1 "Aghano ghagho ghamalaghitso ghautsoweng'a Waisiraeli. 2 Ung'amghula mtumwa Mweburaniya, katsokusang'anila kwa miyaka sita, lekeni ghumwaka ghwa saba, yalekelelighwe yoke bila kumliha chinu chochose. 3 Ka hayatsile kuna ghweghwe katsa yaliyeka, yalekelelighwe yoke yaliyeka. Lekeni ka katsa na mwehe wake, yoke na mwehe wake. 4 Ka munu yamghulile tsakamkwelela pinga, na ipinga ayo kamwelekela wana wamale ne wapinga, ipinga ayo ne wanaghe watsakuwa wa mtwatsa wake, mtumwa ayo yoke yaliyeka. 5 Lekeni imtumwa ayo yang'alonga konoghelwa na imtwatsa wake, mwehe wake na iwanaghe na ng'obama baye kulekelighwa yoke, 6 Imunu ayo katsomghala hambele he Imulungu. Kuya katsomghala hane ghumlango au chitsingiti katsomtogha ghutwi lyake kwa sanzia, naye katsomsang'anila imtwatsa wake matsuwa ghose gha ughima wake

7 "Imunu yang'amuutsa imwanaghe pinga yawe mtumwa, ayo ng'atsolekelelighwa yoke baye ka iwatumwa iwamale pfawolekelelighwa. 8 Ka imunu'yo iyamghulile kobama yawe pinga wake, lekeni ambele ng'onoghelwa naye baye, imunu'yo yamuyitse kwa aba wake, kwayamghulile. Imunu'yo yaleke kumuutsa keli kwa iwagheni, kwaapfila chinu chayamtendele si cha kutogholighwa baye. 9 Ka kamghula yakwelighwe ne imwanaghe, yamtendele ka pfayowatendela neghe tsake. 10 Imunu yang'akwela ipinga yungi, yaghendelele kumwing'a mwehe wake wa mwanduso ichijo chichila, ghamaghwanda na kuwasa naye ka pfaikalile mwanduso. 11 Ka imunu'yo ng'odaha baye kumtendela agho madatu, pinga ayo yalekelelighwe yoke kwa aba wake bila kuliha chinu chochose.

12 "Imunu wowose iyomtowa miyaghe na kumkoma, naye yakomighwe. 13 Lekeni ka ng'abamile baye kumkoma, ila Imulungu kaleka ilawile apfo, imunu'yo kodaha kutsumila hanu hanitsomlangusani. 14 Lekeni imunu yang'amtowa miyaghe na kumkoma kwa ghiladi, hata ka kutsumila hanu hangu ha kulapfila nambiko, mtsomlapfa ako na kumkoma.

15 "Imunu wowose iyomtowa aba wake au mai wake, ayo naye yakomighwe ghendo.

16 "Imunu wowose iyomwiba miyaghe na kumuutsa au kumtenda yawe mtumwa wake, imunu'yo yakomighwe.

17 "Imunu iyomligha aba wake au mai wake, ayo naye yakomighwe.

18 "Ka wanu weli wesonga, kuya munu yumwe komtowa miyaghe kwa libwe au kwa ligumi lekeni ng'afile baye, ila kamlagha mbaka kawasa mlusatsi koghula, 19 hayatsokwinuka keli na kulawa kunze kwa ng'weku, imunu'yo iyamlaghile miyaghe katsolekelighwa. Lekeni katsomliha kwa ghamatsuwa ghayawasile mlusatsi, naye katsomng'osola mbaka ahone ghendo.

20 "Munu yang'amfapula imtumwa wake mmale au imtumwa wake pinga na kumkoma baho, imunu'yo naye yakomighwe. 21 Lekeni imtumwa ayo yang'ahona mna litsuwa limwe au meli, mtwatsa wake ng'atsohighighwa baye, kwaapfila imtumwa ayo yang'ali wa kwake.

22 "Iwamale wang'etowa na baho wamlaghe ipinga yane inda mbaka inda yake ilawe, bila kumlagha hanu hangi, ayula iyamlaghile katsoliha chochose choyobama immale we ipinga ayo yamlihe na ka walamtsi pfawatsolamla. 23 Lekeni ka kamlagha ng'ani, naye imunu'yo yalaghighwe pfipfo, ka kamkoma naye yakomighwe 24 nenge kwa nenge, tsino kwa tsino, ghumwoko kwa ghumoko, mghulu kwa mghulu, 25 ka kamlakatsa naye yalakatsighwe, ka kamlapfa chilonda naye yalapfighwe chilonda, ka kamlapfa nundu naye yalapfighwe nundu.

26 "Imunu yang'amtowa imtumwa wake mmale au pinga na kumlagha nenge yake, yamlekelele imtumwa ayo yoke kwa achila chayamtendile mna nenge yake. 27 Pfipfila yang'amtowa mtumwa wake na kumng'ola litsino, yamlekelele yoke kwa achila chayamtendile mna tsino lyake.

28 "Ing'ombe yang'amuhoma imunu na membe yake na kumkoma, ing'ombe'yo yakomighwe kwa kutowighwa ghamabwe na nyama yake ileke kujighwa, lekeni imunu yane ing'ombe'yo katsolekelelighwa. 29 Lekeni ka ing'ombe'yo katsowela kuhoma iwanu na membe tsake, naye imunu yane ing'ombe tsakalongelighwa mbuli'yo, lekeni ng'amwohile baye, ing'ombe'yo yang'amkoma imunu, yatowighwe kwa ghamabwe na imunu yane ing'ombe'yo naye yakomighwe. 30 Lekeni imunu'yo ka kobamighwa yalihe kukombola ughima wake, kobamighwa yalihe chochose chayabamighwe kuliha. 31 Ing'ombe yang'amkoma imwana mmale au imwana pinga, laghitso lilino litsotumika. 32 Ka ing'ombe kamkoma imtumwa mmale au pinga, yane ng'ombe'yo katsomliha yane imtumwa'yo tsisendi selasini, na ng'ombe'yo katsokomighwa kwa kutowighwa ghamabwe.

33 "Ka imunu ng'aghubike baye lisimo lyake, au yang'ahimba lisimo na ng'alighubike baye, na ing'ombe au ipunda we imunu yungi yang'engila amwo, 34 yane lisimo'lyo katsoliha fidia, yamlihe yane ing'ombe'yo au ipunda'yo na mnyama ayo yafile katsakuwa wake. 35 Ng'ombe we munu yang'amlagha ing'ombe we imunu yungi na kumkoma, wamuutse ng'ombe'yo mghima wegholele tsisendi, pfipfila wegholele tsinyama tsa ng'ombe'yo iyafile. 36 Lekeni ka ing'ombe'yo tsakatsowela kuwatowa wayaghe na tsimembe tsake, na imunu yane ing'ombe'yo ng'amwohile baye, munu'yo kamtsoliha miyaghe ing'ombe yungi, na ayula iyafile katsakuwa wa kwake.