1 Iwanu hawonile Musa kokawa kuhulumka kuchidunda, wetingana hambele ha Aruni wamlongela, "Twetwe ng'atumanyile baye choni ichimlawile Musa iyatulapfile Misiri, lelo ututendele milungu itsotulongotsa". 2 Aruni kawalongela, "Msole tsiheleni tsa nzahabu itsili mmaghutwi mwe wapinga wenu, iwanenu wamale na iwanenu iwapinga, mnighalile." 3 Apfo iwanu wose walapfa heleni tsa nzahabu mmaghutwi mwawo, wamghalila Aruni. 4 Naye katsisola kulawa mna ghamoko ghao katsika mmoto tsilubuke, kuya kafina chinyagho cha imwana mmale wa ng'ombe we nzahabu. Baho iwanu walonga, "Ghwee Isiraeli, aino iyo milungu yako ikulapfile kulawa isi ya Misiri". 5 Aruni hayonile'pfo, kachitsengela lisanduku lyo kutambikila ichinyagho'cho. Kuya kalonga, "Ilupfi kutsakuwa na chihungo cha kumdeng'elela IMNDEWA." 6 Ilupfi haipfikile iwanu walamka nemitondotondo, walapfa nambiko tsawo tsa kulakatsighwa, na nambiko tsa ukukala tseghamba. Kuya wakala hasi, waja, wanwa, no ukupatika, kuya wenuka na kupfina. 7 IMNDEWA kamlongela Musa, "Hulumka kuhisi kwaapfila iwanu wako yauwaghalile kulawa isi ya Misiri, watenda ghehile. 8 Wasumka kuileka nzila yaniwalanguse, wafina chinyagho cha imwana mmale we ng'ombe we nzahabu, nawo wamwinamila na wamtambikila walonga, ‘Ghwee Isiraeli, aino iyo milungu yako ikulapfile kulawa isi ya Misiri!’ " 9 Kuya IMNDEWA kamlongela Musa, "Nowamanya iwanu wano pfawali wasughu. 10 Lelo uleke kunighoma, nene nowonela maya sideke na noghenda kuwakoma ghendo. Kuya kubitila ghweghwe nitsotenda taifa kulu."

11 Lekeni Musa kamdedetsa IMNDEWA, Imulungu wake, kalonga, "Ghwe Imulungu, hebali uwonela maya ng'ulu iwanu wako yauwalapfile kulawa isi ya Misiri kwa uwetso wako mkulu na kwa ghumoko ghune ngupfu? 12 Ung'atenda apfo Wamisiri watsolonga ka Imulungu wao tsakawalapfa mna isi yetu, kumbe tsakabama yakawakome kune chidunda, nawo wahupe ghendo muisi. Ghwee Imulungu, uleke kuwonela maya na uleke kuwatendelela iwanu wako chinu chino. 13 Uwakumbuke iwatumwa wako, Abrahamu, Isaka na Isiraeli, ambe tsakwilaha hambele hao ahala haulongile, Nitsowatenda watsukulu wenu wawe wengi ka tsinondo itsili kulanga na nitsoweng'a isi yose ino yanilongile iwe yawo ghamatsuwa ghose." 14 Apfo Imulungu kaghutuka, kaleka kuwaghalila iwanu wake ghamaghayo ghayalongile katsowaghalila. 15 Kuya Musa kahunduka, kahulumka kulawa kuchidunda aku kakinda mabamba aghala meli ghe ghamabwe gha lilaghano mmwoko mwake, ghandikighwa Ghamalaghitso ghe Imulungu chila ubali. 16 Imulungu mwenyegho yuyo iyaghasongole ghamabamba agho, naye yuyo iyaghandike kwa kukwangula. 17 Yoshua hayahulike iwanu wokemelela, kamlongela Musa, "Nohulika ka kuna tsogho lye ng'ondo kune indalo."

18 Lekeni Musa kamwidika, "Mbe, iwanu ng'awokemelelela apfo baye awohuma mng'ondo wala ng'awokemelelela apfo baye hawotowighwa, ila chanihulika nene, iwanu wakwimba." 19 Musa hayapfikile habehi ne indalo, hayonile chinyagho che nzahabu che mwana mmale we ng'ombe na iwanu pfawopfina, baho maya yake yaka ka moto, kaghasa hasi ghamabamba ghala ighali mmwoko mwake, kaghatula ahala haisi he ichidunda. 20 Musa kasola ichinyagho chila kachilakatsa kwa moto, kachihondahonda mbaka chiwa ka timbwisi, kalitighilila litimbwisi'lyo mna ghamatsi, kuya kawalaghitsa Waisiraeli wanwe. 21 Musa kamghutsa Aruni, "Angu tsawakutendile choni iwanu wano mbaka uwengitse mna nzambi ino ng'ulu?"

22 Aruni kedika, "Uleke kumbonela maya nene, ghweghwe kowamanya iwanu wano pfawong'ang'anila kutenda ghehile. 23 Tsawanongela, ‘Ng'atumanyile baye ichimlawile imunu yuno Musa iyatulongotse kulawa Misiri, lelo ututendele imulungu itulongotse.’ 24 Na nene niwalongela wangalile pfinu pfawo pfa nzahabu, kuya wangalila na nene nipfika mna ghumoto pfilubuke na chinyagho'chi chilawila". 25 Musa hayonile iwanu watotsa, kwa apfila Aruni tsakawaleka watotse na wapate chinyala hambele he wanu iwowehila, 26 kema hane ghumlango ighukwingila kune indalo, kalonga, "Munu wowose iyali ubali we IMNDEWA yatse kuna nene." Iwana wose wa Lawi wamghendela Musa. 27 Naye kawalongela, "IMNDEWA, Imulungu wa Isiraeli kolonga apfi, ‘Chila munu yohe limaghe lyake mchuno, yabite chila hanu kulawa lango limwe lyo kwingilila kune pfibumbulika mbaka lilango lingi, kuya chila munu yamkome ndughu yake, sale yake na munu wa habehi yake.’ " 28 Nawo iwana wa Lawi watenda ka pfayalaghitse Musa. Litsuwa alyo tsawafa iwanu ka elufu ndatu. 29 Kuya Musa kalonga, "Leloli mwemwe mwihimika iwenyegho kumsang'anila IMNDEWA, kwaapfila ng'amlekile baye kuwakoma hata iwanenu na wandughu tsenu. Imulungu yawamotetse leloli."

30 Ilupfi yake Musa kawalongela iwanu, "Mtenda nzambi ng'ulu! Lelo nitsomghendela IMNDEWA kuchidunda, songaa nodaha kuwatenda mwilamlitse ne Imulungu na mleghusighwe inzambi yenu." 31 Kuya Musa koya kwa IMNDEWA, kamlongela, "Nakona usungu iwanu wano watenda nzambi ng'ulu! Wetendela iwenyegho mlungu wa nzahabu. 32 Lekeni sambi nokulomba uwaleghusile nzambi yawo, ka ng'uwaleghusila, nokulomba undafe mna chitabu chawandike che mataghwa ghe iwanu wako." 33 Lekeni IMNDEWA kamlongela Musa, "Imunu wowose iyanendele nzambi yuyo yanitsomlapfa kulawa mna chitabu changu. 34 Lelo uke ukawalongotse iwanu mbaka hanu hanikulongele, lola, imalaika wangu wa kulanga katsokulongola. Hata apfo litsuwa lyanitsowatsila, nitsowaliha kwa nzambi yawo." 35 Kuya IMNDEWA kawatowa iwanu kwa kuwaghalila utamu mkulu, kwa apfila tsawamlongela Aruni yawatendele imwana we ng'ombe yula wa nzahabu, naye kawatendela.