1 Aghano ghamalaghitso gha nambiko ya kuleghusa totso. Inambiko ienzeluke ghendo. 2 Mnyama wa nambiko ya ukuleghusa totso katsochinjighwa hanu hawachinjighwa iwanyama wa nambiko tsa kulakatsighwa, na mlopa ghwake kutsoghumitsila mna matsabahu chila ubali. 3 Ghamapfuta ghake ghose, ghamapfuta gha mkila na aghala ighaghubike usapi ghatsolapfighwa na kulakatsighwa 4 hamwe na tsifigho tsila mbili na ghamapfuta ghake na hanu hanoghile ha likini. 5 Mtambika katsopfilakatsa mchanya mwa imatsabahu ka nambiko iyolapfighwa kwa IMNDEWA Imulungu kwa ghumoto. Ayo nambiko ya ukuleghusa totso. 6 Immale wowose mna lukolo lwa iwatambika yaliyeka kodaha kuija, ayo nambiko ienzeluke ghendo. Itsakujighwa hanu haenzeluke. 7 Kama pfaili nambiko ayo ya kuleghusa nzambi, na pfipfo pfaili nambiko ya ukuleghusa totso, laghitso lyake limwe, mtambika iyotenda ulamlitsi yuyo iyatsoisola. 8 Mtambika iyolapfa nambiko ya ukulakatsighwa ya imunu wowose, katsosola ingotsi ya imnyama iyapfighwe. 9 Nambiko yoyose ya mbeghu iyokighwe mchikong'o au mnongo au mchikalango itsakuwa ya mtambika iyailapfile. 10 Chila nambiko ya mbeghu, iihanganyighwe na ghamapfuta au iisakale, itsakuwa ya wana wa Aruni, na wose wagholelighwe sawa.

11 Aghano ghagho malaghitso ighomlongotsa munu ahala hayomlapfila IMNDEWA pfinu ili yakale tseghamba na Yeye. 12 Imunu yang'abama ukulonga mighede kwa Imulungu kwa ukumlapfila imnyama ayula iyolapfighwa yalakatsighwe, yamlapfile hamwe na maandatsi ighalihela hamila, pfighate pfidopfido ipfibakighwe ghamapfuta na ipfilihela hamila na maandatsi gha usaghe utighinike ghendo na iuhanganyighwe ghoya na ghamapfuta. 13 Hamwe na imnyama ayo iyolapfa ili yalonge mighede kwa Imulungu, pfipfila yamlapfile ghamaandatsi ighaghelighwe ihamila. 14 Kulawa mna ghamaandatsi agho ghose, katsosola andatsi limwelimwe yamlapfile IMNDEWA, lelo ghamaandatsi agho ighasolighwe ghatsakuwa gha mtambika iyomitsa idamu ya iwanyama iwolapfighwa na iwanu ili wakale tseghamba na Imulungu. 15 Inyama ya mnyama ayula iyalapfighwe na imunu ili yalonge mighede kwa Imulungu itsakujighwa litsuwa lilyo.

16 "Lekeni ka imnyama ayo iyalapfighwe na imunu tsakamlapfa kwa kutenda achila chayelahile, au tsakamlapfa kwa ukubama mwenyegho, inyama yake ijighwe litsuwa lilyo hayolapfighwa, na inyama yake ikala yodaha kujighwa ilupfi yake. 17 Lekeni inyama yoyose ya imnyama ayo ing'akala mbaka tsuwa lya kadatu itsolakatsighwa. 18 Ka inyama yoyose ya imnyama ayo yakujighwa mna tsuwa lya kadatu, Imulungu ng'atsomtambula baye imunu iyamlapfile imnyama ayo, wala imnyama iyamlapfile ng'atsobokelighwa baye na IMNDEWA. Inyama ayo itsakuwa iha hambele ha IMNDEWA na imunu iyatsoija ilitsompata alyo lyake."

19 "Inyama yoyose iidonza chinu chayakona Imulungu chiha, ileke kujighwa. Inyama ayo ilakatsighwe kwa ghumoto. Imunu wowose iyebona kotogholighwa na Imulungu kodaha kuija inyama ikalile, 20 lekeni imunu wowose yehile, yang'aja inyama ayo ilapfighwe ili yakale tseghamba na Imulungu, katsobaghulighwa kulawa mna iwanu wa Imulungu. 21 Imunu wowose iyodonza chinu chochose ichihile, chiwe ichimlawa imunu ichikoneka chiha, au ichimlawa imnyama yehile, au chiwe chinu chochose ichimwihila Imulungu, yang'aja inyama ya imnyama iyalapfighwe na imunu ili yakale tseghamba na Imulungu, imunu ayo katsobaghulighwa kulawa mna iwanu wa Imulungu."

22 IMNDEWA tsakamlongela keli Musa, 23 "Walongele Waisiraeli pfino, Mleke ukuja ghamapfuta gha ing'ombe, gha ng'olo wala gha mene. 24 Ghamapfuta gha mnyama wowose iyafile imwenyegho au iyakomighwe na imnyama wa kwibagho ghodaha kwikighwa kwa ukutendela sang'ano tsingi lekeni mleke kughaja. 25 Kwaapfila munu wowose yang'aja ghamapfuta gha imnyama iyalapfighwe kwa IMNDEWA kwa ukulakatsighwa mna ghumoto, katsobaghulighwa kulawa kwa iwanu wa Imulungu. 26 Kwokwose akula kwamkala, mleke ukuja idamu yoyose, iwe ya chideghe wala ya mnyama. 27 Imunu wowose iyakuja idamu, imunu ayo katsobaghulighwa kulawa mna iwanu wa Imulungu." 28 IMNDEWA tsakamlongela Musa, 29 "Uwalongele iwanu wa Isiraeli apfino, Imunu wowose yang'amlapfa imnyama ili yakale tseghamba na Imulungu, kobamighwa yamghalile Imulungu inyama chidogho kulawa kuna imnyama ayo. 30 Yeye mwenyegho yamghale kwa ghamoko ghake ikalakatsighwe mna ghumoto. Yaghale ghamapfuta gha imnyama ayo na chidali chake, kuya inulighwe mchanya kulangusa ka ilapfighwa kwa IMNDEWA. 31 Imtambika katsoghalakatsa ghamapfuta ghose mchanya mwa Imatsabahu, lekeni ichidali chitsakuwa cha Aruni na iwanaghe. 32 Mghulu ghwa kujilo ighuli kuchughu kwa imnyama ayo iyalapfighwe na imunu ili yakale tseghamba na Imulungu, yeng'ighwe mtambika. 33 Lihatsa alyo litsakuwa lya mtambika iyoneke mna lukolo lwa Aruni iyolapfa idamu na ghamapfuta gha imnyama ayo. 34 Nene IMNDEWA tsaniwalaghitsa iwanu wa Isiraeli wabaghule ichidali acho na lihatsa alyo kulawa kuna iwanyama iwolapfighwa na iwanu ili wakale tseghamba na nene Imulungu, na waweng'e Aruni na wanaghe kwaapfila tsinyama atso tsikighwa tsiwe tsawo ghamatsuwa ghose. 35 Tsinyama tsino tsibaghulighwa tsiwe tsa Aruni na iwanaghe kulawa mna iwanyama iwolapfighwa kwea Imulungu kwa ghumoto, kulawa ahala hawekighwe wamtambikile IMNDEWA." 36 IMNDEWA tsakawalaghitsa Waisiraeli waweng'e tsinyama atso tsiwe tsawo matsuwa ghose kulawa ahala hawabakighwe mapfuta wawe watambika. 37 Aghano ghagho ghamalaghitso ighowalongotsa Waisiraeli ahala hawomlapfila Imulungu nambiko tsa usaghe, na hawolapfa nambiko ili watogholighwe keli na Imulungu na hawolapfa nambiko kwa kulema kumwing'a ipfinu ipfibamighwa yeng'ighwe Imulungu, na hawolapfa tsinambiko ahala hayosaghulighwa Imtambika, na ahala hawolapfa ipfinu ili wakale tseghamba na IMNDEWA. 38 Aghano ghagho ghamalaghitso gha IMNDEWA ghayamwing'ile Musa kuna chidunda Sinai, litsuwa alila hayawalaghitse Waisiraeli wamghalile tsinambiko na iwanyama wawo, akula mna inyika ya Sinai.