1 "Apfi pfipfo pfaubamighwa kuwatendela Aruni ne iwanaghe ili walapfighwe wawe wangu wanisang'anile nene ka watambika. Usole ng'ombe yumwe mmale iyali mdodo, na ng'olo weli wamale iwalihela chilonda wala chilema, 2 pfighate ipfilihela hamila, maandatsi ighalihela hamila ighakandighwe kwa mafuta, na pfighate pfisisili ipfilihela hamila ila ipfibakighwe mafuta. Pfose apfo upfitende kwa usaghe unoghile wa ngano. 3 Upfike mna chiseghe na undapfile hamwe ne ing'ombe ayo na wang'olo awo weli.

4 "Kuya waghale Aruni ne wanaghe hane ghumlango ghwa Lihema lya Kwitinganila, uwalongele wehopfughe kwa ghamatsi ka pfachili ichihendo chawo. 5 Kuya usole maghwanda ghe iwatambika umpfatse Aruni, usole ikanzu, ilighubikighwa ne ichisibau, ichisibau, chikoba cha mmambagha, umwohe ne msipi ghwe ichisibau ighufumighwe ghoya. 6 Umpfatse chilemba mwitwi, kuya mchanya mwe chilemba acho wike ichibamba che nzahabu ichandikighwe ‘ILAPFIGHWA KWE MTWATSA IMULUNGU’. 7 Haumalitsa kutenda apfo, usole ghamafuta ghala gha kubaka, umghume Aruni mwitwi mwake ili yawe mtambika.

8 "Kuya uwaghale hane ghumlango iwanaghe Aruni uwapfatse tsikanzu, 9 uwohe imisipi mpfuno na uwapfatse tsikofia tsawo. Apfo pfipfo pfautsowatenda Aruni ne iwanaghe wawe watambika. Wao na watsukulu wao watsonitambikila nene ghamatsuwa ghao ghose.

10 "Kuya umghale ing'ombe yula mmale hambele ha Lihema lya Kwitinganila. Aruni na wanaghe watsakwika ghamoko ghawo mwitwi mwe ing'ombe'yo. 11 Naghwe kutsomsubutula hambele hangu nene IMNDEWA, hane ghumlango ghwa Lihema lyo Kwitinganila. 12 Kutsosola chidogho idamu ye ng'ombe'yo kwa chidole chako, na uibake mna tsimembe tse lisanduku lyo kulakatsila tsinambiko, na idamu yose ikalile uimwaghe hasi he lisanduku. 13 Kuya ulapfe ghamafuta ghose ighaghubike pfinu ipfili munda, na ulapfe likini na figho tsose mbili hamwe na mafuta ghake, upfilakase pfose mchanya mwe lisanduku. 14 Lekeni inyama ye ng'ombe'yo na tsingotsi tsake na mipfi yake kutsopfilakatsa kunze kutali na indalo yenu. Aino itsakuwa nambiko ya kuleghusa nzambi tsa watambika.

15 "Kuya kutsomsola ing'olo yumwe mna iwang'olo wala wamale, umlongele Aruni ne iwanaghe weke ghamoko ghawo mchanya mwe litwi lyake. 16 Kuya kutsomsubutula ing'olo'yo, uisole idamu yake uimitse mna lisanduku lyo kulakatsila iwanyama chila ubali. 17 Umghane ng'olo ayo mahunde mahunde, uhopfughe usapi wake na maghulu ghake, upfike hamwe ne litwi. 18 Kuya umlakakatse ing'olo wose mchanya mwe lisanduku ili undapfile nene inambiko ya kulakatsighwa, kunung'ila ghoya kwa nambiko iilapfighwa kwa ghumoto, kutsoninoghelesa nene IMNDEWA.

19 "Umsole ing'olo yula yungi, Aruni ne iwanaghe watsomwikila ghamoko ghawo mwitwi mwake. 20 Naghwe kutsomtsubutula ing'olo'yo na kusola idamu chidogho na umbakatse Aruni ne iwanaghe hane tsimembe tsa maghutwi ghawo gha kujilo na mna pfidole ghumba pfa ghamoko ghawo gha kujila, na pfidole ghumba pfa ghamaghulu ghawo gha kujilo. Idamu ikalile kutsoimitsa mna lisanduku chila ubali. 21 Kuya kutsosola idamu iili mchanya mwe lisanduku hamwe na ghamafuta ghala gha kubaka ummitsile Aruni na maghwanda ghake, pfifila uwamitsile ne iwanaghe na maghwanda ghawo. Aruni ne iwanaghe watsakuwa waenzeluka, na maghwanda ghao ghose ghatsakuwa ghaenzeluka.

22 "Kuya usole ghamafuta gha ing'olo ayo mmale, mkila ghwake ighunonile, ghamafuta ighoghubika munda, likini, na tsifigho tsose mbili na ghamafuta ghake, na lihatsa lya kujilo, ing'olo'yo kakuwa wa kuhimikila watambika, 23 pfipfila usole chighate chimwe, na liandatsi limwe ilighumighwe ghamafuta, na chighate chisisili chimwe, ipfili mna chiseghe chila che pfighate ipfilihela ihamila ichili hambele hangu nene IMNDEWA. 24 Pfijo pfose pfino kutsomwing'a Aruni ne iwanaghe nawo wapfikinde mna ghamoko ghao, kuya watsopfinula uchanya, wapfiighiseighise pfiwe nambiko yo kuhighisighwa hambele hangu nene IMNDEWA. 25 Kuya kutsopfisola mna ghamoko ghawo na kupfilakatsa mchanya mwe nambiko ila ya kulakatsighwa iili mchanya mwe chilanda, pfininung'ile ghoya na pfininoghele nene IMNDEWA.

26 "Kuya usole chidali che ing'olo ayo yumtendele Aruni yawe mtambika, uchinule chiwe nambiko yo kwinulighwa hambele hangu nene IMNDEWA. Nacho chitsakuwa chako.

27 "Kuya upfike hambele hangu ichidali'cho, na lihatsa alyo, apfo ipfinulighwe, pfe ing'olo mmale yula yalapfighwe ahala Aruni ne wanaghe hawahimikighwe wawe watambika, ipfinu'pfo yeng'ighwe Aruni ne wanaghe. 28 Apfo ghamatsuwa ghose Waisiraeli watsosola ipfinu'pfo kulawa mna tsinambiko tsawo tso kukala tseghamba na nene tsawatsondapfila nene IMNDEWA, watsomwing'a Aruni ne iwanaghe. 29 Hayatsakufa Aruni, maghwanda ghake gho ukutambikila watsakwing'ighwa iwanaghe, nawo waghapfale ahala hawotendighwa wawe watambika. 30 Imwana wa Aruni iyosola isang'ano ya aba wake, katsopfala maghwanda agho matsuwa saba mna Lihema lya Kwitinganila, ili yasang'ane Hanu Haenzeluke.

31 "Naghwe usole inyama ye ing'olo ayo yumtendele Aruni ne iwanaghe wawe watambika, uipiluse mghati mwe luwa. 32 Aruni ne iwanaghe watsoija hane ghumlango ghwa Lihema lya Kwitinganila hamwe ne pfighate pfila ipfisighale mchiseghe. 33 Nawo watsopfija ipfijo pfila ipfilapfighwe ahala hawahimikighwe Aruni ne iwanaghe na kwa kutendighwa ulamulitsi ne Imulungu, lekeni munu yungi yaleke kupfija ipfijo'pfo kwaapfila pfihenzeluka. 34 Inyama yoyose ye ing'olo'yo au pfighate'pfo pfing'akala mbaka hamitondo, upfilakatse mna ghumoto, pfileke kujighwa kwaapfila ipfijo'pfo pfihenzeluka.

35 "Apfo pfipfo pfautsowatendela Aruni na iwanaghe ka pfanikulaghitse, isang'ano yo kuwatenda wawe watambika imale mna matsuwa saba, 36 na chila tsuwa mna ghamatsuwa agho saba umsubutule ng'ombe mmale yawe nambiko ya kuwaleghusila wanu tsinzambi tsawo, na kwa kutenda apfo mtsolitenda lisanduku lyo kulakatsila tsinambiko lienzeluke, kuya kutsolibakatsa ghamafuta ili lienzeluke ghendo. 37 Kwa ghamatsuwa saba ulitende lisanduku litogholighwe ne Imulungu, nalyo litsakuwa lienzeluka ghendo, na chinu chochose ichidonza lisanduku'lyo, chitsakuwa chienzeluka.

38 "Chila tsuwa mna ghamatsuwa agho saba uwasubutule na uwalapfe nambiko mchanya mwe lisanduku wanang'olo weli wa mwaka ghumwe. 39 Mwanang'olo yumwe kutsomlapfa hamitondo na yungi kutsomlapfa hamihe. 40 Imwanang'olo wa mwanduso kutsomsubutula na kundapfila hamwe na makimbo meli gha usaghe utighinike iuhanganyighwe na kimbo limwe lya mafuta gha nzeituni itsikamighwe, na kimbo limwe lya idipfai ka nambiko yo ukunwa. 41 Pfipfila ne ing'olo wa hamihe kutsomsubutula na kundapfila nambiko hamwe ne nambiko ye chijo na ya chokunwa ka pfautendile hamitondo, kunung'ila ghoya kwa nambiko iilapfighwa kwa ghumoto kutsoninoghelesa nene IMNDEWA. 42 Inambiko ino ya kulakatsighwa itsolapfighwa ghamatsuwa ghose, lweleko mbaka lweleko, hambele ha ghumlango ghwa Lihema lya kwitinganila, hambele hangu nene IMNDEWA, aho nene hanitsetingana namwe na kulonga namwe.

43 "Aho nitsetingana na Waisiraeli, na utunitso wangu utsohatenda hanu aho haenzeluke. 44 Lihema lyo Kwitinganila na hanu ha ukulapfila tsinambiko nitsopfitenda pfihenzeluke, pfipfila Aruni na iwanaghe nitsowahimika ili wanitumikile ka watambika. 45 Nitsokala haghatighati mwe wanu Waisiraeli, na nene nitsakuwa Mulungu wao. 46 Nawo watsomanya ka nene yuyo IMNDEWA wao, yaniwalapfile kulawa isi ya Misiri, ili nikale haghatighati hao. Nene nayuyo IMNDEWA wao.