1 Kuya IMNDEWA kamlongela Musa, "Ghenda kwa Farao umlongele, IMNDEWA wa Waeburaniya kolonga apfino, ‘Walekelele iwanu wangu woke wakanitambikile. 2 Ung'alema kuwalekelela woke na kughendelela kuwaghoma, 3 nitsogholosa ghumoko ghwangu kughala maghayo makulu ng'ani mna iwanyama wenu wose, wang'ombe, wafarasi, pfihongwe, wang'amiya, iwamene ne iwang'olo. 4 Nitsowabaghula iwanyama wa Waisiraeli na iwanyama wa Wamisiri, ili yaleke kufa hata mnyama yumwe wa Waisiraeli.’ 5 Nene IMNDEWA, nolonga, ‘ilupfi litsakuwa litsuwa lya kutenda apfino mna isi ya Misiri.’ "

6 Ilupfi yake IMNDEWA katenda ka pfayalongile, wanyama wose wa Wamisiri wafa, lekeni kuduhu mnyama hata yumwe wa Waisiraeli iyafile. 7 Farao katuma iwanu waghutse mbuli tsa Waisiraeli. Iwanu awo hawoyile wamlongela kuduhu hata mnyama wawo yumwe iyafile. Lekeni hata apfo Farao kaghendelela kuwa msughu naye ng'awalekelele baye iwanu woke.

8 Kuya IMNDEWA kawalongela Musa na Aruni, "Chila yumwe yasole ghawo limwe lye lipfu mna tanuri, kuya Musa adimle mchanya hambele ha Farao. 9 Lipfu alyo litsakuwa timbwisi ilitsakwenela mchanya mwe isi yose ya Misiri. Litsoghala mapute ighatsotulika na kuwa pfilonda kwe iwanu na iwanyama chila hanu mna isi ya Misiri." 10 Apfo wasola lipfu mna tanuri, wamghendela Farao, naye Musa kalidimla mchanya. Nalyo liwaghalila iwanu mapute, nagho ghawa pfilonda kwe iwanu na kwe iwanyama. 11 Iwahawi wala ng'awadahile baye ukwima hambele ha Musa na kumpinga kwaapfila wawo tsawana mapute ka Wamisiri wangi. 12 Lekeni IMNDEWA kamtenda Farao yawe msughu. Naye ng'awahulikitse tsina Musa na Aruni ka IMNDEWA pfayalongile.

13 Kuya IMNDEWA kamlongela Musa, "Ilupfi ulamke nemitondotondo umghendele Farao, umlongele ka nene IMNDEWA, Imulungu we Waeburaniya nolonga apfino, ‘Walekelele iwanu wangu woke wakanitumikile. 14 Kwaapfila sambi nitsoghala maghayo makulu kuna ghweghwe ghumwenyegho na kune watawala wayagho na kwe iwanu wako. Naghwe kutsotanga ka kuduhu wowose yeghala na nene mna isi yose. 15 Ning'enule ghumoko ghwangu kukutowa ghweghwe ne iwanu wako kwa kukughalila utamu, mng'amalile ghendo. 16 Lekeni nimlekani waghima kulangusa ngupfu yangu, na kutenda taghwa lyangu limanyike mna isi yose. 17 Lekeni ghweghwe ung'ali msughu, kolema kuwalekelela iwanu wangu woke. 18 Lelo ilupfi, isaa ka aino, noghala mvula ng'ulu ya ghamabwe, ng'ana ilawile baye mna isi ya Misiri kulawa isi ino hayanzile mbaka leloli. 19 Lelo ulaghitse iwanyama wako na chila chinu chako ichili kumghunda chighalighwe mng'anda. Kwaapfila imvula ya ghamabwe itsomtowela chila imunu na chila imnyama yali kumghunda na wowose iyang'aghalighwe ukaye, wose watsakufa.’ " 20 Iwatawala wayaghe Farao wapfuka chayalongile IMNDEWA, wawoitsa ukaye iwatumwa ne iwanyama wawo. 21 Lekeni awala iwabetsile chayalongile IIMNDEWA, wawaleka kumighunda iwatumwa wawo ne iwanyama wawo.

22 Kuya IMNDEWA kamlongela Musa, "Winule ghumoko ghwako kulanga, imvula ya ghamabwe itowe mna isi yose ya Misiri, iwatowele iwanu ne iwanyama iwali kumghunda ne imimeya yose." 23 Musa hayagholose ng'weku yake kulanga, kulanga kuduma, lumwesa ne imvula ya ghamabwe pfihulumka muisi. Apfo IMNDEWA kaitenda imvula itowe isi yose ya Misiri. 24 Imvula ayo ng'ulu ya ghamabwe haing'ali itowa, kulanga tsakuduma na lumwesa luhulumka. Ng'ana ilawile baye imvula ya ghamabwe ka ayo kulawa isi ya Misiri hayanzile. 25 Imvula ayo ya ghamabwe tsaibenebena chila chinu ichili mmighunda na chila hanu mna isi ya Misiri, pfipfila iwakoma iwanyama ne iwanu. Kuya ghamabwe ghe imvula ayo ghaibenabena imimeya yose mna imighunda ne imibiki yose. 26 Imvula ayo tsaitowa mna isi yose ya Misiri, lekeni ng'aitowile baye Gosheni, hanu hawakalile Waisiraeli. 27 Farao tsakalaghitsa Musa na Aruni wakemighwe, hawapfikile kawalongela, "Sambi nitenda nzambi, IMNDEWA kana haki, nene ne iwanu wangu tutotsa. 28 Umlombe Imulungu, kwaapfila imvula ino na lumwesa pfitsidi. Nitsowalekelela mghende, ng'amtsoghendelela baye kukala keli."

29 Musa kamwidika, "Baho hanitsolawa kunze mwe ghumji, nitsakwinula ghamoko ghangu nitsomlomba IMNDEWA. Ukuduma kwitsenyamala ne imvula aino ya ghamabwe ng'aitsotowa keli baye ili umanye ka iisi yose yake IMNDEWA. 30 Lekeni nomanya ghweghwe na iwanu wako ng'amtsompfuka baye IMNDEWA."

31 Kitani na shayiri tsapfihinyighwa kwaapfila shayiri tsa ina makungwi, na kitani tsa isanula maluwa. 32 Lekeni ngano ng'aihinyike baye kwaapfila tsang'ana ikomale baye. 33 Kuya Musa koka ukaye kwa Farao, kaghenda kunze kwe ghumji kenula ghamoko kamlomba Imulungu. Imvula ya ghamabwe tsaileka na ukuduma kwinyamala, na imvula imalila baho. 34 Mfalume hayonile imvula ya ghamabwe na ukuduma kwinyamala, tsakayuila keli nzambi yake. Yeye ne iwatawala wayaghe waghendelela kuwa wasughu. 35 Ka IMNDEWA pfayalongole kulonga kubitila Musa, Farao ng'awalekelele baye Waisiraeli woke.