1 Imunu wowose yang'amlapfila IMNDEWA usaghe, yasole tsimbeghu yadughe ili uwe usaghe utighinike ghendo. Yaughele ghamapfuta gha minzeituni na upfumba. 2 "Kuya yawaghalile iwana wa Aruni iwotambika. Mtambika yumwe katsosola ghawo limwe lya usaghe awo utighinike ghendo une ghamapfuta ne upfumba na kuulakatsa mna matsabahu, ghawo alyo limwe lyolangusa ghendo ka usaghe wose iulapfighwe wa IMNDEWA. Usaghe awo iulakatsighwe womnung'ila ghoya na kumnogheletsa IMNDEWA. 3 Nambiko ya usaghe isighale watsakuja Aruni ne iwanaghe. Ayo yenzeluka ghendo ilapfighwe kwa IMNDEWA."

4 "Na munu yang'amlapfila Imulungu ipfighate pfa usaghe pfokighwe mna litanuli, pfighate apfo pfiwe pfa usaghe utighinike ghendo na pfileke kuwa na ihamila, na pfighate apfo pfibakighwe ghamapfuta."

5 "Ka munu komlapfila Imulungu ipfighate pfa usaghe ipfitsingighwe mchiha, pfighate apfo pfiwe pfa usaghe utighinike ghendo na pfileke kuwa na ihamila na pfighate apfo pfibakighwe ghamapfuta. 6 Pfighate apfo pfitsobenighwabenighwa na kughelighwa ghamapfuta, ipfighate apfo pfakuwa ipfighate ipfilapfighwa kwa Imulungu."

7 "Ka komlapfila Imulungu pfighate ipfitsingighwe mchiha, pfighate apfo pfiwe pfa usaghe utighinike ghendo na ughelighwe ghamapfuta gha minzeituni. 8 Umghalile IMNDEWA usaghe yauulapfa utendighwe kwa pfinu apfo, na mtambika katsoughala mna matsabahu. 9 Mtambika katsodegha usaghe chidogho uulangusa ka usaghe wose iulapfighwe wake yeye IMNDEWA. Naye koulakatsa mna matsabahu uwe nambiko ya ukulakatsighwa, ayo yonung'ila ghoya na yomnoghelesa IMNDEWA. 10 Nambiko ya usaghe ikalile watsakuja Aruni na iwanaghe. Ayo yenzeluka ghendo ilapfighwe kwa IMNDEWA."

11 "Usaghe wowose yaumlapfila IMNDEWA uleke kuwa na ihamila, kwaapfila mwiko kughela ihamila na uki mna usaghe yaumlapfila IMNDEWA ukalakatsighwe. 12 Mwodaha kumghalila IMNDEWA ipfijo apfo ka ipfijo pfa mkwandusa ukupfuna. Lekeni pfijo apfo pfileke kulakatsighwa mna matsabahu ka pfa kumnung'ila ghoya Imulungu. 13 Ughele imunyu mna chila ichijo cha usaghe iulapfighwa kwe Imulungu. Mwalangitse mleke kwisemwa kughela imunyu mna ipfijo apfo, kwaapfila imunyu yolangusa lilaghano lyayekile Imulungu na mwemwe."

14 "Mng'amlapfila IMNDEWA ipfijo pfamkwandusa ukupfuna, mlapfileni ipfijo apfila pfamdughile na imikungwi yake na pfamwokile mna ghumoto. 15 Mtsopfika ghamapfuta na kupfighela upfumba, apfo lelo pfitsakuwa ipfijo pfa usaghe ipfilapfighwa kwa IMNDEWA. 16 Mtambika yumwe katsodegha ichijo acho chidogho, naye kochilakatsa mna imatsabahu. Ichijo acho ichideghighwe cholangusa ghendo ka usaghe wose iulapfighwe wa kwake yeye IMNDEWA."