1 Mna ghamatsuwa agho tsahana imunu yumwe wa lukolo lwa Lawi, ayo kamkwela pinga yumwe wa lukolo lulo lwa Lawi. 2 Ipinga ayo kakinda inda kuya keleka imwana mmale. Hayamwonile imwanaghe pfayanoghile, kampfisa kwa miyetsi midatu. 3 Lekeni hayang'ali ng'odaha baye kumpfisa keli, katawa chiseghe cha milala, kachikandika ilami chileke kwingitsa ghamatsi, kamwika imwana ayo mghati. Kuya kachika ichiseghe acho hana imitsani mmbalimbali mwa ghumto Naili. 4 Lumbu wake imwana ayo tsakepfisa habehi na ihanu aho, yone choni chitsomlawila imwana.

5 Kuya neghe Farao kahulumka mna ghumto Naili yakoghe, iwatumwa wake wapinga wang'ali wakwanga mmbalimbali mwe ghumto. Bahala kachona chiseghe chila mna imitsani, kamtuma imtumwa wake yachisole ichiseghe acho yamghalile. 6 Hayachipfughule, kamwona imwana mdodo kolila, kamwonela libatsi, kalonga, "Imwana yuno naye Mweburaniya."

7 Kuya lumbu we imwana ayo kalawila, kamghutsa neghe Farao, "Pfii ng'ende kumkema ipinga yumwe wa Waeburaniya yakulele imwana ayu?"

8 Kamwidika, "Ona kamkeme." Apfo chindele ayo koka, kaghenda kumkema wenye we imwana ayo. 9 Neghe Farao kamlongela ipinga ayo, "Msole imwana yuno undelele, kuya nitsokuliha." Apfo ipinga ayo kamsola imwana ayo kamlela. 10 Imwana hayalekile kong'a, ipinga ayo kamghala kwa neghe Farao. Neghe Farao kamsola, kawa mwanaghe. Kalonga, "Kwaapfila nimpfabula mmatsi, nomkema Musa."

11 Musa hayakulile kaghenda kuwangila ndughu tsake Waeburaniya, kawona pfawang'ali woghaya kwa kusang'ana ng'onde ng'omu. Kamwona Mmisiri yumwe komtowa Mweburaniya miyaghe. 12 Musa kalola kuno na kuno, hayonile kuduhu munu wowose iyomlola, kamkoma Mmisiri ayo, kampfisa mna ghumsanga. 13 Ilupfi yake kaghenda keli, kawona Waeburaniya weli wetowa. Kuya kamghutsa ayula iyang'ali yomtowa miyaghe, "Ebali umtowa miyagho?"

14 Imunu ayo kamwidika, "Pfii kobama ung'ome ka pfaumkomile Mmisiri yula?"

Kuya Musa kapfuka, kelongela, "Iwanu ma wamanya chanitendile." 15 Farao hayahulike apfo, tsakabama yamkome Musa. Lekeni Musa katsuma kaghenda kukala mna isi ya Midiani.

Litsuwa limwe Musa tsakakala habehi na chisima cha ghamatsi. 16 Iwana saba wapinga wa mtambika wa Midiani wapfika, wadegha ghamatsi wamemesa pfinu pfa ukunwela ghamatsi iwanyama ili wawanwese iwang'olo na iwamene wa aba wawo. 17 Lekeni iwadimi wangi tsawatsa wawawinga iwapinga awo, baho Musa kenuka kawamila, kawadeghela ghamatsi iwanyama wawo. 18 Hawoyile kuna aba wawo Yetilo, pfipfila iyakemighwe Reueli, kawaghutsa, "Ebali leloli muya himahima?"

19 Wamwidika, "Mmisiri yumwe tsakatwamila, kawaghoma iwadimi waleke kutuwinga. Kuya pfipfila tsakatudeghela ghamatsi kawanwesa iwanyama wetu."

20 Kawaghutsa iwanaghe, "Lelo yalikwani, ule mumlekile ako? Mkemeni yatse yaje ichijo na twetwe."

21 Apfo Musa katoghola kukala kwa imunu ayo. Kuya imunu ayo kamwing'a Musa imwanaghe iyakemighwe Sipora yamkwele. 22 Sipora kamwelekela imwana mmale. Musa kelongela, "Nene namgheni mna isi ino, apfo nomkema Gereshomu."

23 Miyaka mingi haibitile imfalume wa Misiri kafa. Waisiraeli tsawaghutilila kwa utumwa iwali nawo. Walila wabama Imulungu yawapfile, chililo chawo chimpfikila Imulungu. 24 Imulungu kahulika chililo chawo, naye tsakakumbuka pfayalaghane na Abrahamu, Isaka, na Yakobu. 25 Apfo Imulungu kawalola Waisiraeli, kawonela libatsi.