1 "Ka munu keba ing'ombe au ing'olo, naye komkoma au komuutsa, imunu'yo yalihe wang'ombe watano kwa ng'ombe yula yumwe iyamwibile na wang'olo wane kwa ing'olo yula yumwe iyamwibile. 2 Mwitsi yang'aghoghighwa aku kobena ing'anda nechilo, naye yang'atowighwa mbaka yafe, imunu iyamkomile ng'atotsile baye. 3 Lekeni mwitsi'yo yang'aghoghighwa nemisi, naye yang'akomighwa, imunu'yo iyamkomile katotsa.

"Mwitsi kobamighwa yalihe achila chayebile. Ka kahela chinu cha kuliha, yeye imwenyegho yautsighwe yakawe mtumwa na sendi itsibokelighwa tsilihile achila chayebile. 4 Ka keba mnyama na imnyama ayo koneka ka mghima kwa mwitsi'yo, yawe ing'ombe, au ipunda au ing'olo, mwitsi'yo katsoliha wanyama weli kwa ayula yumwe iyamwibile.

5 "Imunu yang'awaleka wanyama wake waje mna mghunda ghwa mitsabibu ghwa miyaghe, au kumlekela mnyama wake mna mghunda ghwe imunu yungi, katsoliha pfijo pfinoghile ipfili mumghunda mwake imwenyegho, au ipfili mna mghunda ghwake ghwa mitsabibu.

6 "Imunu yang'abwina ghumoto mna mghunda ghwake, naghwo ghung'alakatsa imitsani no ukwenela mbaka ghulakatse malundo gha ngano au ngano ng'ana ipfunighwe ye imunu yungi, au mghunda ghose, imunu'yo yabwinile ghumoto'ghwo yalihe.

7 "Imunu yang'amlekela miyaghe fetsa au mali ingi yamwikile, kuya pfibighwa mng'anda mwake, mwitsi yang'aghoghighwa katsoliha mala mbili. 8 Lekeni ka mwitsi'yo ng'oneke baye, iyane ing'anda katsoghalighwa kwe walamtsi ili yalanguse ka si yeye baye iyebile mali ya miyaghe.

9 "Ka iwanu weli wesongela ing'ombe, au ipunda, au ing'olo, au maghwanda au chinu chochose ichaghile, na chila imunu kolonga cha kwake, iwanu awo weli waghalighwe kwe walamtsi iwakalile hambele he Imulungu. Ayula walamtsi yawatsolamla katotsa, ayo katsomliha miyaghe mala mbili.

10 "Imunu yang'amwing'a miyaghe ipunda, ing'ombe, ing'olo au mnyama wowose yamwikile, na mnyama ayo yafe au yalaghighwe au yasolighwe bila imunu wowose kumwona, 11 imunu iyamwikile mnyama ayo yelahe hambele he IMNDEWA ka ng'ebile baye mnyama wa miyaghe, naye imunu yane imnyama ayo katsotoghola, na ayo miyaghe ng'atsoliha baye chinu chochose. 12 Lekeni ka imnyama kebighwa kuna yeye, yeye imwenyegho kobamighwa yamlihe imnyama ayo. 13 Ka imyama ayo kakomighwa ne iwanyama wa kumuhulo, imunu ayo iyamwikile imnyama ayo yamghale imnyama ayo yafile yakamlanguse imwenyegho. Kuya yeye ng'atsoliha chinu chochose baye kwa imnyama ayo iyakomighwe ne iwanyama wa kumuhulo.

14 "Imunu ang'atsima imnyama kwa miyaghe, kuya mnyama ayo yalaghighwe au yafe aku mwenyegho ng'ali baho baye, imunu iyatsimile mnyama ayo, katsoliha. 15 Lekeni ka imwenyegho tsakabaho, imunu ayo iyatsime ng'atsoliha chinu chochose baye. Ila ka tsakamkodi imnyama ayo, yane imnyama ayo yasole isendi ya kodi iliyeka.

16 "Ka imunu komnyenganyenga imwali yang'ana yawase ne mmale baye, na wala ng'ana yalapfighwe tsengele, na kuwasa naye, imunu ayo yalampfile tsengele na yamkwele imwali ayo. 17 Lekeni aba wa imwali ayo ang'alema kumleka imwanaghe yakwelighwe, imunu ayo katsoliha sendi ya tsengele iibamighwa kwa imwali yang'ana yawase ne mmale.

18 "Umkome ipinga mhawi, uleke kumleka yawe mghima.

19 "Imunu yowasa ne imnyama, ayo yakomighwe.

20 "Imunu yomlapfila nambiko mulungu yungi, na si IMNDEWA yaliyeka baye, ayo yakomighwe ghendo.

21 "Mleke kumtendela pfihile imgheni wala kumdununza, kwaapfila mwemwe pfipfila tsamkala wagheni mna isi ya Misiri. 22 Mleke kumtendela pfihile mghane, wala imwana mchuwa. 23 Mng'awatendela apfo, nawo wang'anililila, nene nitsohulika chililo chawo, 24 nitsowonelani maya, na nitsowakoma mna ing'ondo. Wehe tsenu watsakuwa waghane na iwanenu watsakuwa wachuwa.

25 "Ung'amwatsima tsisendi imunu wowose mhingwa mna iwanu wangu, uleke kumlongela yakulihe, wala kusola liba kuna yeye. 26 Ka miyagho kakwikila poni lighwanda lyake, umuyitsile lighwanda alyo ng'ana litsuwa liswe. 27 Kwaapfila lighwanda lyake lyo kwighubika lilyo liliyeka. Lelo atseghubika choni hayatsowasa nechilo? Ang'andilila nitsomuhulika kwaapfila nene nina libatsi.

28 "Uleke kumlonga pfihile Imulungu, wala kumlighita imkulu we iwanu wako.

29 "Mleke kukawa kundapfila ipfijo pfinoghile pfampfuna na idipfai yenu.

"Mngaye iwana wenu iwamale iwalongole ukwelekighwa. 30 Mngaye iwana iwamale iwalongole kwelekighwa we iwang'ombe na we iwang'olo wenu. Muwaleke wakale na mamo tsawo kwa ghamatsuwa saba, na mna litsuwa lya nane ndapfileni nene.

31 "Mwemwe mtsakuwa iwanu wangu, apfo mleke kuija inyama ye imnyama wowose iyakomighwe ne iwanyama wa kumuhulo, ila wasileni iwambwa inyama ayo.