1 Waisiraeli wose tsawalawa mna isi ya Elimu, nawo wapfika mna inyika ya Sini ikalile haghatighati mwa isi ya Elimu na Sinai. Tsa tsuwa lya kumi na tano mna ghumwetsi ghwa keli kulawa Waisiraeli hawalawile Misiri. 2 Ako kunyika Waisiraeli wose wawanung'unikila Musa na Aruni 3 wawalongela, "Ng'apfu IMNDEWA yang'atukomile hatung'ali Misiri. Ako kwatukalile aku pfiya pfe tsinyama pfitutsunguluka, ako tsatung'ali twakuja pfijo pfose pfatubamile, lekeni mwemwe mtughala akuno kunyika mtukome kwe nzala!"

4 Baho IMNDEWA kamlongela Musa, "Nene nitsowaghalila mvula ye pfighate kulawa kulanga. Chila tsuwa iwanu watsolawa na kudondola ichijo che litsuwa alyo. Kwa kutenda pfino nitsowaghetsa mbone ka watsoghakinda ghamalaghitso ghangu. 5 Mne litsuwa lya sita watsodondola mala mbili ya ichijo chila chawadondolagha."

6 Apfo Musa na Aruni wawalongela Waisiraeli wose, "Nemihe ino mtsomanya ka Imulungu yuyo iyawalapfile Misiri! 7 Ilupfi nemitondo mtsakona ukulu we Imulungu kwaapfila kaghahulika manung'uniko ghenu ighamnung'unikila. Twetwe tsina nani mbaka mtunung'unikile?" 8 Kuya Musa kalonga, "Nemihe, IMNDEWA katsomwing'ani nyama mje, nemitondo katsomwing'ani pfighate mje mwighute, kwaapfila kaghahulika manung'uniko ighamnung'unikila. Ng'amtunung'unikila twetwe baye ila mwomnung'unikila IMNDEWA."

9 Kuya Musa kamlongela Aruni, "Walongele Waisiraeli wose wetingane hambele he Imulungu kwaapfila kaghahulika manung'uniko ghenu." 10 Aruni hayang'ali yolonga na Waisiraeli wose, iwanu wose walola kwaili inyika, bahala ukulu we IMNDEWA woneka mna liwingu. 11 IMNDEWA kamlongela Musa, 12 "Nighahulika manung'uniko gha Waisiraeli. Lelo walongele pfino nemihe watsakuja inyama, na nemitondo watsakuja pfighate. Baho mtsomanya ka nene, yanili IIMNDEWA, na Imulungu wenu."

13 Mihe ayo tsawatsa ng'wale wengi, nawo waghubika pfibumbulika pfa Waisiraeli. Nemitondo yake lilawila litungwe litsunguluka pfibumbulika pfose pfa Waisiraeli. 14 Litungwe alyo halyukile muisi, kunyika tsakoneka chinu ka chighate chidoghodogho na chibewe. 15 Waisiraeli hawachonile, ng'awachimanyile baye, tsaweghutsa, "Achi chinu chachi lelo?" Kwaapfila ng'awamanyile baye tsa chinu chachi.

Musa kawalongela, "Achi chicho ichijo chayaweng'ile IMNDEWA mje. 16 Imulungu kowalaghitsa apfi, chila imunu yadondole ichijo chayodaha ukuja, yadondole makimbo meli kwa chila munu iyali mkaye mwake."

17 Waisiraeli Watenda apfo, wamwenga wadondola pfingi, wamwenga wadondola chidogho. 18 Hawapfipimile pfighate pfawadondole, na awala iwadondole pfingi, tsawahela ipfitsidile, na awala iwadondole chidogho, tsawahela ipfihunguke. Chila munu tsakadondola chayadahile kuja. 19 Musa kawalongela, "Imunu wowose yaleke kuchileka ichijo acho chikale mbaka nemitondo." 20 Lekeni iwanu wamwenga ng'awamuhulikitse Musa baye. Tsawachileka chijo acho mbaka nemitondo. Lekeni nemitondo haipfikile chijo acho tsa china membele wengi na chanza kunung'a. Apfo Musa kawonela maya iwanu awo. 21 Chila nemitondo chila munu tsakadondola ichijo chayodaha ukuja. Tsuwa haliwile kali chijo chila chawachilekile hasi tsachilumbuka. 22 Mne litsuwa lya sita Waisiraeli tsawadondola chijo chila mala mbili, chila imunu makimbo mane. Iwabala wose wa Waisiraeli wamghendela Musa, wamlongela chinu acho. 23 Musa kawalongela, "Apfo pfipfo pfayalongile IMNDEWA, ilupfi litsuwa lya kubwihila, litsuwa alyo lilapfighwa liwe lya IMNDEWA. Mghende mkambike na mpiluse chijo chambama ukwambika, na chijo chila ichikala mchileke mje ilupfi." 24 Apfo wachileka ichijo chikalile mbaka nemitondo ka pfayalaghitse Musa, nacho ng'acholile baye na tsa chahela membele. 25 Musa kawalongela, "Mchije lelo, kwaapfila leloli Litsuwa lya Kubwihila lye IMNDEWA. Leloli ng'amtsochona baye ako kunze. 26 Ghamatsuwa sita mtsodondola ichijo, lekeni litsuwa lya saba, Litsuwa lya kubwihila, litsuwa alyo ng'amtsodondola baye."

27 Mne litsuwa lya saba iwanu wamwenga tsawalawa wakadondole, lekeni ng'awonile baye pfighate. 28 Baho IMNDEWA kamlongela Musa, "Mbaka tsuwachi mtsolema kughakinda malaghitso ghangu? 29 Mlole, nene IMNDEWA nimwing'ani Litsuwa lya kubwihila, ndo mana mna litsuwa lya sita nimwing'ani ichijo cha ghamatsuwa meli. Chila imunu yabwihile ukaye yake, imunu wowose aleke kulawa mna litsuwa lya saba." 30 Apfo iwanu wabwihila mna litsuwa lya saba.

31 Waisiraeli tsawachikema ichijo acho "Mana." Nacho tsachoneka ka tsinama tse uhemba, tsachitselu, na umta wake weghala na chighate ichikighwe uki. 32 Musa kawalongela, "Imulungu kawalaghitsa pfino, ‘Muwekile Imana iwatsukulu wenu iwakutsa, ili wachone ichijo chaniweng'ile mwemwe kunyika, haniwalapfile kulawa Misiri.’" 33 Apfo Musa kamlongela Aruni, "Sola ichiya, wike mghati makimbo meli ghe Mana, wike hambele he Imulungu, muwekile iwatsukulu wenu." 34 Kuya Aruni keka Mana hanu haenzeluke, hane lisanduku lya laghano ili itunzighwe ka Imulungu pfayamlaghitse Musa. 35 Waisiraeli waja Mana kwa miyaka alubaini, mbaka hawapfikile habehi na isi ya Kanani, ako kwawakalile. 36 Chipimo chawapimile imana, cheghala na makimbo ishilini kwa chipimo cha efa.