1 Aghano ghagho ghamataghwa ghe iwana wa Isiraeli iwaghendile Misiri na aba wawo. Tsawaghenda na pinga tsawo na iwana wawo. 2 Iwanaghe awo tsa Rubeni, Simoni, Lawi, Yuda, 3 Isakari, Zabuloni, Benjamini, 4 Dani, Nafutali, Gadi na Asheri. 5 Iwana wose wa Yakobu na iwatsukulu wake tsawa iwanu sabini. Ghamatsuwa agho Yosefu ma tsa kakuko Misiri. 6 Matsuwa mengi aghabitile Yosefu kafa, kuya na ndughu tsake wose wafa na iwatsukulu wake wala wose wahupa. 7 Lekeni watsukulu wawo iwawalekile tsawongetseka ng'ani, tsa wawa wengi na wana ngupfu sideke, nawo tsawenela chila hanu mna isi ya Misiri.

8 Kuya matsuwa mengi aghabitile tsakalawila mfalume yungi kutawala ako Misiri, ayo tsang'amanyile baye ghatendile Yosefu. 9 Naye kawalongela iwanu wake, "Mlole Waisiraeli pfawali wengi na pfawali na ngupfu kubita twetwe. 10 Lelo twobamighwa tubame inzila ya kuwahungutsa na kuwatenda waleke kwongetseka, hela ing'ondo ing'alawila watselunga na iwanu iwotuhila na kwitowa na twetwe, kuya walawe mna isi aino." 11 Apfo Wamisiri wasaghula wemilitsi wawemile Waisiraeli na kuwadununza kwa sang'ano ng'omu. Waisiraeli watenda sang'ano ya kumtsengela mfalume Farao imiji ya Pitomu na Ramesesi ya ukwikila tsimali tsake. 12 Lekeni pfawang'ali wowadununza, pfipfo Waisiraeli pfawang'ali wakwongetseka na ukwenela. Apfo Wamisiri wandusa kuwapfuka ng'ani Waisiraeli. 13 Wamisiri wawananahitsa Waisiraeli wasang'ane ng'onde ng'omu. 14 Wamisiri wawatenda wakale kwa usungu kwa kusang'ana ng'onde ng'omu ya kuhonda likando na kufatula ghamatofali, na sang'ano tsose tsa kumghunda. Mna sang'ano tsawo tsose tsawasang'ane, Wamisiri wang'ali wowadununza.

15 Kuya mfalume wa Misiri kawalongela iwakunga iwang'ali wowapfila iwapinga wa Waeburaniya, Shifira na Pua. 16 Kalonga, "Hamuwapfila iwapinga Waeburaniya ukweleka, yang'oneka mwana mmale mkomeni, ila yang'oneka imwana pinga mleke kumkoma." 17 Lekeni kwaapfila iwakunga awo tsawampfuka Imulungu, ng'awatendile baye ka pfayalongile imfalume, wawaleka wawe waghima iwana iwamale. 18 Kuya mfalume kawakema iwakunga awo, kawaghutsa, "Ule mtendile pfino? Mbona mwowaleka waghima iwana wamale?"

19 Wamwidika, "Iwapinga Waeburaniya si ka iwapinga Wamisiri baye. Wawo wa ngangali, mkunga ng'ana yapfike baye wawo ma wakweleka." 20 Apfo Imulungu kawatendela ghanoghile iwakunga awo, na Waisiraeli wongetseka na kuwa na ngupfu ng'ani. 21 Kwaapfila iwakunga awo tsawampfuka Imulungu, Imulungu kaweng'a iwana wawo iwenyegho. 22 Kuya Farao kawalaghitsa iwanu wake wose, kalonga, "Chila imwana mmale yakoneka kwa Waebraniya mwaseni mna mto Naili. Ila iwana iwapinga walekeni wawe waghima."