1 Yetiro, aba mkwe wake Musa, mlapfa nambiko wa Midiani, tsakahulika pfinu pfose IMNDEWA pfayamtendele Musa, na Imulungu pfayawalapfile Waisiraeli mna isi ya Misiri.

2 Apfo Yetiro kamghendela Musa aku kelongotsa na Sipora, mwehe wa Musa. Musa tsakamuyitsa ipinga ayo ukaye kwa aba wake. 3 Yetiro pfipfila kaghenda ne iwana weli wa Musa. Imwana yumwe tsakakemighwa Geshom, kwaapfila Musa tsakalonga, "Nitsumila mna isi ya ugheni." 4 Wakabili tsakakemighwa Eliezeli, kwaapfila Musa tsakalonga, "Imulungu wa aba wangu iyo iyanyapfile ndeke kukomighwa na Farao." 5 Yetiro mkwe wake Musa, tsakatsa ne imwanaghe, mwehe wa Musa, ne iwana, kampfika Musa kunyika ako kwayakalile hane chidunda che Imulungu. 6 Yetiro tsakatuma iwanu wamlongele Musa ka yeye kakutsa na Sipora ne iwanaghe weli, 7 Musa kalawa, kaghenda kumbokela mkwe wake, kenama hambele hake kamnonela. Welamsa kuya woya ukaye mna chibumbulika. 8 Musa tsakamlongela mkwe wake pfinu pfose IMNDEWA pfayamtendele Farao na Wamisiri kwaajili ya Waisiraeli. Kuya kamlongela pfawang'ali wotingwa mna ghumwanza na IMNDEWA pfayawakombole. 9 Yetiro kadeng'elela hayahulike ghose IMNDEWA ghayawatendele Waisiraeli. 10 Yetiro kalonga, "Yatunyighwe IMNDEWA iyawakombole mna ghamoko gha Wamisiri na kuwalapfa mna utumwa wa Farao. 11 Sambi nomanya IMNDEWA ka mkulu kubita milungu yose, kwaapfila kawakombola iwanu wano mna ghamoko gha Wamisiri iwawatendele ghehile." 12 Kuya Yetiro mkwe wa Musa kamlapfila IMNDEWA nambiko tsa kulakatsighwa na tsisadaka tsingi. Naye Aruni tsakatsa ne iwabala wa Isiraeli ili waje ichijo cho ukumtunya IMNDEWA hamwe na Yetiro.

13 Ilupfi yake Musa tsakakala hasi kulamla maghomba gha Waisiraeli, nawo tsawakala wema aku wamtsunguluka, kulawa mitondo mbaka nemihe. 14 Yetiro, mkwe wake Musa, haghonile ghose Musa ghayang'ali yowatendela iwanu, kalonga, "Ebali kowatendela pfino iwanu wano? Mbona kokala hasi uliheka aku iwanu wakutsunguluka kulawa nemitondo mbaka tsuwa lyakuswa?"

15 Musa kedika, "Notenda apfi kwaapfila iwanu wonitsila nene kughutsa chayobama Imulungu. 16 Iwanu weli wang'awa na lighomba, wonitsila, na nene nolamla, kuya nowalongela ghamalaghitso ghe Imulungu na choni chayobama Imulungu."

17 Yetiro kamlongela, "Achino chautenda ng'achinoghile baye. 18 Ghweghwe ne iwanu wano wose mtsakwipfa ghendo, kwaapfila ing'onde ino ng'omu, ng'udaha baye kutenda uliheka. 19 Lelo uleke nikulongele chinu chinoghile, na Imulungu katsokwapfila. Ghweghwe kutsowemila iwanu hambele he Imulungu. Naghwe kutsomghalila Imulungu maghomba ghawo. 20 Kuya uwalangulitse malaghitso ghe Imulungu, na achila chayobama Imulungu, naghwe uwalangulitse pfawobamighwa kukala na pfawobamighwa kutenda. 21 Pfipfila usaghule iwanu iwodaha kukwapfila, iwanu iwanoghile iwompfuka Imulungu, ing'awobokela hongo baye. Uweke iwanu awo wawe iwakulu wa makingili ghe iwanu elufu elufu, miya miya, hamsinihamsini na kumi kumi. 22 Hawo watsowalamlitsa iwanu chila litsuwa. Ghamaghomba makulu watsokughalila ghweghwe, lekeni maghomba mado mado watsoghalamla iwenyegho. Kwa nzila ayo kutsodaha kuitenda sang'ano yako ileke kuwa ng'omu kwaapfila iwanu awo watsotenda na ghweghwe sang'ano ayo. 23 Ung'atenda apfo, na ka apfo pfipfo pfayobama Imulungu, ghweghwe ng'utsakwipfa baye na iwanu wose wano watsakuya mmakae mwawo aku maghomba ghawo ghamala."

24 Musa tsakategheletsa ghayalongile mkwe wake, kaghatenda ghose ghayamlongele. 25 Tsakawasaghula iwanu iwodaha kumwapfila kulawa mna Waisiraeli, kawatenda wawe iwakulu we iwanu elufu elufu, miya miya, hamsini hamsini na kumi kumi. 26 Nawo walamla maghomba ghe iwanu ghamatsuwa ghose, maghomba makulu wamghalila Musa, lekeni ghala mado mado waghalamla iwenyegho.

27 Kuya Musa kamuwagha Yetiro mkwe wake, naye Yetiro koya muisi mwake.