1 Kuya Musa kamwidika IMNDEWA, "Lekeni tulonge ka Waisiraeli ng'awotoghola baye na ng'awohulikitsa baye chanilonga. Wang'alonga ghweghwe ng'undawile baye, nendetse?"

2 IMNDEWA kamwidika, "Acho choni chukindile mna ghumoko?"

Musa kedika, "Ng'weku."

3 IMNDEWA kamlongela, "Yase hasi." Musa hayasile hasi ing'weku ila ighaluka iwa inzoka, naye kapfuka katsuma. 4 Kuya Imulungu kamlongela Musa, "Winame umkinde ghumkila!" Musa kenama kamkinda ghumkila, baho inzoka ayo kaghaluka kawa ng'weku keli. 5 IMNDEWA kalonga, "Utende apfo ili watoghole ka IMNDEWA wa Abrahamu, Imulungu wa Isaka, Imulungu wa Yakobu kakulawila."

6 IMNDEWA kamlongela keli Musa, "Wike ghumoko ghwako mna lighwanda lyako." Musa katenda apfo, hayaghulapfile, ghuwa na ukoma, mtselu chwee! 7 Kuya Imulungu kalonga, "Wike keli ghumoko ghwako mna lighwanda lyako." Naye katenda apfo, hayaghulapfile, ghuwa ka pfaghukalile mwanduso, ka lukuli lwake lwose pfaluli. 8 Imulungu kamlongela Musa, "Ka ng'awotoghola au ng'awokweghighwa na chihulo cha mwanduso, watsotoghola kwa chihulo cha kabili. 9 Lekeni ka ng'awatsotoghola pfihulo pfino pfili, udeghe ghamatsi mto Naili ughaghume muisi isakale. Ghamatsi agho ghatsakuwa idamu mna isi."

10 Lekeni Musa kalonga, "Baye IMNDEWA uleke kunituma nene. Nene sidaha baye kulonga pfinoghile kulawa ghumwande, hata ghweghwe haulongile na nene mtumwa wako, nene nolonga lughalugha na lulimi lwangu lutito."

11 Imulungu kamghutsa, "Angu yuhi yalumbile mlomo we imunu? Nani iyomtenda imunu yawe chibubu au chitsiwi? Pfii si nene baye Imulungu? 12 Lelo ughende! Nitsokwapfila ukulonga, nitsokulangulitsa cha ukulonga."

13 Lekeni Musa kedika, "Mbe, Ghwe IMNDEWA wangu, nolomba umtume imunu yungi."

14 Baho IMNDEWA kamwonela maya Musa, kamlongela, "Ooh! Pfii Haruni, kaka yako, wa lukolo lwa lawi? Nomanya yeye kodaha kulonga pfinoghile. Kuya kakutsa kwitingana naghwe, baho hayatsokona katsodeng'elela mmoyo mwake. 15 Ghweghwe ulonge naye na umlongele cha ukulonga. Nene nitsomwapfilani ukulonga, mwemwe mwose weli, nitsowalongela cha ukutenda. 16 Chaubamighwe ghweghwe kulonga ne iwanu, katsolonga Aruni. Naye katsakuwa ka mlomo wako, naghwe kutsakuwa ka Imulungu kuna yeye. 17 Uisole ng'weku ino mmoko, kwa ng'weku ino kutsotenda pfihulo pfila."

18 Kuya Musa koya kwa Yetiro mkwe yake, kamlongela, "Ndeke mbuye Misiri kuna ndughu tsangu niwone ka wang'ali waghima."

Yetiro kalonga, "Ughende tseghamba."

19 Musa hayang'ali Midiyani, IMNDEWA kamlongela, "Uye Misiri, kwaapfila wose iwabamile kukukoma ma wafa." 20 Apfo Musa kamsola mwehe wake ne iwanaghe, kawadinitsa mna chihongwe, kandusa ghumwanza kaghenda Misiri, aku kasola ing'weku ila iyalongelighwe na Imulungu yaisole.

21 IMNDEWA kamlongela Musa, "Hautsopfika Misiri, kobamighwa utende hambele ha Farao pfihulo pfose pfanikwingi'le uwetso wa kupfitenda. Lekeni nene nitsomtenda Farao yawe msughu, naye ng'atsowalekelela Waisiraeli woke. 22 Naghwe kutsomlongela pfino Farao, Imulungu kolonga pfino, ‘Isiraeli mwanangu mmale, chaudele wangu! 23 Nokulongela mleke mwanangu yoke, ili yakanitambikile. Lekeni ghweghwe kulema, lelo nitsomkoma mwanagho mmale, iyali chaudele wako.’ "

24 Hayang'ali mnzila kuya Misiri, Musa tsakakala mna ing'anda ya kuwasila wagheni, Imulungu tsaketingana naye, na kabama yamkome. 25 Baho Sipora kasola libwe ilitema, kaghana ligopfi lya imwanaghe na kamdolitsa nalo mmaghulu, kuya Sipora kalonga, "Kwa idamu ino iilawile ghweghwe kwa immale wangu ghendo." 26 Kuya Imulungu kamlekela Musa. Sipora tsakalonga, "Kwa idamu ino iilawile ghweghwe kwa immale wangu ghendo," Kwaapfila tsakamwingitsa ngoma imwana.

27 Kuya IMNDEWA kamlongela Aruni, "Ghenda kulwanda uketingane na Musa." Apfo Aruni kaghenda kwitingana na Musa mna chidunda chihenzeluke, hawetingane kamnonela. 28 Kuya Musa kamlongela Aruni ghose ghayalongelighwe ne Imulungu, na pfihulo pfose pfayalaghitsighwe yapfitende. 29 Kuya Musa na Aruni tsawaghenda wawakema hamwe iwabala wose wa Waisiraeli. 30 Baho Aruni kawalongela ghose IMNDEWA ghayalongile na Musa, kuya Musa katenda pfihulo pfila hambele he iwanu wose. 31 Iwanu watoghola, na hawahulike ka IMNDEWA kawatsila Waisiraeli, na kawona pfawoghaya, wose wenama wamtamanila Imulungu.