1 "Ka munu kobama kukala tseghamba na IMNDEWA, ayo yamlapfile ng'ombe mmale au pinga kulawa kuna wang'ombe wake, ing'ombe ayo yawe kenelela. 2 Imunu ayo yeke ghumoko mwitwi mwa imnyama ayo, yamsubutule hambele ha ghumlango ghwa Lihema lya Kwitinganila. Kuya iwana wa Aruni watsomitsa idamu ikingighwe chila ubali wa imatsabahu ya shaba. 3 Kulawa mna inambiko ya ukukala tseghamba, iwatambika waghale pfinu pfose ipfili munda pfa imnyama ayo pfikawe pfijo ipfilapfighwa kwa IMNDEWA, mumghalile ghamapfuta ghose ighoghubika ipfinu pfose ipfili munda. 4 Pfipfila walapfe tsifigho na ghamapfuta ghake, na likini na ghamapfuta ghake. 5 Iwana wa Aruni watsopfilakatsa ipfinu apfo ipfili munda mchanya mwa imatsabahu ya shaba hamwe na ipfinu pfingi ipfilapfighwa, ipfijo apfino ipfilakatsighwa pfomnung'ila ghoya IMNDEWA."

6 "Ka munu kobama kulapfa nambiko ya ukukala tseghamba na IMNDEWA, yamlapfile mene au ng'olo, yawe mvulati au mbughuma, iyenelele. 7 Ka munu komlapfa mwana wa ng'olo, yakamwike hambele ha IMNDEWA. 8 Yeke ghumoko ghwake mwitwi mwa ing'olo ayo, kuya yamsubutule hambele ha Lihema lya kwitinganila. Iwana wa Aruni watsomitsa idamu mna chila ubali wa Imatsabahu. 9 Kuya sola ghamapfuta, ghumkila ghose ghuna ghamapfuta ighughanighwe habehi ghendo na ichighudi, ghamapfuta ghose ighaghubike usapi na ghamapfuta ghose ighali munda kulawa kuna imnyama ayula iyalapfile imunu yalakatsighwe ili yakale tseghamba na IMNDEWA, 10 na tsifigho atsila mbili na ghamapfuta ghake hamwe na ghamapfuta ghose gha likini. 11 Imtambika yalakatse apfo pfose mchanya mwa Imatsabahu ka nambiko ya ichijo iilapfighwa kwa IMNDEWA kwa kulakatsighwa."

12 "Ka munu komlapfa imene, yamghale hambele ha IMNDEWA. 13 Yeke ghumwoko ghwake mwitwi mwa imnyama ayo na yamtsubutule hambele ha Lihema lya Ukwitinganila. Iwana wa Aruni watsomitsa idamu yake chila ubali wa Imatsabahu. 14 Pfipfila yasole ghamapfuta ghose ighaghubike munda, 15 na tsifigho atsila mbili na ghamapfuta ghake na likini. 16 Imtambika yapfilakatse mchanya mwa Imatsabahu ka chijo ichilapfighwa kwa IMNDEWA kwa kulakatsighwa, ichinung'ila ghoya na kumnoghela IMNDEWA. Ghamapfuta ghose ghawe gha IMNDEWA. 17 Imbuli aino itsakuwa laghitso lya ghamatsuwa ghose, na hohose hamkala mlikindise lilaghitso alino. Mwiko ukuja ghamapfuta wala idamu."