1 Kuya IMNDEWA kamlongela Musa, "Nitsotenda chihulo chingi chimwe kumtowa Farao na isi yake ya Misiri. Kuya katsowalekeleni mghende. Naye katsowawinga ghendo mlawe hano. 2 Lelo walongele Waisiraeli wawalombe iwanu wa habehi yawo waweng'e pfinu pfa nzahabu na fetsa." 3 IMNDEWA kawatenda Waisiraeli wakundighwe na Wamisiri. Naye Musa imwenyegho tsakakala imunu iyotogholighwa mna isi ya Misiri, hambele ha iwatawala wa Farao ne iwanu wose.

4 Kuya Musa kamlongela mfalume, "IMNDEWA Imulungu kolonga apfino, ‘Leloli nechilo ghendo, nitsobita mna isi ya Misiri. 5 Hanitsobita, chila imwana mmale iyalongole ukwelekighwa mna isi ya Misiri katsakufa, kwanzila mwanagho, yali mhala wako, mbaka mwana wa mtumwa wako pinga iyosagha usaghe kwa libwe. Hata iwana iwalongole ukwelekighwa we iwanyama nawo wose watsakufa. 6 Kutsakuwa ne chililo chikulu mna isi ya Misiri ng'ana chilawile baye, kuya ng'achitsolawila keli. 7 Lekeni Waisiraeli watsokala tseghamba na kuduhu hata yumbwa iyatsomkughila imunu wowose au imnyama wawo. Kuya mtsomanya ka IMNDEWA kowabaghula Waisiraeli na Wamisiri.’ " 8 Musa kamalitsila kwa kumlongela Farao, "Iwatawala wayagho awano watsonitsila na ukwinamila na ukulonga, ‘Ughende ghweghwe ne iwanu wose yuwalongotsa!’ Baho nitsakuka." Kuya Musa kaghudubuka koka. 9 IMNDEWA kamlongela Musa, "Farao katsoghendelela kuwa msughu, ili pfihulo pfangu pfongetseke mna isi ya Misiri." 10 Musa na Aruni tsawatenda pfihulo apfo pfose hambele ha Farao. Lekeni IMNDEWA tsakamtenda Farao yawe msughu, kalema kuwalekelela Waisiraeli woke muisi mwake.