1 IMNDEWA tsakamlongela Musa, 2 "Ka munu wowose konitendela nzambi nene IMNDEWA, tulonge kolema kuitsa chinu chayekile poni kwa Muisiraeli miyaghe, au komboka ichinu chake, au kombugha miyaghe, imunu ayo katotsa ghendo. 3 Pfipfia ka kodondola ichinu chayaghitse miyaghe, kuya kobela ng'achidondole baye aku kelighita ghendo kwa ughutsu ka ng'atendile baye tsinzambi ka atsino, imunu ayo katotsa ghendo. 4 Naye hayotanga ka katenda nzambi kobamighwa yoitse chayebile au chayapatile kwa kumbunza miyaghe na yoitse ichinu chikighwe poni na achila chayadondole, 5 au chochose achila chayapatile aku kelighita kwa ughutsu. Ipfinu apfo pfose yamuitsile imwenyegho. Yamlihe chila chinu ka pfachili na yongetse asilimia ishilini ya bei ya ichinu acho aho hayotanga ka katotsa. 6 Kuya yaghale ng'unzu au mvulati iyenelele, ka nambiko ya totso, naye mtambika yamlapfile IMNDEWA ing'unzu, ili IMNDEWA yamleghusile nzambi yake. Ibei ya imnyama ayo itsakuwa ka pfaikwikighwa mna Lihema Lienzeluke. 7 Na mtambika katsolapfa nambiko ya kumlalitsa na Imulungu, naye Imulungu katsomleghusila inzambi yoyose iyatendile."

8 Kuya IMNDEWA tsakamlongela Musa, 9 "Mlongele Aruni na wanaghe waghakinde malaghitso ghano ahala hawolakatsa tsinambiko tsa ukulakatsighwa itsilapfighwa kwa Imulungu mchanya mwa Imatsabau. Inambiko ilakatsighwa yobamighwa ikale mna ghumoto mchanya mwa Imatsabahu chilo chose mbaka hamitondo na ghumoto ghwake ghuleke kutsimika. 10 Kuya mtambika aku kapfala ghwanda lyake lya chitambala chitselu na kaputula yake ya ichitambala chitselu chinoghile, yasole lipfu lya nambiko tsilakatsighwe mchanya mwa Imatsabahu yalike hambalimbali ha Imatsabahu."

11 Kuya yatsule maghwanda ghake na yapfale ghangi, yasole lipfu lila na yalighale kunze kwa indalo yawo, ihanu helile. 12 Ghumoto ighuli mchanya mwa Imatsabahu, ghobamighwa ghughendelele ukwaka, ghuleke kutsimika. Chila mitondo mtambika katsokwitsa tsingodi hana ghumoto aghwo na mchanya mwake katsakwika tsinambiko tsibamighwa tsilakatsighwe, na yalakatse ghamapfuta gha iwanyama iwalapfighwe ka nambiko tsa ukukala tseghamba na Imulungu. 13 Ghumoto ghutsoghendelela ukwaka ghamatsuwa ghose mchanya mwa Imatsabahu bila kutsimighwa.

14 "Aghano ghagho ghamalaghitso ighowalongotsa ahala hamumlapfila Imulungu nambiko tsa usaghe. Iwana wa Aruni wamlapfile IMNDEWA nambiko tsa usaghe hambele ha Imatsabahu. 15 Imtambika yumwe yadeghe ghawo limwe lya usaghe utighinike ghendo, iutipfighwe ghamapfuta na upfumba, kuya yaulakatse mchanya mwa Imatsabahu. Ghawo alyo limwe lyolangusa ghendo ka usaghe wose iulapfighwe ya kwake yeye Imulungu. Ukunung'ila kwake kutsomnoghelesa IMNDEWA. 16 Usaghe iukalile katsakuja Aruni na wanaghe lekeni pfighate pfake hapfikwambikighwa pfileke kughelighwa ihamila. Watsouja hanu haenzeluke mghati mwa luwa lya Lihema Lienzeluke. 17 Ileke kwambikighwa na ihamila. Niweng'a wawo usaghe awo kulawa mna usaghe yawondapfila kwa ghumoto. Usaghe awo wenzeluka ghendo ka pfaili nambiko iilapfighwa ili munu yaleghusighwe nzambi na apfila iilapfighwa ili imunu yaleke kwoneka katotsa. 18 Iwana wamale wa Aruni wodaha ukuja usaghe awo ukalile kwaapfila matsuwa ghose ubaghulighwa ujighwe na wawo kulawa mna usaghe iulapfighwa kwa Imulungu ulakatsighwe. Imunu wowose youkinda utimbo awo kobamighwa yawe mwenzeluka." 19 IMNDEWA kamlongela Musa, 20 "Kulawa hayasaghulighwe Aruni na wanaghe wawe watambika, wobamighwa wamlapfile IMNDEWA kimbo limwe lya usaghe utighinike ghendo, nusu imwe ya usaghe waulapfe hamitondo na nusu ingi waulapfe hamihe. 21 Wauhanganye ghoya na ghamapfuta na ghwambikighwe, kuya chighate acho wachibatsule batsule na wamlapfile IMNDEWA ka nambiko ya usaghe, na ukunung'ila kwake kutsomnoghelesa IMNDEWA. 22 Mna ghamatsuwa ghose ighakutsa chila mwana mlume wa Aruni iyosaghulighwa yawe Mtambika Mkulu kobamighwa yamlapfile Imulungu kimbo limwe lya utimbo, yaulakatse ili uwe wake yeye IMNDEWA. 23 Inambiko yoyose ya usaghe iilapfighwa na mtambika yobamighwa ilakatsighwe yose, wala ileke kujighwa."

24 IMNDEWA tsakamlongela Musa, 25 "Mlongele pfino Aruni na wanaghe, hawomlapfila Imulungu nambiko ye mnyama ya kuleghusa nzambi watende pfino, hanu hayochinjighwa imnyama iyolapfighwa yalakatsighwe, baho yachinjighwe imnyama iyolapfighwa kwa IMNDEWA ili imunu yaleghusighwe inzambi yake iyaitedile. Hanu aho hawe hambele ha IMNDEWA. 26 Mtambika ayo yomlapfa imnyama ayo yakasubutulighwe, inyama yake, yaje yeye. Ijighwe hanu haenzeluke mghati mwe luwa lya Lihema lya ukwitinganila. 27 Imunu wowose yodonza inyama ayo kobamighwa yaenzeluke. Idamu ing'alaghalila mna lighwanda, lighwanda alyo likatsapfighwe hanu haenzeluke. 28 Inyama ayo ing'ambikighwa mna pfiya, ipfiya apfo pfitulighwe. Lekeni ka yambikighwa mna pfiya pfa shaba, pfinu apfo pfikuwighwe na ghamatsi na kughulutsighwa. 29 Chila mmale mna lukolo lwa iwatambika kodaha ukuja inyama ayo, kwaapfila inyama ayo yenzeluka ghendo. 30 Lekeni ka idamu ya imnyama yalapfighwe ka nambiko ya kuleghusa nzambi ighalighwa mghati mwa Lihema lya ukwitinganila ili kuwaleghusila iwanu tsinzambi, inyama yake ileke kujighwa, ilakatsighwe mna ghumoto."