkulu uwaleghusile nzambi tsawo iwanu wano ka apfila pfauwaleghusile ahala hawalawile Misiri mbaka sambi."

20 IMNDEWA kalonga, "Niwaleghusila nzambi tsao ka pfaulongile. 21 Lekeni nelighita ghendo, ka nene pfanikala matsuwa ghose, na isi pfaitsomema ukulu wangu, 22 Mna iwanu iwonile umng'alo wangu na pfihulo pfangu pfanitendile Misiri na kunyika kuya koghendelela kunighetsa mala kumi yose ino bila kunihulikitsa, 23 haduhu hata yumwe yatsoyona isi ila yanongile nitsoweng'a wanzehe wawo, na awala iwonibetsa pfipfila ng'awotsoyona baye. 24 Lekeni kwaapfila mtumighwa wangu Kalebu kahake, na kanihulikitsa pfinoghile, nitsomghala kune isi'yo yaikanyaghe, ne wanaghe watsoitawala. 25 Kwaapfila Waamaleki na Wakanaani wokala mna luwala lwe isi ayo, ilupfi muhunduke kuchughu mghende kunyika kune bahali ya Shamu." 26 Kuya IMNDEWA kamghutsa Aruni na Musa, kalonga, 27 "Iwanu wano wehile watsoghendelela kunising'inikila mbaka tsuwachi? Nene nyipfa na Waisiraeli kunising'ikila! 28 Lelo muwalongele pfino, ‘Nelighita ghendo nene IMNDEWA, nitsowatendela ghaghala ghanihulike mwolonga. 29 Mtsakufa na ng'uli tsenu tsitsakwasighwa kukuno kunyika kwaapfila mnising'inikila nene, haduhu hata yumwe yane miyaka ishilini na kughendelela iyanising'inikile, 30 yatsakwingila kune isi yanongile nitsomwing'eni iwe yenu, Kalebu imwana wa Yefune, na Yoshua imwana Nuni. 31 Mwemwe tsamlonga ka iwanenu watsoghoghighwa kwa ngupfu, ila nene nitsowahilika iwana wenu kune isi yamuibetsile, ili waimanye na wakale mumo. 32 Lekeni mwemwe mtsakufila kukuno kunyika! 33 Iwanenu watsoyungayunga ka wadimi, na kughaya kukuno kunyika kwa miyaka alubaini mbaka imunu wenu wa utsighilo hayatsakufa, kwaapfila mwemwe ng'amnitoghole baye. 34 Mtsoghendelela kughaya kwa matotso ghenu kwa miyaka alubaini, ka apfila pfamghendile kuipelemba isi kwa matsuwa alubaini, mtsoghaya mwaka ghumwe kwa chila tsuwa, kuya mtsomanya ka ukwisonga na nene chinu chachi.’ 35 Nene IMNDEWA nolonga, ‘Nitsowatendela apfo mwemwe wose yamwitingane hano kunilema. Wose mtsakufila kukuno kunyika.’" 36 Iwanu wala watumighwe na Musa waghende kuipelemba isi ila, no kwatenda iwanu wamsing'inikile IMNDEWA kwa kuilonga pfihile iisi ila, 37 iwanu awo tsawafa kwa utamu wihile hambele he IMNDEWA. 38 Lekeni imwana wa Nuni yakemighwe Yoshua na imwana wa Yefune yakemighwe Kalebu, awala iwaghendile kuipelemba isi tsawakala waghima.

39 Musa hayawalongele Waisiraeli aghala ghayamlongele IMNDEWA, wose tsawalila kwa usungu mkulu. 40 Ilupfi yake, tsawalamka lupfilipfili waghenda kune pfidunda, walonga, "Lelo twolamula twoghenda hanu hala IMNDEWA hayatulongele tughende. Twomanya ka tsatutenda nzambi."

41 Lekeni Musa kalonga, "Ule ng'amhulikitsa IMNDEWA? Ng'amtsohuma baye! 42 Mleke kughenda ako kuchidunda hela mtsotowighwa na awala iwowehila, kwaapfila IMNDEWA ng'atsakuwa hamwe namwe baye. 43 Mng'etowa na Waamaleki na Wakanaani, mtsakufa kune ng'ondo, kwaapfila mumlema IMNDEWA, naye ng'atsakuwa hamwe namwe baye." 44 Wawo tsawananahila kugheluka kuchidunda, ila Musa ng'aghendile baye, wala lisanduku lya laghano lye IMNDEWA kulawa kune ndalo ng'alighendile baye. 45 Baho Waamaleki na Wakanaani iwang'ali wokala kune isi ye pfidunda, wahulumka wawatowa na wahuma. Wawawinga mbaka kune ghumji ghwa Horima.