1 IMNDEWA hayali kamna Lihema lya ukwitinganila tsakamkema Musa, kamlongela, 2 "Walongele Waisiraeli apfino, munu yang'abama kumlapfila IMNDEWA mnyama, yamsaghule imnyama ayo kulawa kuna wang'ombe wake, wang'olo wake au wamene wake."

3 "Imunu yang'amlapfa ing'ombe iyobamighwa kulakatsighwa, yamsaghule ing'ombe mmale iyenelele. Yamsole na yakamwike hana ghumlango ghwa Lihema lya ukwitinganila ili yatogholighwe hambele he IMNDEWA. 4 Imunu ayo yeke ghumoko ghwake mwitwi mwa imnyama ayo, baho Imulungu katsobokela imnyama iyalapfighwe, naye katsomleghusila imunu ayo nzambi tsake. 5 Kuya yamsubutule ing'ombe ayo hambele ha IMNDEWA. Nawo iwana wa Aruni wasole idamu ayo wamitse chila ubali wa Matsabahu iili habehi na ghumlango ghwa Lihema Lienzeluke. 6 Imunu ayo yamuhune imnyama ayo iyolapfighwa yakalakatsighwe na kumghana mahunde. 7 Kuya iwana wa Aruni watsotsika tsingodi mna matsabahu na kubwina ghumoto. 8 Baho iwana wa Aruni watsosola ghamahunde agho ghe nyama, litwi na ghamapfuta, na ukwika mna tsingodi itsikwaka itsili mna matsabahu. 9 Lekeni imunu ayo yahopfughe usapi na maghondi gha imnyama kwa ghamatsi. Mtambika yumwe katsoilakatsa inyama yose mna matsabahu ka nambiko ya kulakatsighwa. Inyama ayo iilakatsighwa yomnung'ila ghoya IMNDEWA."

10 "Ka imnyama iyomlapfa yakalakatsighwe kolawa mna wang'olo au wamene, yasaghule ing'unzu au mvulati iyenele. 11 Yamsubutulile ubali wa kasikazini wa matsabahu, hambele he IMNDEWA Imulungu, nawo iwana wa Aruni wamitse idamu ikingighwe mna matsabahu chila ubali. 12 Kuya imunu ayo yamghane mahunde, kuya yasole litwi lyake na mapfuta ghake, na mtambika yumwe yapfike mna ghumoto mna matsabahu. 13 Lekeni yahopfughe usapi na maghondi ghake gha kuchughu kwa ghamatsi. Baho Mtambika yumwe katsoilakatsa inyama yose mna imatsabahu. Inyama ayo iilakatsighwa mna ghumoto yomnung'ila ghoya na yomnogheletsa IMNDEWA."

14 "Imunu yang'amlapfila Imulungu pfideghe, yaghale tetele au njiwa. 15 Mtambika katsomghala ichideghe ayo mna imatsabahu, kuya yambobotole singo na yamghane litwi, na yamlakatse mna ghumoto mna matsabahu. Lekeni tanu yanze kukinga idamu, na yaimitse mna ubanda wa matsabahu. 16 Kuya yalapfe sekeseke na chila chinu ichili mumo, yakapfase ubali wa mashaliki wa matsabahu, ako kwalikwasighwa lipfu. 17 Kuya yamkinde mapamanilo na yambatsule, lekeni yaleke kumghana pfihindi pfibili, kuya mtambika katsomlakatsa hana tsingodi itsili mna matsabahu. Inyama ayo ilakatsighwe mna ghumoto yomnung'ila ghoya IMNDEWA."