1 "Mleke kulonga ung'enye. Mleke kumwapfila imunu yehile kwa kulonga ughutsu. 2 Mleke ukwanga ne iwanu iwotenda ghehile, wala kulonga ughutsu hane libalatsa kwaapfila iwanu wengi iwali baho wolonga ughutsu. 3 Hamuhigha lighomba lya mhingwa, mleke kumlola mchihanga.

4 "Ung'amwona ing'ombe au ipunda we imuhile wako kagha, umuyitsile imwenyegho. 5 Ung'amwona ipunda we imuhile wako kaghwa na mtsigho ghwake, uleke kumleka, umwapfile kumwinula.

6 "Hamuhigha lighomba lya mhingwa, muhighe ka Imulungu pfayobama. 7 Mleke kuwabangitsila iwanu maghomba gha ughutsu, wala kuwakoma iwanu yawang'atendile ghehile na iwanoghile, kwaapfila nene sitsomleka baye imunu yehile. 8 Mleke kubokela hongo, kwaapfila hongo yowatenda iwakulu wawe pfifita na kuleka kuhigha pfinoghile mbuli tsa iwanu wanoghile.

9 "Uleke kumtendela pfihile imgheni, mwemwe mwomanya ugheni pfauli, kwaapfila tsamkala wagheni mna isi ya Misiri.

10 "Kutsohanda na kupfuna mighunda yako kwa miyaka sita, 11 lekeni mna ghumwaka ghwa saba, kutsoileka imighunda yako iwase, ili iwahingwa yamkala nawo wadahe kusalalitsa mna imighunda ayo, na iwanyama wa kumuhulo waje. Kutsotenda pfipfo mna mighunda ye mitsabibu na mitseituni.

12 "Kutsosang'ana ng'onde tsako tsose kwa matsuwa sita, lekeni mna litsuwa lya saba kutsobwihila, ili nawo ng'ombe wako na punda wako wabwihile, na iwanagho na iwatumwa wako mapinga na iwagheni wabwihile.

13 "Mghakinde ghose ghaniwalongele. Mleke kuitambikila milungu ingi, wala mataghwa ghawo ghaleke kuhulikighwa mna milomo yenu.

14 "Chila mwaka mtsonitendela chihungo mala ndatu kunideng'elela nene. 15 Mtsotenda chihungo che pfighate ipfilihela ihamila. Kwa matsuwa saba mje ipfighate ipfilihela ihamila ka pfaniwalaghitse. Mtende apfo mna matsuwa ighasaghulighwe ighali mna ghumwetsi ghwa Abibu, kwaapfila mna ghumwetsi aghwo mwemwe tsamlawa Misiri. Imunu wowose hayakutsa kunitambikila, yaleke kutsa ghamoko ghaliheka.

16 "Mtsotenda ichihungo cha kupfuna ahala hamngalila pfijo pfenu pfamkwandusa kupfuna kulawa mna tsimbeghu tsenu tsamuwandile mna mighunda yenu. Ghumwaka haghumala hamkunga mapfuno gha isang'ano yenu, mtsotenda chihungo che ukukunga mapfuno. 17 Chila ghumwaka mna pfihungo pfino pfidatu, iwamale wose wetingane kunitamanila nene IMNDEWA.

18 "Uleke kundapfila inambiko ne chighate chine ihamila. Uleke kughaleka ghamafuta ghe imnyama yamtambikile mna chihungo changu ghakale mbaka ilufi nemitondo.

19 "Chila mwaka hampfuna, mngalile ipfijo pfamkwandusa kupfuna, kune ng'anda yamnitambikilagha nene Imulungu.

"Uleke kwambika inyama ye imwana we ing'olo au we imene mna matombo gha mai wake.

20 "Nitsomtuma malaika wangu yawalongolele, ayo katsowalolesa hamghenda mnzila na katsowaghala mbaka hanu haniwekile. 21 Mumtegheletse, na mtende chayolonga, mleke kumpinga, kwaapfila mng'ampinga, yeye ng'atsowalekelela hela baye, kwaapfila nimtuma kwa taghwa lyangu. 22 Lekeni mng'amtegheletsa chayolonga na kutenda ghose ghayatsowalaghitsani, nene nitsetowa ne wanu iwomuhilani, na nitsowapinga awala iwowapinga mwemwe. 23 Kwaapfila malaika wangu katsolongola hambele henu, na kowaghala mna isi yawokala Waamori, Wahiti, Waperizi, Wakanani, Wahipfi na Wayebusi, na nene nitsowatowa awo wose. 24 Mleke kuinamila wala kuitambikila milungu yawo, wala mleke kutenda ka wawo. Ila mtsihinye ghendo na mtsibenebene ngutso tsawo.

25 "Mng'anitambikila nene IMNDEWA, yanili Imulungu wenu, nene nitsowabaliki muwe na chijo na ghamatsi na nitsowakinga mwemwe mleke kuwa watamu. 26 Kutsakuwa kuduhu pinga wowose iyokinda inda na kweleka mwana yafile wala ipinga ing'ayokinda inda baye. Na nene nitsoweng'a ghamatsuwa mengi gho kukala.

27 "Nitsowatenda iwanu iwomuhilani wanipfuke, nitsotsihanganya tsimbutsi tse iwanu yamwitowa nawo. Nitsowatenda awala yamwitowa nawo wahunduke na kumtsuma. 28 Nitsoghala iwalondola wawalongole hambele henu, wawawinge Wahipfi, Wakanani na Wahiti. 29 Sitsowalapfa baye iwanu awo kwa ghumwaka ghumwe, ning'awawinga wose, isi itsokala yahela munu na iwanyama wa kumuhulo watsakongetseka ng'ani mna mwemwe. 30 Nitsowawinga chidogho chidogho mbaka hamtsakongetseka na kwenela mna isi yose. 31 Mibaka ya isi yenu itsakuwa kulawa ibahari ya Shamu mbaka ibahari ya Mediteraniya, na kulawa kulwanda mbaka ghumto Eufurate, kwaapfila nitsowaghela iwanu we isi ayo mna ghamoko ghenu, namwe mtsowawinga woke. 32 Mleke kwilaghana nawo, wala kwilaghana ne imilungu yawo. 33 Mleke kuwaleka wakale mna isi yenu hela watsowahonza mnandele nzambi, kwaapfila mng'aitumikila milungu yawo, aghwo ghutsakuwa mtegho ghendo ghwa kuwakoma."