1 IMNDEWA kawalongela Musa na Aruni mna isi ya Misiri, 2 "Mwetsi ghuno ghutsakuwa ghumwetsi ghwa kwanza ghwa ghumwaka kuna mwemwe. 3 Uwalongele iwanu wose wa Isiraeli apfino, mna litsuwa lya kumi lya ghumwetsi ghuno, chila imunu kobamighwa yaisolele ikaye yake imwana we ing'olo au imwana we imene. 4 Ka iwanu wa ikaye yake wachidogho ng'ani na ng'awodaha baye kummalitsa kumja imnyama wose, iwanu we ikaye ayo na iwanu we ikaye iili habehi yake wodaha kumja hamwe imnyama ayo. Imnyama ayo yamumsaghula, iwanu wang'amja wose wenele. 5 Mwodaha kusaghula ing'olo au imene, yawe imlume iyali na ghumwaka ghumwe, yaleke kuwa na chilema. 6 Muwadime mbaka nemihe ya litsuwa lya kumi na nne lya ghumwetsi ghuno, kuya iwanu wose wa Isiraeli watsowasubutula iwanyama awo. 7 Iwanu watsosola idamu chidogho, watsobaka mmbalimbali na mchanya mwe pfitsingiti pfa ghumlango mna tsing'anda tsawatsomjila imnyama ayo. 8 Ichilo chicho inyama yokighwe na ijighwe na tsimbogha itsisungu na chighate ing'achighumighwe ihamila. 9 Mleke kuija mbisi wala iyambikighwe, ila yokighwe na litwi lyake, ghamaghulu ghake na tsinyama itsili mghati mwake. 10 Mleke kuileka inyama yoyose mbaka nemitondo, inyama yoyose ka ilekighwa mbaka nemitondo ilakatsighwe kwa ghumoto. 11 Apfi pfipfo pfamtsomja imnyama ayo. Mwohe imisipi mchuno, mpfale imikwabatsa mmaghulu, mkinde tsing'weku mna ghamoko ghenu. Muije himahima. Achino ichihungo che Ipasaka ye IMNDEWA.

12 "Mne chilo acho nitsobita mna isi ya Misiri, kumkoma chila imwana immale we iwanu iyalongole ukwelekighwa, na imnyama iyalongole kwelekighwa, na kuitowa imilungu yose ya Misiri. Nene na IMNDEWA. 13 Idamu mna pfitsingiti itsakuwa chitango kulangusa tsinganda tsamkala. Hanitsoyona idamu ayo, nitsowadaluka. Sitsomlaghani baye, baho hanitsowatowa iwanu wa Misiri. 14 Mdeng'eleleghe litsuwa lino ka ichihungo cha ukuwatenda mwemwe mkumbuke achila nene IMNDEWA chaniwatendele. Nowalaghitsa mtende pfino ghamatsuwa ghose."

15 IMNDEWA kalonga, "Kwa ghamatsuwa saba, mtsakuja pfighate pfilihela ihamila. Litsuwa lya mwanduso lya matsuwa agho saba, mtsolapfa ihamila mna tsing'anda tsenu mna ghamatsuwa agho saba. Munu wowose yang'aja ichinu ichili ne ihamila mna ghamatsuwa agho saba yawingighwe mghati mwa Waisiraeli. 16 Litsuwa lya mwanduso na litsuwa lya saba mwitingane mnitambikile nene. Mne matsuwa agho meli mleke kusang'ana ng'onde yoyose, ila ya ukwambika ichijo iliyeka. 17 Mdeng'elele chihungo chino cha pfighate ipfilihela ihamila, mkumbuke litsuwa lyaniwalapfile mwemwe Waisiraeli kulawa Misiri. Pfeleko pfenu pfose ipfikutsa pfitsodeng'elela litsuwa alyo, ka laghitso lya matsuwa ghose. 18 Apfo mtsakuja ipfighate ipfilihela ihamila, kwandusila mihe ya litsuwa lya kumi na nne lya mwetsi ghwa mwanduso, mbaka mihe ya litsuwa lya ishilini na limwe lya mwetsi ghuno ghwa mwanduso. 19 Mne ghamatsuwa agho saba, mleke kuwa ne ihamila yoyose mna tsing'anda tsenu. Imunu wowose, yawe mgheni au mwenyekaye, yang'aja chinu chine ihamila, katsowingighwa mghati mwa kaye tsa Waisiraeli. 20 Mleke ukuja chinu chochose ichili ne ihamila. Hohose hamkala mtsakuja ipfighate ipfilihela ihamila."

21 Kuya Musa kawalaghitsa iwakulu wose wa Waisiraeli, kawalongela, "Haya mwemwe wose mghende mkatsisaghulile kaye tsenu imwana ng'olo au imwana we mene, mumsubutule na mumje mna chihungo che Ipasaka. 22 Msole imitsani ya hisopo muipfabike mna idamu iili mna chiya, kuya mbakatse idamu ayo mna pfitsingiti na mmbalimbali mwose mwe imibani ye tsing'anda tsenu. Imunu wowose yaleke kulawa kunze chilo acho mbaka nemitondo. 23 IMNDEWA hayatsobita Misiri kuwakoma Wamisiri, hayatsoyona idamu mna chitsingiti na mmbalimbali mwe libani katsoidaluka ing'anda ayo, ng'atsomleka baye mkoma wanu yengile mna tsing'anda tsenu kumkomani mwemwe. 24 Mwemwe ne iwanenu mkinde ghamalaghitso gha ghamatsuwa ghose. 25 Hamtsakwingila mna isi ila IMNDEWA iyalongile katsomwing'ani, mtende chihungo chino. 26 Iwanenu hawatsomghutsani ‘Chihendo chino china mana yachi?’ 27 Muwalongele ‘Aino inambiko ye Ipasaka ye IMNDEWA, iyatsidaluke tsing'anda tsa Waisiraeli ako Misiri na kutsileka kaye tsetu hayawatowile Wamisiri.’ "

Waisiraeli tsawatowa ghamaghoti wamtamanila IMNDEWA. 28 Kuya Waisiraeli tsawatenda ka IMNDEWA pfayawalaghitse Musa na Aruni.

29 Mne chilo chikulu IMNDEWA kawakoma iwana chaudele wose wa isi ya Misiri, kwandusila imwana chaudele wa Farao iyokala mng'anda kwe mfalume, mbaka imwana chaudele we imunu yula iyali mchifungo. Hata iwana we iwanyama iwalongole kwelekighwa tsawakomighwa. 30 Apfo Farao, na watawala wayaghe ne iwanu wose wa Misiri walamka chilo chicho. Tsakulawila chililo chikulu mna isi yose ya Misiri kwaapfila tsahaduhu ing'anda hata imwe ilihela imunu yafile.

31 Chilo chicho Farao kawakema Musa na Aruni, kawalongela, "Mlawe, mke sambi baha kune iwanu wangu, mghende mwemwe na Waisiraeli awo mkamtamanile IMNDEWA ka pfamlongile. 32 Msole iwang'olo wenu iwamene wenu ne wang'ombe wenu mke. Kuya mkanombele na nene."

33 Wamisiri tsawawawinga Waisiraeli woke himahima mna isi ya Misiri, walonga, "Ka ng'amkuka baye, twetwe wose tutsakufa ghendo!" 34 Apfo Waisiraeli wasola usaghe iukandighwe bila kughelighwa ihamila, wasola na pfiha pfawo wapfoha mna mabwende wapfighala mmahegha. 35 Waisiraeli tsawatenda ka Musa pfawalaghitse aho mwanduso. Tsawawalomba Wamisiri pfinu pfa fetsa, nzahabu na ghamaghwanda. 36 Naye Imulungu tsakawatenda Waisiraeli wakundighwe na Wamisiri, nawo tsawaweng'a Waisiraeli chila chinu chawabamile. Apfo pfipfo Waisiraeli pfawawabokile Wamisiri pfinu pfawo.

37 Waisiraeli tsawoka Ramesesi mbaka Sukosi. Iwamale tsawapfika ka laki sita bila kuwapeta iwapinga ne iwana. 38 Kuya tsakuna iwanu wangi iwelongotse nawo, hamwe ne iwanyama wengi, iwang'olo na iwang'ombe. 39 Kwaapfila tsawoka Misiri himahima, ng'awadahile baye ukwambika imao ye ghumwanza, ila usaghe ula uliyeka iukandighwe bila kughelighwa ihamila. Apfo wambika ipfighate ipfilihela hamila. 40 Waisiraeli tsawakala Misiri kwa miyaka miya nne na selasini. 41 Halimalile litsuwa lya mwaka wa miya nne na selasini, kolo tsose tse iwanu we IMNDEWA tsuka mna isi ya Misiri. 42 Chilo chicho Imulungu tsakakala meso kowalolesa Waisiraeli yawalapfe mna isi ya Misiri, chilo chino Waisiraeli wose wobamighwa wakale meso kwa kumkumbuka Imulungu pfayawalapfile mna isi ya Misiri, wao na watsukulu wose iwakutsa.

43 IMNDEWA kawalongela Musa na Aruni, "Ghumwiko ghwe Pasaka aghuno hano, mwiko mgheni wowose ukuja chijo che Pasaka, 44 lekeni mtumwa wowose yamumghulile kwa sendi ka kengila ngoma, kodaha kuja. 45 Mwiko kwa Mbita nzila au yakemighwe kusang'ana kwa misi imwe kuja chijo acho."

46 "Nyama yose ijighwe mng'anda, ileke kulapfighwa kunze, mleke kughubena mpate ghwoghwose ghwa mnyama wa Pasaka. 47 Iwanu wose wa Isiraeli wadeng'elele chihungo acho. 48 Mgheni wowose iyakutsa kukala na mwemwe, yang'abama kudeng'elela chihungo cha Pasaka, tanu muwengitse ngoma iwamale wose iwokala mng'anda mwake, baho katsotangika ka mwenyekaye miyenu, naye katsodaha ukuja ichijo acho. Lekeni mleke kumleka mmale wowose yang'engile ngoma yaje ichijo acho. 49 Imiko ino iwe kwa Muisiraeli na mgheni iyokala na mwemwe." 50 Waisiraeli wose tsawategheletsa malaghitso agho na watenda ka IMNDEWA pfayawalaghitse Musa na Aruni. 51 Litsuwa lilila IMNDEWA tsakawalapfa Waisiraeli mna isi ya Misiri.