1 IMNDEWA tsakamlongela Musa, 2 "Litsuwa lya mwanduso lya mwetsi ghwa mwanduso ulimise Lihema lyo Kwitinganila. 3 Mghati mwa Lihema alyo wike Lisanduku lya Laghano, kuya wike panzia hambele hake. 4 Kuya wike metsa na wike pfinu pfake mchanya mwake. Wingitse chighutso che pfitasa na kupfika pfitasa pfake mchanya mwake. 5 Lisanduku lye nzahabu lya kupfukitsila upfumba ulike hambele ha Lisanduku lya Laghano, kuya wike lipanzia hane ghumlango ghwa Lihema lyo Kwitinganila. 6 Lisanduku lyo kulapfila nambiko ya kulakatsighwa ulike hambele ha ghumlango ghwa Lihema Lienzeluke lyo Kwitinganila. 7 Bigha lya kuhopfughila ulike haghati ha Lihema lyo Kwitinganila na lisanduku lyo kulapfila nambiko tso kulakatsighwa, kuya ulimemese matsi. 8 Utsenge luwa litsunguluke kwose, na wike lipanzia hane ghumlango ghwake.

9 "Kuya ulihimike Lihema Lienzeluke hamwe ne pfinu pfake pfose kwa kupfibakatsa ghamafuta ghala gha kubaka, nalyo litsakuwa lienzeluka. 10 Pfipfila ulihimike lisanduku lyo kulapfila nambiko tsa kulakatsighwa na pfinu pfake pfose kwa kulibakatsa ghamafuta, nalyo litsakuwa lienzeluka ghendo. 11 Bigha lya kwohopfughila na kalilo lyake pfipfila ulike wakfu pfipfo kwa kulibakatsa ghamafuta.

12 "Kuya umkeme Aruni na iwanaghe watse hane ghumlango ghwa Lihema lyo Kwitinganila, kuya uwahopfughe kwa ghamatsi. 13 Umpfatse Aruni ghamaghwanda mahenzeluka, umbake ghamafuta umwike wakfu, ili yanisang'anile ka mtambika. 14 Uwakeme ne iwanaghe, uwapfatse tsikanzu. 15 Kuya uwabake ghamafuta ka pfaumbakile aba wawo, nawo wanitumikile ka watambika. Kubakighwa ghamafuta agho kutsowatenda wawe watambika wa ghamatsuwa ghose mna pfeleko pfawo pfose."

16 Musa tsakatenda agho ghose ka IMNDEWA pfayamlaghitse. 17 Mne litsuwa lya mwanduso lya ghumwetsi ghwa mwanduso ghumwaka wa kabili kulawa hawalawile Misiri, Lihema lyo Kwitinganila limisighwa. 18 Musa ne wanu wake walimisa Lihema, pfikalilo pfake, kemisa tsifulemu tsake, kengitsa imifumbati yake na kwimisa tsingutso tsake. 19 Tsawatandatsa panzia mchanya mwa Lihema lyo Kwitinganila na kwika chighubiko mchanya mwake, ka IMNDEWA pfayamlaghitse. 20 Kuya tsakasola pfibamba pfila pfibili pfa ghamabwe kapfika mna lisanduku lila. Kaika mifumbati ila ya kulighalila mchanya mwe lisanduku, kuya keka chighubiko cha lisanduku ichikemighwa Hanu he Libatsi mchanya mwake. 21 Kuya kalika Lisanduku lila mghati mwe Lihema lyo Kwitinganila na keka panzia, na kwa kutenda apfo kalipfisa Lisanduku lya Laghano ka IMNDEWA pfayalaghitse. 22 Tsakeka metsa mghati mwa Lihema lyo kwitinganila, ubali wa kasikazini, kunze kwe lipanzia. 23 Mchanya mwake weka pfighate ipfilapfighwe kwe IMNDEWA ka IMNDEWA pfayamlaghitse Musa. 24 Tsakeka chighutso che pfitasa mghati mwa Lihema lyo Kwitinganila, ubali wa kusini, chelolesa ne imetsa. 25 Kuya kapfituwa pfitasa pfake hambele he IMNDEWA ka IMNDEWA pfayamlaghitse. 26 Tsakalika lisanduku lye nzahabu mna Lihema, hambele ha lipanzia, 27 na kufukitsa upfumba iunung'ila ghoya mchanya mwake ka IMNDEWA pfayamlaghitse. 28 Kuya tsakalika lipanzia lilebele lidiwe ghumlango ghwa Lihema lyo Kwitinganila, 29 na hambele ha ghumlango ghwa Lihema keka lisanduku lyo kulapfila nambiko tsa kulakatsighwa, mchanya mwake tsakalapfa nambiko tsa kulakatsigwa na nambiko tsa usaghe ka IMNDEWA pfayamlaghitse. 30 Tsakeka bigha lya kuhopfughila haghati ha Lihema lya Kwitinganila na lisanduku lya kulapfila nambiko tsa kulakatsighwa, kuya kaghela ghamatsi gha kuhopfughila. 31 Kwa ghamatsi'gho Musa na Aruni hamwe na iwanaghe wose tsawahopfugha ghamoko na ghmaghulu ghawo, 32 chila mala hawengile mghati mwa Lihema lya Kwitinganila au hawaseghelele lisanduku lyo kutambikila tsawehopfugha ka IMNDEWA pfayalaghitse Musa. 33 Kuya Musa hamwe ne iwanu watsenga luwa kutsunguluka Lihema lya Kwitinganila na lisanduku lya kulapfila nambiko tsa kulakatsighwa na kwika lipanzia hane ghumlango ghwe luwa. Apfo Musa ne iwanu waimalitsa ing'onde yose.

34 Kuya bingu tsalighubika Lihema lyo kwitinganila, na ghumwanga ghumwelukamweluka ghwe IMNDEWA tsa ghumema mna Lihema. 35 Naye Musa ng'adahile baye kwingila mghati mwa Lihema lyo kwitinganila kwaapfila libingu'lyo tsalikala mchanya mwake, na ghumwanga ighumwelukamweluka ghwe Imulungu tsaghumema amwo. 36 Mna ghumwanza ghwao ghose iwana wa Isiraeli ng'awenuke woke baye mbaka wone libingu linuka kulawa mchanya mwa Lihema lya Kwitinganila. 37 Lekeni ka libingu ng'alinuke baye, nawo ng'awanduse ghumwanza baye, tsawabeta mbaka linuke. 38 Nemisi waisiraeli tsawang'ali wolyona libingu lila lya IMNDEWA mchanya mwa Lihema lyo Kwitinganila, na nechilo moto ghung'alighukwaka mchanya mwe Lihema mna ghumwanza ghwao ghose.